Maga Apostoles 19:8-32

⁸Despues si Pablo ya entra na iglesia del maga Judio, y durante el tres meses ta habla le sin miedo con el maga gente acerca del Reino de Dios. Ta discuti y ta precura le convence canila que verdadero el di suyo maga palabra.

⁹Pero tiene de esos bien duro cabeza gayot y no quiere cree. Ta habla pa sila maga palabra insultante na publico contra con el enseñanza acerca di Jesucristo, poreso ya sale si Pablo canila y ya invita con el maga siguidores del Señor man junto con ele. Y todo′l dia ta anda si Pablo discuti canila alla na sala del maestro Tirano, donde le acostumbrao enseña.

¹⁰Ansina ta continua sila discuti por dos años, y el resulta de ese, todo el maga Judio y el maga Griego quien ta queda na provincia de Asia, ya puede gayot oi el mensaje acerca del Señor.

¹¹Dios ta hace gayot maga milagro por medio di Pablo.

¹²Tiene del maga gente ta pasa na cuerpo del maga enfermo el maga pañuelo o ropa que ya agarra ya si Pablo, y ya queda gayot sila bueno, y hasta el maga demonio ta sale na maga cuerpo del maga gente.

¹³Tiene maga Judio surujano ta travesa gayot na maga donde donde lugar para icha afuera el maga demonio na cuerpo del maga gente, y tiene de esos amo el siete hijo di Esceva. Tiene vez ta precura sila usa el nombre del Señor Jesucristo para hace ese. Ta habla sila con el maga demonio, “Ta ordena came cañino sale na nombre di Jesucristo acerca di quien si Pablo ta predica.”

¹⁵Pero el demonio ya habla canila, “Conoce ya yo con Jesus y con Pablo, pero si para cañino, quien ba camo?”

¹⁶Despues aquel gente quien tiene demonio na cuerpo ta ataca gayot con el maga surujano y ya gana canila. Ya sopla gayot bueno bueno, y el resulta de ese ya sale sila na casa corriendo, herido, y desnudo.

¹⁷Cuando el maga Judio y el maga hende-Judio na Efeso ya oi el cosa ya sucede, ya tene gayot sila miedo, y ya dale gayot sila grande honor con el nombre del Señor Jesucristo.

¹⁸Mucho del maga gente quien ya queda creyente ya confesa na publico que sila estaba ta sigui secretamente el trabajo de surujano.

¹⁹Tiene tamen de esos que estaba ta practica el trabajo de surujano, ya lleva el di ila maga libro acerca del di ila trabajo y ya quema ese maga libro na publico. Cuando ya suma sila el precio del todo el maga libro quemao, ya alcanza ya ese el valor de cincuenta mil moneda de plata.

²⁰Por causa de ese maga suceso, el Señor ta demostra el di suyo poder, y el mensaje acerca del Señor ta man calayat y ta continua convence con el maga gente por causa del poder de ese mensaje.

²¹Despues de aquel maga suceso, ta planea tamen si Pablo travesa na Macedonia hasta na Grecia para anda na Jerusalem, cay ya habla le, “Al acabar yo visita na Jerusalem, necesita gayot yo anda na Roma.”

²²Poreso ya manda le na Macedonia dos del di suyo uban, si Timoteo y si Erasto, quien ta trabaja junto con ele, pero ele ya esta pa por cuanto tiempo na Asia.

²³Aquel mismo tiempo ya tene grande estorbo na Efeso por causa del enseñanza acerca di Jesucristo,

²⁴cay tiene un platero, el nombre si Demetrio, quien ta hace maga modelo de plata que ta representa el templo del diosa Artemis. Buen negocio gayot este con Demetrio y con el di suyo maga trabajador.

²⁵Poreso ya llama le con todo el maga gente ta hace de este clase de trabajo, y ya habla canila, “Maga amigos, sabe ustedes bien bueno gayot el di aton fortuna por causa de este trabajo.

²⁶Ya puede man tamen ustedes oi y mira el cosa si Pablo ta hace. Ta habla gane le todo ese maga dios, hecho lang de gente, hende maga verdadero dios. Aqui na Efeso pati na provincia de Asia, mucho gayot gente ya queda convencido que el cosa le ta habla, deverasan gayot.

²⁷Tiene el posibilidad que este di aton negocio ay tene mal nombre, y hende lang el templo del gran diosa Artemis ay queda nuay sirve, pero hasta su grandesa temen ay queda nuay mas valor. Aquel diosa con quien desde antes pa ta adora todo el maga gente de Asia y hasta el entero mundo.”

²⁸Cuando el maga gente ya oi el maga palabra di Demetrio, ya queda gayot sila bien rabiao y ta grita pa, “Viva si Artemis de Efeso.”

²⁹Cuando este noticia ya man calayat na entero pueblo, el manada de gente de Efeso ya queda atarantao, y ya agarra sila con Gayo y con Aristarco. Sila dos amo el maga uban di Pablo quien ya sale de Macedonia. Despues ya corre gayot el manada de gente llevando con esos dos na lugar donde el publico ta hace miting.

³⁰Si Pablo quiere tamen era conversa con aquel grupo, pero el maga siguidores del Señor ya sangga con ele para no anda.

³¹Y masquin tiene del maga oficial de Asia quien el maga amigo di Pablo, ya envia mensaje con ele suplicando que no mas entra aquel lugar donde ta hace el miting.

³²Mientras nuay pa principia el miting, bien alboroto gayot y tiene del maga gente ta grita por alguna cosa y tiene del otros ta grita acerca de otro cosas, pero el mayor parte di ila no sabe si porque sila talla.