MARKO 6:31-39

³¹Má marán matananu di káng narsá Iesu má kán kalilik án aratintin, má kápate arwat ngo da namnam. Má ngorer Iesu a parai si di ngo, “Gam lákám. Giták han uri pokon kápte kálámul on, má giták aunges.”

³²Má di masik di aptur má di han i mon uri pokon kápte kálámul on.

³³Má marán kálámul má wák di mák di di han, di mák ilam di má dik rut talum tili kandi tan malar má dik purut táil iatung i suan ngo ái Iesu na masar on.

³⁴Má namur ái Iesu a tapam hut mák mákái tilik lala matananu má a mámna di. A mák di di ngoro tan sipsip kápte te kák di, má a lala atintin di uri marán táit.

³⁵Ákte páput má nák dorah i nas, má kán kalilik án aratintin di hut má dik parai si Iesu ngo, “Minái pokon mau má nas ákte páput má na dorah.

³⁶Una dos pala di uri bos malar suri dák hul namnam ándi.”

³⁷Mái Iesu a kos di ngoromin, “Á gam sang gama tabar di.” Má dik parai ngoromin, “Wa u tu ret si gim! Ngo na mon i kángit te na ru i mar á pirán tabal, kápnate arwat mul mai lala matananu minái!”

³⁸Mái Iesu a longrai ngorer má a gátna di mul ngo, “A is á balbal erei di kipi? Gam mákái be.” Di mákái má di kaleng má dik parai singin ngo, “Alim i tigán balbal má aru i isu.”

³⁹Má a parai singin matananu suri da tam purwa di uri tan huhu má dák sukis iatung i poron ur. Má ngorer matananu dik tam purwa di sang uri tan kiskis, te alim i sángul á kálámul on, má te kiskis kesá mar á kálámul on, má dik sukis má.