Mantá Tanla 18:11-26

¹¹Junni Páblori Jesucrístochi fiquica tsanque meráto, wata man quitsa fecári jun pueblobi Diosichi fiquica micarito chuminue.

¹²Tsantin chusanan, israelítalari Pábloca manaman pailainue. Galión tinun tsachi Acaya tobi miya josanan tsanque pailainue. Junni israelítala layaito, Pábloca cato, Galiónchica tanjilainue.

¹³Junchi tanjito, Pábloca duque seitonhe tito itsanlatinue: —In Pablo tsachilaca micarito, Diosica palaque tenca casa carimin joe latinue. Matu to mantaca telaquepode! timin joe latinue.

¹⁴Junni Pablo beco pachinasanan, Galionni yaca de suwato, israelítalabe itsantinue: —Israelítala, in Páblori seiton quica itoe tinue. Yari jelenquira quimin jomanpari, junni lari nulaca meráno jomin joinhie.

¹⁵Aman tsan itoe. Nulachi costunbre tenchisiri pacaalaquinae tinue. Nulari epe fiquica, epe mantaca cuenta quilaquinae tinue. Junca merátiyoe tinue. Nula talanan manseilaide! tinue.

¹⁶Junni Galión tsantisi, israelítalaca yachite nechi jera manherenue.

¹⁷Aman manca israelita Diosichi fiqui miinun yabi mantamin jominue Sóstenes mumun. Junni Galiónchibi nechi manlalainasa, israelita itonlari Sósteneca cato, Galionchi cale quilaquinue. Galionni junca quiraniquinue.

¹⁸Junni Pablo jun pueblobi numari chuminue. Junto Jesuchi tsachilabe pato, manjinayoe tito jinue. Páblobe, Priscílabe, Aquílabe barcochi jito, Siria toca jilainue. Junchi jinato, Pablo Cencrea pueblobi aca jera porenue israelítalachi mite Diosibe trato quica joto.

¹⁹Junni Efeso pueblobi felaito, Pablo Diosichi fiqui miinun yabi wito, yalaca micarinue. Junni yaca meráminlari rocailainue jun pueblobi cachusa. Tsanlatinasanan Páblori yalabe itsantinue: —Chuno podeitiyoe tinue. Jerusalenbi fiesta ichinae tinue. Jun fiestate Jerusalenbi rano joyoe tinue. Diosi tinari, nulachica manjanae tinue. Junni Pablo tsantisi, Aquílalaca purato, Efésobi nechi barcochi jito,

²²Cesarea pueblo fecári jinue. Junni barcobi nechi manloto, Jerusalén fecári jinue. Jesucrístochi tsachila layaicabe saludaibi jinue. Junsi Antioquía puebloca manjanue.

²³Junni junbi nasiri chuminnan, manan mannenabi jinue. Galacia tose, Frigia tose jinaminue. Pueblo cura Jesucrístobe penenaminlaca sonba tenca mansuwadede nenaminue.

²⁴Tsan josanan manca israelita tsachi Efeso puebloca janue Apolo mumun. Yari Alejandría pueblobi nechi jominue. Diosichi Pilaca seque mirato, tsara seque pamin jominue.

²⁵Junni Apolo mantimini matulenan Mumunmin Juanchi fiquica meráto, Miya Jesucrístoca nasiri miraminue. Juntonan sonbaque tenca cato Jesucrístoca paca fiquica micarinaminue. Juánbesiri miica jotonan, sequebanan micarimin jominue.

²⁶Junni Apólori Diosichi fiqui miinun yabi wito, Jesucrístoca paca fiquica natiya luratuto micarinaminue. Junni Aquílabe Priscílabe yaca meráto, yalachibi jacarito, Jesucrístoca paca fiquica nanni sele tucarilaquinue.