Mak 7:16-35

¹⁶Te olo elalubo bidigo agai te po odiąo.”

¹⁷Agai te we bidi bidalubadi taga peyu, te aga beba pai. Tama aga wali pabo bidi dabego agabolo te begelama wali po digi po page hanalu wali.

¹⁸Tama agai te po augwalibolo wali, “Dage me te homu kolesaga meni eyu, obawe? Te dagego konebewe? Te tigidali bulu badu elaluali nai te bidi tomoba pelama, tego te bidi dwai meda ilibo usu egobeo.

¹⁹Magi baso meni, te tiwai naigo te bidi homu tomoba mu pogobeo. Menio. Te haliga tomoba peyu, tama te di tabo sunumidu naga pelama, tama nosali te di beba paibao,” agai te po wai. Te pode Jisasgo te tigidali haniani tubo nai te wiegi yai da, te habu selebo menio, te po wai.

²⁰Tama agai te po me wai, “Te dwai nai te bidi tomode elaluama tama buluba asobo, tego te bidi meda ilibo dao.

²¹Te bidi tomode, te homu kolesaga tomode pedalubo nai dabe te e tiwai: te dwai homu kolesaga dabe, te penani ebo kolesaga, me te nai wi sabo kolesaga me, te bidi ela mubo kolesaga me,

²²te we sabo dolobo kolesaga me, te mena nai sainu homu hogodama pesa dalobo kolesaga me, te haniani dwai dwai kolesaga me, te tibo po weyu te hagoma ebo kolesaga, me te bidi nogi posobo po wabo kolesaga ebo, me te hagoma homu elama te esela pabo bidigo kolesaga tiwai eyu ebo dao.

²³Te tobage tigidali dwai kolesaga te bidi tomode elaluali te buluba asiyu, tama te bidi meda ilibo dao,” Jisasgo te we bidi dabebolo te po wai.

²⁴Te Jisas hogodama tama aga te bidali bulu taga soali, tama te Tair hanu pedaiba pai. Aga te be me deli tomoba pali, tama aga tede bidibo te bidi me deligo aga koneidali homu yali. Tiali goli aga geme duala sainogo ebo te usu me egobeo.

²⁵Menio. Te we me deligo aga bidibo po odali. Te we aga wegi elaluali, tama te dwai haubo noma bidi te wegide bidai. Tama te we aga polo tama asama, te Jisas sągą pąba kidu sugunagasali.

²⁶Te we aga te Juda hani isąwai we da, aga te Fonisia hani we, te Siria moni tǫde elalubo bulu da. Agai te Jisasba i weyu, te agai wegide elalubo dwai haubo noma bidi sela sąyao wai.

²⁷Tiali goli Jisasgo agabolo po wei ponoyu, te Juda hani dali te Juda hani isąwai bage me te side po digi po begelama tama te po wai, “Dago te wai dabebolo te hasia nai mao. Tiyu dago te wai dabego nai sela tuyu tama te yowi dabeba te nai sąyabuo,” te po wai.

²⁸Tiali goli te wego agabolo po wei ponoyu, te po wali, “Genuai Bidi, nago te mu po obao. Tiali goli te yowi dabego te wai dabego nai kagali te tebol sai dologoba tulalubo nai sela tubo dao,” te wego te po wai.

²⁹Tama Jisasgo agabolo te po wali, “Nago te tiwai po obaso da, teda nage ma geasa pagameo. Te dwai haubogo nago wegi dąų elaluali te taga palio,” te po wai.

³⁰Tama te we aga beba ma geasa pelama, tama aga wai te bet saide pila mubo suali, tama mu tama, te dwai haubogo dąų elaluali te taga pai sualio.

³¹Te silama, megi da Jisas ma hogodama, tama te Tair tǫ pedaide bidali tagalama, tama te Saidon bulu tomodu pai. Tama aga te hanu nogo si elalubo genuai tǫ tedu pelama gana, tama te sigi ąį Galili pąba sabolali.

³²Tama augwaligo bidi me deli agaba selasa asali, te aga olo degebadi te hamena begelebadi yai elaluai. Tama augwaligo Jisasba hanalu te bidiba nogo diąyao po wai.

³³Tama tibaso, Jisasgo aga selasa pelama, tama te we bidi taga soali, tama augwaduba si naga bidigi pali. Tama Jisasgo nogo dani te bidigo oloba munama, tama pesa sąnama, tama te pesa nogo daniba muyu, te bidigo hamenaba muanio.

³⁴Tama agai te dagaluba tonaludu, tama mobo bomonama ponani, te aga homude gela wabo tiwai elama, tama agai agabolo weyu te po wai, “Efata!” po wai. Te tiwai wali, “Nago olo dala pao,” wai.

³⁵Tama te bidigo olo degai elaluali te dala pali, tama aga te hamena panialuali nai te polo taga pali, tama aga po bugagia wai.