1Yesuma꞉ mo tembolo da mina꞉pa꞉lao pulu haena꞉ ipika꞉ disaipolo haliweki a꞉pa ipiki pa꞉ta꞉ alota꞉ Do tembolo da a꞉eleme tupa꞉ a꞉pa handa꞉e lemekepate
2Yesuma꞉ ika꞉ pi hombo peaaso alota꞉ Ikana꞉ma꞉ do da a꞉ela꞉ alemanu paeyao handelemepe. I̱ma꞉ iki pa꞉ta꞉ ota꞉ pi alome. Do toopi epeke tupa꞉ atula atula pea uleke handoloma꞉ tupa꞉ta꞉ homeke ma꞉nda꞉ ota꞉ na wilieke. Koto toopi ota꞉ paeya tapaota꞉ mea holao tankulupu bao aneya moneya pea wilieke alome leekeme.
3Koto hoki naneta꞉ Yesuma꞉ mo Olipi pote manda pitina꞉ta꞉ ipika꞉ disaipolo haliwekima꞉ a꞉mbao lota꞉ pitolo alota꞉ Nakana꞉ma꞉ mo hande le pita꞉ handima꞉ opolo ipilia꞉pe. Kutaa mo naka꞉ paa la꞉ka꞉la epolo peleeki pita꞉ do yu ya paelo pa꞉la꞉eki yaapo telipina꞉ teke pa꞉ta꞉ ya꞉lia꞉ ekita꞉ eki patehau pilia꞉ ekima꞉ niki walia꞉pe lemekeme.
4Yesuma꞉ ika꞉ pi hombo peaaso hata꞉ alota꞉ Ma꞉nda꞉ma꞉ iki pa tupa꞉ hatuku puaama꞉na꞉ma꞉ wopu handeteke hapa꞉peke.
5Hali wopuma꞉ ya biki la꞉ paleke ipulu alota꞉ I̱ta꞉ ota꞉ Ketisoe lelimikie. Koto lelimi ekima꞉ta꞉ wanda꞉hali wopu makealimikie alome.
6Ikana꞉ma꞉ a꞉nda꞉ tiekemanu pita꞉la꞉me lelimi ota꞉ pimanu make pa hameke pi lelimi ekimanu make wopu opulu pelemepate ikana꞉ma꞉ pa pomoma꞉ na homa꞉pa꞉peke. Kutupiki hau manuta꞉ ota꞉ epolo pa꞉la꞉pate pa mo yu ya paelo pa꞉la꞉ ekina꞉ patehau dia꞉me.
7Kenke homekena꞉ ami tiao pua kenke ma꞉nda꞉na꞉ ami tapu a꞉nda꞉ pilimikie. Mo kini hali homekena꞉ ami tiao kini hali ma꞉nda꞉na꞉ ami tapu a꞉nda꞉ pilimikie. Kutu pilia꞉ toma꞉na꞉ta꞉ kenke yu paeyao pa꞉ta꞉ tea꞉ki pambo make yu momeni tiekemanu make opolo ipilieke.
8Kutu piki patehau manuta꞉ mo hande wanda꞉na꞉ weki hoki kini pea nala꞉eki manda꞉ pilieke.
9Koto haumanu pilia꞉ toma꞉na꞉ta꞉ mandane haliwekima꞉ iki pa꞉ta꞉ ka꞉nda꞉manu ku make lu puluekema꞉ iki da꞉ka꞉pa꞉ mina꞉ bepi pilimikie. Ikita꞉ yaeki haleme ekina꞉ wanda꞉hali wopuma꞉ iki honditi wopu pilimikie.
10Koto mandake pita꞉ma꞉ koneta꞉ mandane Koda꞉ pa꞉ta꞉ hone tulaleme wanda꞉hali ika꞉ hone tulalemeeki mina꞉pa꞉lao kialimikie. Kutu pilimi wanda꞉hali pua hata꞉ta꞉ ika꞉ yankekemanu ame̱le̱ honditi pu alualu pitolo ika꞉ ika꞉ kone lina꞉ walo a꞉nda꞉ lomba꞉tiki pu alualu pilimikie.
11Koto mandake dina꞉ koneta꞉ yayapiki pi walaasa꞉ potopede haliweki wopu tiaaso hata꞉ wanda꞉hali wopu makealieke.
12Kenke paeyao pa꞉ta꞉ hoke hoke haumanu opa daeyatiki pea꞉ka꞉na꞉ta꞉ kota꞉ wanda꞉halina꞉ a꞉ta꞉ma꞉ homa꞉la꞉ hau manuta꞉ alupilieke.
13Kutu polo haena꞉ kone pa mo hone tulaasa꞉ some epima꞉ ota꞉ hone tulaatiki pu haya꞉ka꞉na꞉ta꞉ kota꞉ koto someta꞉ da꞉ta haena꞉ tamba꞉ milieke.
14Kutaata꞉ do Koda꞉na꞉ Kilu Tombuao Hala꞉ ekina꞉ Pi Seliapota꞉ kenke honiki honiki paeyao pa꞉ta꞉ haleme wanda꞉halima꞉ opina꞉ walo pelimikie. Ana꞉na꞉ walo paeyaalimi toma꞉na꞉ta꞉ kota꞉ mo paelo pa꞉la꞉ nate opolo ipilieke.
15Amba꞉ potopede hali Da꞉nielema꞉ ipilieke laa la꞉ wieke yeke hoke hoeyaapeke yeke ale ma꞉nda꞉ handilimikie. Koto aleta꞉ mo hande hoke ale ma꞉nda꞉ wia꞉peke na yeke yako piki da panda꞉ tiao halia꞉eki handilimikie. Do wape yata꞉pa꞉la꞉ halima꞉ hone ota꞉ wopu wina꞉e.
16Koto dina꞉ta꞉ mo Diudia nane halo peleme wanda꞉halita꞉ mo potemanu pa꞉ta꞉ pindipa pena꞉e.
17Kutupa da holuna꞉ halia꞉ halima꞉ hola꞉pa꞉niao ala꞉ta꞉ ala꞉ta꞉ mea poluekema꞉ da tukiki pa꞉ta꞉ na honda꞉ pambena꞉e.
18Ena꞉ halia꞉ halima꞉ make ipika꞉ dau mea poluekema꞉ hoki la꞉ka꞉la꞉ neao na pa꞉na꞉e.
19A꞉ta꞉e. Koto nate tukiki pa꞉ta꞉ manuta꞉ weki pitiki wanda꞉wekima꞉ make andu halimi wanda꞉wekima꞉ make ka꞉nda꞉ tieke milimikie.
20Koto pilia꞉ dina꞉ta꞉ mo kosa꞉ki make hoto pila꞉ nate make na ipu pina꞉ma꞉ yeni wopu pea꞉pa꞉peke.
21Koto nate manuna꞉ ka꞉nda꞉ma꞉ homa꞉la꞉eki manuta꞉ ota꞉ hone matekeeki ipilieke. Amba꞉ hande Koda꞉ma꞉ ala꞉ta꞉ ala꞉ta꞉ kini pea wepia wina꞉ leeke dina꞉ kini pu mea a꞉pa ame do haloma꞉ dina꞉ make wanda꞉halima꞉ kutupiki ka꞉nda꞉ ma꞉nda꞉ ota꞉ na handemekeme. Wetepe koto hoki nane make kutu piki ka꞉nda꞉ma꞉ homa꞉la꞉eki ma꞉nda꞉ na ipilieke.
22Koto natena꞉ wanda꞉hali paeyao homolo poloma꞉pate Koda꞉ma꞉ koto nate mandane ekimanu tunkulina꞉ la꞉la꞉me. Pa ekipeke ipika꞉ talopu ma꞉la꞉ wanda꞉hali pa꞉ta꞉ hone wiaata꞉ koto natemanu tunkulina꞉ la꞉la꞉me.
23Koto natena꞉ iki pa꞉ta꞉ ma꞉nda꞉ma꞉ alo alota꞉ Handa꞉pe. Ketiso do ane do hala꞉ o mo nane mo hala꞉ lemeka꞉na꞉ta꞉ na opua꞉pa꞉peke.
24Yayapiki Ketisomanu make yayapiki pi la꞉ mea halo hala꞉ haliweki make a꞉pa mo hande Koda꞉na꞉ ma̱leke lila꞉ wanda꞉hali pa nane hatuku mea puluekema꞉ yeke iki makeaapeke ya꞉la꞉o laa makea handuluekema꞉ na handeke hau tieke tiekemanu make wele pita꞉la꞉ ekimanu make walimikie.
25Iki paeyao opua꞉pe. Koto haumanu paeyao a̱i̱ na epeke haena꞉ I̱ma꞉ iki pa꞉ta꞉ amba꞉ la kolome.
26Pa mandane wanda꞉halima꞉ make iki pa꞉ta꞉ alo hata꞉ Ei. Ipikita꞉ oli hapu hala꞉ alena꞉ hala꞉me lemeka꞉na꞉ make koto pa꞉ta꞉ na pua꞉peke. O pa ma꞉nda꞉ma꞉ alota꞉ Ipikita꞉ do pa꞉ta꞉ panka꞉ pila꞉me lemeka꞉na꞉ make ika꞉ pi ota꞉ na opua꞉pa꞉peke.
27Mo Wanda꞉halina꞉ Eiyekena꞉ epolo pa꞉la꞉ ekita꞉ mo hande ti tekele pita꞉la꞉ ekima꞉ mo ya paeyao olina꞉ onina꞉ pa̱a̱ tieke pita꞉la꞉ tupa꞉ opolo ipilieke.
28Ma꞉nda꞉ handopa꞉ta꞉ ma꞉na꞉ hoteke lupa ula꞉ ale nina꞉ta꞉ wapukini mombolo hala꞉me.
29Koto ka꞉nda꞉manu milimi natemanu paelia꞉ hoki naneta꞉ oli natema꞉ timba꞉ lo pamba hao make sumba꞉na꞉ pa̱a̱ make na pilieke. Kutaa oli yana꞉ hombulanka꞉manu make ya nane hao honda꞉ papa pu lopa꞉tiki pilieke. Kutaa oli ya nane wele peaasa꞉ ekimanu make la꞉ma꞉ la꞉ma꞉ pupa wilimikie.
30Kutu pilia꞉ natena꞉ta꞉ mo Wanda꞉halina꞉ Eiyekena꞉ epolo pa꞉la꞉ patehauta꞉ oli yana꞉ peneme yaalieke. Kutu pilia꞉eki wanda꞉hali paeyaoma꞉ handolo hata꞉ e̱ tieke lelimikie. Ikana꞉ma꞉ mo Wanda꞉halina꞉ Eiyekema꞉ koa manda ha mea ipulu hata꞉ ipika꞉ wele wotu pita꞉la꞉eki make pa̱a̱ tieke pita꞉la꞉eki make mea opolo ipilia꞉eki handilimikie.
31Kutu pilia꞉ dina꞉ta꞉ bu kanake tieke homekema꞉ e̱ tieke alo haena꞉ta꞉ ipikana꞉ma꞉ oli nate pamba꞉la꞉ opa꞉la꞉ yaapo nane make olina꞉ onina꞉ yaapo paeyaona꞉ haleme ipika꞉ ma̱leke lila꞉ wanda꞉hali momba꞉lawaena꞉ ipika꞉ enisolo tonu tapaa tapaa pilieke.
32Nose tima꞉ pu hala꞉eki hone wia꞉pa꞉peke leekeme. Ipika꞉ paleke ada꞉ pea katake tindiki lia kelepea꞉ka꞉na꞉ta꞉ kota꞉ bapi ipuluekema꞉ pita꞉la꞉me hone u halememe.
33Kutupa make hande loa꞉ alemanu ipula꞉eki handemeka꞉na꞉ta꞉ tekepa꞉ta꞉ ya꞉la꞉me laa pota꞉ kake pa꞉ta꞉ a꞉pa hala꞉me hone wia꞉pa꞉peke.
34Iki pa꞉ta꞉ ota꞉ pi alome. Do haleme wanda꞉hali paeyao na homeke halimi pita꞉ I̱ma꞉ loa꞉ alemanu paeyao amba꞉ ipilieke leekeme.
35Oli ya do kenke yaapota꞉ paelo pa꞉la꞉pate yaka pi lo haloeki manuta꞉ na paelieke laa leekeme.
36Kutu piliepate hande loa꞉ nate epolo pa꞉la꞉ ekita꞉ ma꞉nda꞉ma꞉ na handa꞉la꞉me. Nate handopa꞉ta꞉ haena꞉ epolo pa꞉la꞉ ekita꞉ make ma꞉nda꞉ma꞉ na handa꞉la꞉me. Oli ya nane haleme enisolomanu make Eiyekema꞉ make na handoloma꞉pate Atekema꞉ homeke handa꞉la꞉me leekeme.
37Hande Noana꞉ natena꞉ pimiki tupa꞉ta꞉ hande Wanda꞉halina꞉ Eiyeke epea꞉ka꞉na꞉ make mandake hau kone pilimikie.
38Ikali tala꞉eki tieke a̱i̱ na epeeke toma꞉na꞉ta꞉ wanda꞉halima꞉ ne ikalimanu na꞉moneatiki pu wanda꞉ hapu moneatiki pu pua꞉tiki puaata꞉ mo Noa kawaso pa꞉ta꞉ honda꞉ pambeeke dina꞉ naemekeme.
39Koto wanda꞉halima꞉ta꞉ wetepe epolo pieke hau manuta꞉ hone na wiki pa ika꞉ hone pieke haumanu pua꞉tiki pulu haena꞉ hande ikali tieke taa ipulu iki paeyao handa꞉pa꞉la꞉ mea peekeme. Mo hande Wanda꞉halina꞉ Eiyeke opolo ipuluta꞉ koto piekeeki kone pilieke.
40Koto toma꞉na꞉ta꞉ yaapo halima꞉ homeke e pokolo halipipi alena꞉ta꞉ homeke hali minolota꞉ ma꞉nda꞉ta꞉ mina꞉pa꞉lalieke.
41Kutupa yaapo wanda꞉ma꞉ palaowa dakole peaaso halipipi alena꞉ta꞉ homeke wanda꞉ honda꞉ minolota꞉ ma꞉nda꞉ta꞉ mina꞉pa꞉lalieke.
42Koto ekina꞉ta꞉ ikana꞉ma꞉ta꞉ u na polu pitiki yu wia hapa꞉peke. Pa ekipeke mo ika꞉ Tekehalina꞉ epolo pa꞉la꞉ dita꞉ iki matelememe.
43Da tekehali homekema꞉ pake nala꞉ halima꞉ pake noluekema꞉ do natena꞉ opolo ipilieke hone wia꞉ka꞉na꞉ yoluta꞉ kota꞉ ipika꞉ da yamba꞉laama꞉na꞉ alo u na piliki paa tiao yu wia halo pia꞉me.
44Ikana꞉ma꞉ make koto pieke tupa꞉ kone hoto paeyao tikitiki yao hapa꞉peke. Pa ekipeke. Mo Wanda꞉halina꞉ Eiyeketa꞉ ikana꞉ma꞉ dupita꞉ma꞉ ipilieke hone na wilimi natena꞉ opolo ipilieke.
45Hande hone wopu wia pi wopu opua epeke e poko hala꞉ someta꞉ epiyekea. Kutu piki halita꞉ mo e teke halima꞉ ipika꞉ e pokaaseme mandane haliweki handeteke hawaaso hata꞉ ika꞉ nemanu ota꞉ epeke tupa꞉ hala꞉tiki pina꞉ mea halieke.
46Kutupa hoki nane nate ma꞉nda꞉na꞉ hande you hali paa la꞉ka꞉la a꞉pa mo hande e pokaena꞉ mea hao pea꞉ halima꞉ ipika꞉ lea꞉ pi paeyao opua ota꞉ epeke tupa꞉ pea꞉tiki pilia꞉eki a꞉pa handea꞉ka꞉na꞉ta꞉ kota꞉ koto e pokaasa꞉ somema꞉ta꞉ ta꞉na꞉ma꞉ homa hapeke yelieke.
47I̱ma꞉ iki pa꞉ta꞉ ota꞉ pi alome. Koto you halima꞉ kutu piki someta꞉ ipika꞉ e ala꞉ta꞉ ala꞉ta꞉ paeya tapao handeteke haena꞉ mea halieke.
48Kutu pilia꞉pate mo e pokaasa꞉ somema꞉ hone witolota꞉ Hande ya teke halita꞉ a̱i̱ na a꞉pa꞉peke ya꞉lieke hone witolo hata꞉
49ipika꞉ e mandake pokaaseme haliweki lu yombua꞉tiki pu make hoke ikali nemeke tapake ame̱le̱ apa꞉tao ne ikali naa kea꞉tiki pu haya꞉ka꞉na꞉ta꞉
50kota꞉ koto somena꞉ you halita꞉ ipilieke hone na wilia꞉ nate o tikitiki na yao halia꞉ dina꞉ ipilieke.
51Epia꞉ka꞉na꞉ta꞉ kota꞉ mo you halima꞉ koto some mea ota꞉ hoeyaaso hata꞉ mo hande makeaasa꞉ haliweki mea tapaaleke pua haleme pa꞉ta꞉ ipiki make mea lopaalieke. Koto pa꞉ta꞉ hata꞉ta꞉ ikana꞉ma꞉ e̱ tieke laa kake lenkene latiki pu halimikie.
