Mark 8:5-18

⁵Ma nikaiteyo, “Ya bi beredi bado gokaisanu nufa?” Ma niyadi, “7.”

⁶Ye amiye tau gade konori ameinu reyagane vo niyo. Resi bi beredi bado 7 moisi buni tora gade Sei rofu masi beredi okusi ini usi dina vene maro amiye tau gade rau regedi dada, resi makai reyadi.

⁷Ina venesa ka oyena keika be nufa, mina ka buni tora gade Sei rofu masi ini usi dina vene maro rau reyaganedi.

⁸Ma ina vene iruku iriyadi ma uka bere niyadi. Ye tuta fereyadi bi foroka 7 moi vata baeyadi.

⁹Amiye bi 4,000 kana; nifeideyo ma diyadi.

¹⁰Kamini evade ini usi dina venesa bouti keu risi Dalmanutha gagani rofu boyadi.

¹¹Ye Pharisee vene okisi Iesu rofu kayamo regi kora regamadi. Omari rebe yokoi reyainedi nikaiteyadi, ebene regika bi rama ba ide Sei bi ini vava maro.

¹²Ma ini vima dudu ababa nisi niyo, “Beika resi gua amededi vene yaku rebe maina rededi? Rama iniye ya nida, rebe yokoi mina vene rofu de mago.”

¹³Kamini mina vene feresi dudusa bouti keu risi berou eta rofu ugasi boyo.

¹⁴Ma ini usi dina vene bi beredi bado moigi toto niyadi, ye beredi yokoi maka boutiri inasa moi digamadi.

¹⁵Ye Iesu ago gira masi niyo, “Nari resi Pharisee vene ma Herod di yeast rofu vei mona refa.”

¹⁶Ye iniye iniye nidodi resi niyadi, “Mina niyo, ini adina bi beredi koina.”

¹⁷Kamini Iesu yaku ini mokena veifategasa nikaiteyo, “Beika resi beredi bado koina dada nidodi rededi? Ya vene bi toga veifatesi adari ufatena de rededi? Yi uka bi gira niyadi ba?

¹⁸Yi nemoko bi amededi, idu de vededi, ma anema nufa, idu de neidededi ba? O ya diba de mokededi?