Make 4:24-34 in Enga

²⁴ Dopa latala dee baame dokaita lamaiyoo, “Nyakamame pii silyamino doko masokondape pyepape. Nyakamame endakali mende-kisa mana minataminoli pyoaka Goteme nyakama-kisa minata. Dee mana mendapua baame waipa soo minataka.

²⁵ Opale singi endakali doko konda pyoo maita. Opale nasingi endakali doko-kisa setamo dolapo nyokonyetana,” lea-pyaa.

²⁶ Dopa latala dee baame dapa lea-pyaa: “Goteme isingi doko akali mendeme ee wai yuunya lyandenge dopale.

²⁷ Baame lyandatala kuka luu palipa yuu yongelyamopa sakatata pilyamopa ee wai doko langa latala andenge. Dopa pilyamopa baame aipa petala langa lao andelyape lao nakandenge.

²⁸ Wambao yoko pingi. Dopa petala mange pyakalyingi. Mange ongonya dii lyoo wambu pingi.

²⁹ Wambu petala napenge gii doko epelyamopa akali dokome uaa pepo dokome lyingina,” lea-pyaa.

³⁰ Jisasame dokaita dapa lao pisia-pyaa. “Naimame Goteme isingi doko aipalena lamape? Aki mendepa makande pyoo kongali lamape?

³¹ Doko masetedii dopale. Endakali mendeme masete wai doko yuunya lyandenge. Isa yuu dakenya ee wai waka dupa pitakame ita minao masete dii doko etete yakane mende.

³² Dii doko lyandataesa langa latala andao ee wai waka eenya pokatae dupa pitaka ita miningi. Dokonya wangya dupa andake jilyamopa luu lelya dupanya yaka dupame kapa pao anda pingimana,” lea-pyaa.

³³ Baame kongali pii dopale dupa longo lao endakali dupame sepenge jiali pyoo lamaiyoo katea-pyaa.

³⁴ Baame pii mende mee lamaiya nayao kongali lawaka lamaiya-pyaa. Dopa petala baanya disaipele dupa iki kateamino dokopa kongali dupa pitakanya tenge dupa lamaita pia-pyaa.

²⁴ Dopa latala dee baame dokaita lamaiyoo, “Nyakamame endakali mende-kisa mana minatamino dopaka pyoo, Goteme nyakama-kisa mana minata. Dopana, nyakamame pii silyamino dokonya tenge doko masetala pyepape. Dopa pitaminoliaka pyoo, Goteme mana mendatupa apata konda pyakata.

²⁵ Endakali mende-kisa Gotenya pii longo setamo doko, baa konda pyoo maita. Dopaka doko, Gotenya pii nasingi mende-kisa kuki setamopa, sekelyamo lao masetamo doko, dutupa tange nyokonyetana” lea.

²⁶ Jisasame kongali pii mende lao pituu, “Gotenya isingi mate doko akali mendeme ee wai lyandenge dopale.

²⁷ Baame lyandatala, kuka luu palipa, yongama sakatata pilyamopa, ee wai doko tange langa latala, andenge. Dopa pilyamopa, aipa petala langa lao andelyape lao nakandenge.

²⁸ Yuu dokome pilyamopa, ee wai doko langa lenge. Dokopa, yoko pingi. Dopa petala, mange dokonya dii lyoo, wambu pingi.

²⁹ Dii doko wambu petelyamopa, ee pokenge akali dokome konja-wuame lyao mandengena” lea.

³⁰ Jisasame deaka dokaita lamaiyoo, “Naimame Gotenya isingi mate doko aipalena lamape? Dee aki mendepa makande pimape?

³¹ Doko ee wai mastet lenge dopale. Ee wai waka dupa ita minao, mastet wai doko etete yakane mende.

³² Yakaneaka doko, endakali mendeme mastet wai doko yuunya lyandelyamopa, andao yale jetala, ee wai waka pokatae dupa ita miningi. Dokopa, wangya dupame lumba nelyamo dupanya yakame ipao anda pingimana” lea.

³³ Baame kongali dopale dupame wai pii epe doko endakali dupame sepengeli pyoo lamaiyoo katea.

³⁴ Baame pii mende mee lamaiya naeyao, kongali laowaka lamaiya. Baanya disaipolo dupa-pipa iki katao, kongali dupa pitakanya tenge dupa lamaita pia.