Make 7:26-36 in Enga

²⁶ Enda doko Gitiki pii lenge Pinisia enda Sitia tange mende-pyaa. Enda dokome baanya wanenge-kisa enjele koo palenge doko Jisasame watao pyakamaina lea-pyaa.

²⁷ Dopa leamopa Jisasame enda doko lamaiyoo, “Naimame wanenya nee dupa nyepala pyale lao yana dupa maitamanopa auu napitana wambao wane dupa nee nao tiaka kayatena kaya,” lea-pyaa.

²⁸ Enda dokome yanu pyao baa lamaiyoo, “Akali Andake, embame kini leeno. Dopaka doko, wane dupame nee nao katai pyao nepelyamino dupa yana toko pundipundi kalyami dupame nyoo nengemakana,” lea-pyaa.

²⁹ Dokopa Jisasame enda doko lamaiyoo, “Embame dopa lao pii leeno ongonya enjele koo dokome embanya wanenge doko yakinatala patelyamona emba andaka puu,” lea-pyaa.

³⁰ Enda dokome andaka pupala baanya wanenge doko tokonya paliuu siamo kandea-pyaa. Enjele koo dokome wanaku doko yakinatala patea-pyaa.

³¹ Dee baa yuu taono Taya dokonya yuu siamo dupa yakinatala Saitonepa Dekapolisapa yuu dolaponya-kaita pao endaki Galili pete dokonya pilyia-pyaa.

³² Dokopa endakali mendapuame akali kembau mumaa mende baa kateamo dokonya laminao ipupala baame kingimi minina leami-pyaa.

³³ Dopa piaminopa Jisasame endakali kambu doko yakinatala akali doko iki laminao umbisale pupala baanya kingi kondenge dolapo akali dokonya kale kaita pyandakamaiya-pyaa. Dopa petala sopokali tasoo nepatala kekenya watandakamaiya-pyaa.

³⁴ Dopa petala kaiti-kisa kandalyetae katao mona ŋee latala, “Epata,” lea-pyaa. Epata doko kapilyoo lumba lea-pyaa.

³⁵ Dopa leamopa akali dokonya kalekaita dolapo lumbapa keke doko lee mendai tolata piamopa baame pii tolao lea-pyaa.

³⁶ Dopa piamo doko endakali dupame endakali mendaipi mende lamaiya naena lao baame kyoto joo daa lea-pyaa. Dopa leamoaka doko, dupame lamaima-lamaima pyoo lamaiyoo tayami-pyaa.

²⁶ Endangi kamalya petenge, yuu dokonya tange dokome, baanya wanenge-kisa imambu koo palenge doko Jisasame watao pyakamaina lao tee lea.

²⁷ Dopa leamopa, Jisasame enda doko lamaiyoo, “Wanenya nee dupa yana namaipenge. Wambao wanenya nee dupa tange nao tiaka kaena maipengena” lea.

²⁸ Dopa leamopa, enda dokome yanu pyao, “Akali andake, wane dupame nee nelyaminopa, kuku-kakanapi isa pelyamo dupa yana toko pundi-pundi kalyami dupame nyoo nengemakana” lea.

²⁹ Dokopa Jisasame enda doko lamaiyoo, “Embame kiningi namba tungi pyao leleno dokonya, imambu koo dokome embanya wanenge doko yakinatala patelyamona, emba andaka puu” lea.

³⁰ Enda dokome andaka pupala kandeamopa, imambu koo dokome wanaku doko yakinatala pateamopa, baa auu pyoo tokonya paliu sia.

³¹ Jisasa yuu andake Taeya doko yakinatala, yuu Saidone-kaita pao, yuu Dekapolisa pyakanatala, dokonya-kaita lanao pao Galilea petesa pyakanea.

³² Dokopa endakali mendapuame akali kaleketa muumaa mende baa kateamo dokonya laminao ipupala, kingimi watandena lao tee leami.

³³ Dopa leaminopa, Jisasame akali doko iki laminao, endakali kambu doko yakinatala, umbisale pupala, baanya kingi konde dolapo akali dokonya kalekaita pyandakamaiya. Dopa petala baanya kingi kondenya sopokali talyinya pisetala, muumaa dokonya kekenya watandea.

³⁴ Dopa petala kaiti-kisa kandalyetae katao, mona ŋee latala, “Epata” lea. (Pii dokonya tenge doko, “Lumba.”)

³⁵ Dopa leamopa, akali dokonya kalekaita dolapo lumbapa, keke doko tolata piamopa, pii tolao lea.

³⁶ Dopa piamopa, Jisasame endakali kambu doko kyeto joo lamaiyoo, “Nyakamame kanjamino dupa mende lamaiya naeyalapape” lea. Dopa leamoaka doko, dupame pii nepatala, lamaiyoo taeyami.