Ma:tiu 28:1-17

¹Mo Diu wanda꞉halina꞉ hoto pitu haemeke nate (Sa꞉ta꞉de) paeyeketa꞉ mo Sande da siki panake ka꞉la꞉ polo haena꞉ hande Ma꞉kadala wanda꞉ Meti make Meti ma꞉nda꞉ yaapoma꞉ mo hande Yesu hoiyeke lapa꞉ toopi apa꞉nda꞉ handuluekema꞉ mo lapa꞉ teke pa꞉ta꞉ opolo pu alu pitolo haena꞉ta꞉

²koto kone yu momeni tieke piekeme. Kutu pieke taapuna꞉ta꞉ Tekehali Koda꞉na꞉ enisolo homeke oli hepeni nanema꞉ hola꞉pa꞉niao a꞉pa hata꞉ mo hande apa꞉nda꞉ kake a꞉mbeeke toopi londolo pete pete peaota꞉ mo toopi manda ipiki pitiekeme.

³Mo enisolo ipika꞉ leke popelekena꞉ta꞉ ti tekele tekele leeke ale peaota꞉ ipika꞉ dau make hake pea yahapima꞉ handeekeme.

⁴Kutu piekeeki handolo hata꞉ta꞉ mo hande hali lapa꞉ sa꞉sa꞉ pitolo handeteke haemeke haliwekima꞉ paala꞉ tieke pitolo pututu liaaso hata꞉ homeke toko leke wia yapemekeme.

⁵Kutupa mo hande enisoloma꞉ hande wanda꞉ yaapo pa꞉ta꞉ alota꞉ Ipilikana꞉ma꞉ paala꞉ma꞉ na homa꞉pepee. Mo hande tamendiao lia꞉ hali Yesu handuluekema꞉ ipilipime hone witolome.

⁶Ipikita꞉ do pa꞉ta꞉ na ula꞉me. Ipika꞉ amba꞉ hande la꞉ wia꞉ tupa꞉ kone tiao pa꞉la꞉me. Ipika꞉ hande toko hoimiki lapa꞉ da panda꞉ doma꞉ a꞉pa handa꞉pe.

⁷Koto ekina꞉ ame do siki a̱i̱ koto kone pua ipika꞉ disaipolo haliweki pa꞉ta꞉ alota꞉ Yesuta꞉ mo hande naku pa꞉ta꞉ pa da꞉taa tiao ameta꞉ mo Ka꞉lili nane ipiki amba꞉la꞉ pulu hala꞉me. Ikana꞉ma꞉ ipiki koto pa꞉ta꞉ handilimikie lapa꞉peke la alota꞉ Do la kitolo pita꞉ hone na yonka꞉lapa꞉peke leekeme.

⁸Koto pi lo paeyeke opuaata꞉ mo wanda꞉ yaapoma꞉ pututuma꞉ homa꞉peke pateta꞉ ta꞉na꞉ tieke make homa꞉ paleke a̱i̱ koto kone mo lapa꞉ mina꞉pa꞉lao mo disaipolo tonu pa꞉ta꞉ la haluekema꞉ a̱i̱ a̱i̱ya pepekeme.

⁹Ipilikana꞉ma꞉ mo pimanu loluekema꞉ a̱i̱ya pepekepate pota꞉ hopikina꞉ penkilipao Yesu manda꞉hande pipikime. Ipikana꞉ma꞉ alota꞉ Epeke da ka꞉la꞉paaso leekeme. Ipiliki Yesu tekepa꞉ta꞉ a꞉pa ipika꞉ anke teke pa꞉ta꞉ howa lopolo panda꞉ pitolo hata꞉ ipikina꞉ pi laepekeme.

¹⁰Yesuma꞉ ipiliki pa꞉ta꞉ alota꞉ Paala꞉ma꞉ na homeke pua mo hande ya kame tonu pa꞉ta꞉ta꞉ Oli Ka꞉lili nane puaata꞉ I̱ta꞉ koto pa꞉ta꞉ handilimikie lea꞉me laa lawapa꞉peke leekeme.

¹¹Koto wanda꞉ yaapo la꞉ka꞉la pulu haena꞉ta꞉ mo hande lapa꞉ handeteke haemeke mandane ami haliwekima꞉ mo hande Diutuseleme daoni nane paa la꞉ka꞉la puaata꞉ hande yeni peao hayeke you haliweki pa꞉ta꞉ mo hande pieke yeke hau paeyao la halemekeme.

¹²Koto ekina꞉ mo yeni peao hayeke you haliwekima꞉ koto lemeke pimanu opuaata꞉ ikana꞉ma꞉ mo hande tondiki haliweki ame̱le̱ mombelemekeme. Kota꞉ momba꞉la pi hotu tikitiki yaaso hata꞉ta꞉ mo hande lapa꞉ yu pamba haemeke ami haliweki pa꞉ta꞉ta꞉ mani tieke aneke halolo

¹³alota꞉ Wanda꞉hali paeyaoma꞉ opina꞉ dupa lelimikie. Nikana꞉ma꞉ u poluma꞉ nane ipika꞉ disaipolo haliweki a꞉pa hande toko pake mea pelememe lelimikie.

¹⁴Kutupa koto lelimi pi a꞉nda꞉ mo Kapomani tiekema꞉ opia꞉ka꞉na꞉ta꞉ kota꞉ nikana꞉ma꞉ ika꞉ hoke hau na peleme ekita꞉ ipiki pa꞉ta꞉ epeke tupa꞉ pua la halumekema꞉ hone na wia꞉pa꞉peke lemekeme.

¹⁵Hande ami haliwekima꞉ mo mani meata꞉ iki pa꞉ta꞉ lapa꞉peke laa la haleeke tupa꞉ kone pua la꞉tia tia pimikime. Kutu pimiki handaata꞉ koto pita꞉ma꞉ kini pu meata꞉ ame do make mo Diu tapake tukiki pa꞉ta꞉ta꞉ koto pi kone paa la꞉ alualu pu halememe.

¹⁶Hande 11 disaipolo haliwekita꞉ mo Ka꞉lili opolo puaata꞉ Yesuma꞉ Pua꞉pekee laa amba꞉ la꞉ wieke peiyene pa꞉ta꞉ pemekeme.

¹⁷Koto pa꞉ta꞉ta꞉ Yesu hosiki pa pate leke hayekeeki ikana꞉ma꞉ handaata꞉ ipikina꞉ pi laemekeme. Pate mandane haliwekima꞉ta꞉ hone yaapo wimikime.