MƐBORIMƐ WÉÌTÌ 8:2-17 in Ditammari

² Nkémmú okpɑ̀ɑ̀tì dɑ nɑ́ɑ́ ntì, ɑ ò dɔúnnɛ̀ dìì nùù Kuyie nyììkɛ̀ di kpɛ́í.

³ A bɑ́ɑ́ ò yóu mɛcɑ̃ɑ̃, ɑ bɑ́ɑ́ kpénkùnnɛ ɑ to mɛdɔɔ̀rìmɛ̀ yɛimɛ mɑmɛ̀ miɛkɛ okpɑ̀ɑ̀tì í dɔ́mɛ̀, kɛ yɛ̃́ kòò dɔ́mɛ̀ ò yóó mɛ̀ ndɔɔ̀mɛ̀.

⁴ Kòo kpɑ̀ɑ̀tì bɛ́i ntì tiǹti we nnɛ́ yóó ò bekɛ kɛ tú ɑ dɔɔri bɑ?

⁵ Wèè yìé nyitié nhò í tɑɑ̀ tinɑ́ɑǹtì miɛkɛ. Mɛciì nyiɛ̀ nyɛ̃́mu kɛ dò ntibeéntì kó dimɔ̀nnì bo.

⁶ Kɛ yɛ̃́ bɑ́ dɛ̀ nɛ̀ dɛ kó dimɔ̀nnì ndimɛ̀, nɛ̀ dɛ kó tibeéntì kɛ yɛ̃́ mɛyɛi mmɛ̀ɛ̀ bɑ̀ɑ̀ onìtì mɛ í sénnímɛ̀.

⁷ Ò mɛ nyí yɛ̃́ tìì yóó tuɔkɛní. We nnɛ́ yóó ò nɑ̀kɛ́ dɛ̀ yó ndòmmɛ̀.

⁸ Òmɔù í te o fòmmu òmɔù mɛ nyí yɛ̃́ o kṹṹ nyiè. Bɛ̀ mɛ nhɔ̃ í mbo mudoò kɛ́kṹnnɛ́ kɛ kò. Wèe yóù, o yonku í ò dɛɛrí.

⁹ Mí mmɛborimɛ wéìtì n wèńní dìì mɔ̀nnì kɛ yɑ̀ dɛ̀ɛ̀ dɔ̀ɔ̀ri kɛtenkɛ̀ ĩ́nkɛ̀, kɛ yɑ̀ onìtì bɑkɛ́mɛ̀ onìtì tɔù koò diinko mɛsémmɛ̀,

¹⁰ kɛ́yɑ̀ bɛyɛibɛ kumɛ̀ kɛ̀ bɛ̀ bɛ̀ kũnnɛ́ kɛ ìtɛ́ Kuyie ncĩ́ɛ̃̀tɛ̀, kɛ yɛ̃̀nko mɛyɛi mbɛ do dɔɔri mɛ̀, dɛ kó dihɛì miɛkɛ. Dɛndɛ í dò nkɛ́bɑntɛ́.

¹¹ Bɛnìtìbɛ̀ í yɑu mɛ̀ɛ̀ kpɛ́í mmɛcɑ̃ɑ̃ bɛ yɛi nkó mucɔ̃́ntimu dɛɛ̀ te kɛ̀ bɛnìtìbɛ̀ dɔ́ mɛyɛi mmudɔɔ̀rìmù.

¹² Kòo yɛiwe dɔ̀ɔ̀ri mɛyɛi nsɑ̃́ɑ̃̀, bɑ́ kɛ fòù kɛ mɔntɛ, mí nnɛ́ yɛ̃́ kɛ dò nKuyie nhɔ̃ɔ̃ dɔ̀ɔ̀ mɛsɑ̀ɑ̀ nwèè kù dé, ò kù dé mɛ̀ɛ̀ kpɛ́í nkɛ.

¹³ Bɛyɛibɛ mɛ nyí mɔkɛ diwɛ̀ì, bɛ fòmmu í yóó okɛ̀ mù yóó pɛ̃ɛ̃tóo kufènkù kɔ̃mɛ mmɛ. Kɛ yɛ̃́ bɛ̀ í démɛ̀ Kuyie.

¹⁴ Mɛborimɛ tɛ̃mɛ̀ bomu kɛtenkɛ̀ ĩ́nkɛ̀ mɛ̀ɛ̀ í dò nkɛ́bɑntɛ́. Mɛɛ̀ tu: Bɛnitisɑ̀ɑ̀bɛ̀ mɑbɛ̀ cɔúmɛ̀ bɛyɛibɛ nɑ ncɔú tìì yĩɛ̃ti, kɛ̀ bɛyɛibɛ mɑbɛ̀ cɔú bɛnitisɑ̀ɑ̀bɛ̀ nɑ ncɔú mɛ̀ɛ̀ sɑ̀ɑ̀. N tì m bɛ́i nkɛ tú dɛ̀ í dò nkɛ́bɑntɛ́.

¹⁵ Mɛm̀mɛ kɛ̀ n dɔ̀ ɑ bo mmɔkɛmɛ̀ diwɛ̀ì mufòmmu muù mmiɛkɛ dɛɛ̀ tu dɛsɑ̀ɑ̀rɛ̀. Kɛ yɛ̃́ dɛ̀mɑrɛ̀ í pɛ̃ɛ̃tɛ́mɛ̀ onìtì ɑ bo dimɛ̀ kɛ́yɑ̃̀ kɛ̀ dɛ̀ ndɑ nɑɑti ɑ fòmmu miɛkɛ. Kɑ̀ɑ pĩ́nnɛ̀ ɑ tɔ̃mmú nɛ̀ diwɛ̀ì ɑ fòmmu mumɔu Kuyie ndɑ duɔ́ mmù kɛtenkɛ̀ ĩ́nkɛ̀.

¹⁶ Mɛm̀mɛ kɛ̀ n duɔ́ n yɛ̀mmɛ̀ kɛ bo yĩ́ɛ̃́tɛ́ mɛciì, nkɛ́yɑ̀ bɛnìtìbɛ̀ yɛntotí tú ì kɛtenkɛ̀ ĩ́nkɛ̀. Bɑ́ n yí dɔu kɛyènkɛ̀ nɛ̀ kuyie.

¹⁷ Kɛ̀ ǹ wéntɛ́ Kuyie mpĩ mmùù tɔ̃mmú kó dimɑ̀ɑ̀ kɛ́nsɔ̃́ nhonìtì bɑ́ɑ́ nɑ kɛ́ mù bɑntɛ́. Bɑ́ kòò wɑmmú kɛ ɔ̀u mɛ̀ɛ̀ botí ò bɑ́ɑ́ nɑ, bɑ́ kɛ mɛciì nyiɛ̀ mmɔù tu ò dɛ̀ yɛ̃ ò bɑ́ɑ́ nɑ kɛ́bɑntɛ́ dɛmɔu.