23 Nde o tilinoo e golle makko ndee, o hooti suudu makko.
24 Caggal ɗeen balɗe, Elisabet jom suudu makko oo reedi, dammbii hakke lebbi joy, ana wiya:
25 —Ɗum woni ko Joomiraaɗo waɗani kam nde wattani kam hakkille, ittani kam dukkuru hakkunde yimɓe.
26 E ley lewru Elisabet jeegoɓurdu nduu, Laamɗo neli malaa'ika Jibiriilu e ngeenndi mbiyeteendi Nasaraatu ley leydi Galili,
27 faade e surba mo taanii Daawuuda biyeteeɗo Yuusufu sabbi. Surba oo ana wiyee Mariyama.
28 Malaa'ika oo naati ɗo Mariyama woni ɗoo, wii ɗum: —Aan e jam, keɓuɗo moƴƴere Laamɗo. Joomiraaɗo ana wondi e maa.
29 Haala kaa jiiɓi hakkille Mariyama, darii ana miila ko ngoo jowtaango waawi laataade.
30 Nii malaa'ika oo wii mo: —Mariyama pati hul! Sabi a heɓii moƴƴere iwnde e Laamɗo,
31 a reedan, ndimaa ɓiɗɗo gorko, inndiraa ɗum Iisaa.
32 Oon ɓiɗɗo laatoto tedduɗo, o noddirte Ɓii Laamɗo Toowɗo. Laamɗo Joomiraaɗo hokkan mo laamu maamiiko Daawuuda.
33 O laamoto iwdi Yaakuuba, laamu makko timmataa abada.
34 Mariyama wii malaa'ika oo: —Hono ɗum laatortoo, mi anndaa gorko?
35 Malaa'ika oo jaabii mo, wii: —Ruuhu Ceniiɗo jippoto e maa, baawɗe Laamɗo Toowɗo oo kuurete no ɗowdi nii. Saabe ɗum, ɓiɗɗo mo ndimataa oo noddirte Ceniiɗo, noddirte Ɓii Laamɗo.
36 Haya ƴeew, sakiike maa Elisabet duu ɓamii reedu, taweede mo naywii fuu, mo riman ɓiɗɗo gorko. Ana wiyetenoo mo dimaro, kaa jooni omo woni e lewru makko jeegoɓurdu,
37 sabi walaa fuu ko Laamɗo waawaa.
38 E oon wakkati, Mariyama wii: —Miin, mi korɗo Joomiraaɗo. Yo laatanoram no mbiiru-ɗaa nii. Caggal ɗum, malaa'ika oo witti, seli e makko.
39 E ley ɗeen ɲalaaɗe, Mariyama immii law yehi ngeenndi Yahuudiya ngootiri ngonndi dow baamle kaaƴe.
40 O naati galle Jakariyaa, o jowti Elisabet.
41 Nde Elisabet nannoo jowtaango makko ndee, ɓiɗɗo gonɗo e reedu mum oo dillinii, Elisabet hebbinaa Ruuhu Ceniiɗo,
42 ilinii, wii: —A barkinaaɗo hakkunde rewɓe, ɓiɗɗo mo caaw-ɗaa oo duu yo barkinaaɗo.
43 Miin, ko ngon-mi faa inna Joomam naata galle am?
44 Nde jowtaango maa toɓɓinoo e nowru am ndee, ɓiɗɗo gonɗo e reedu am oo dillinike saabe kuyam.
45 A welii hoore, aan goonɗinɗo ko Joomiraaɗo fodan maa koo laatoto.
46 Mariyama wii: —Yonki am ana yetta Joomiraaɗo,
47 ɓernde am ana heewi seyo Laamɗo Kisinoowo kam,
48 sabi o yurmike kam, miin, korɗo makko lo'uɗo oo. Gila jooni jamaanuuji fuu noddiran kam belɗo hoore.
49 Sabi Jom Baawɗe oo waɗanii kam kulle mawɗe! Innde makko yo seniinde.
50 Yurmeende makko herataa e hulɓe mo abada.
51 O gollirii golleeji mawɗi junngo makko semmbinngo, o saakii mawninkiniiɓe.
52 O ɓoortii kaanankooɓe iwde e laamu mum'en, o toownii leyɗuɓe.
53 O haarnirii yolbuɓe kulle lobbe, o wirfintinii taajiri'en juuɗe ɓole.
54 O faabike Israa'iilankooɓe, jiyaaɓe makko, o yeggitaali yurmaade Ibarahiima e iwdi mum faa abada, hono no o fodanirnoo njaatiraaɓe men nii.
56 Mariyama faɓɓidi e Elisabet ko waarata e lebbi tati, caggal mum, hooti suudu mum.
57 Wakkati ɓeynugol Elisabet yottii, o ɓeyni o heɓi ɓiɗɗo gorko.
58 Taakallemme'en makko e sakiraaɓe makko nani hinnee mawɗo mo Joomiraaɗo waɗani mo oo, ceyodii e makko.
59 Nde cukalel ngel hiɓɓinnoo yontere ndee, ɓe ngari taadude ngel. Ɓe njiɗiino inndirde ngel baaba maggel Jakariyaa,
60 kaa inna maggel jaɓaali, wii ngel inndiree Yaayaa.
61 Ɓe mbii ɗum: —Sii maa fuu walaa inndiraaɗo ndee innde.
62 Ɓe lamndorii baaba maggel muumankoore, homo yiɗi ɓiyum oo inndiree.
63 Jakariyaa lamndii alluwal, winndi e maggal: «Innde maggel yo Yaayaa.» Ɓe fuu ɓe kaaynaa.
64 Oon wakkati fuu, hunduko Jakariyaa yoppitaa, ɗemngal mum humtaa, watti haalde e yettude Laamɗo.
65 Kulol nanngi hoɗuɓe e seraaji ɗii ɓee fuu. Kasen duu ɗum saakii e ley haayre Yahuudiya fuu.
66 Nanɓe ɗum ɓee fuu ndesi ɗum e hakkillaaji mum'en, ana mbiya: «Koɗum ngel cukalel foti laataade?» Sabi ɓe njii baawɗe Joomiraaɗo ana e maggel.
67 Jakariyaa, baaba cukalel ngel, heewi Ruuhu Ceniiɗo, sappii, wii:
68 —Jettooje ngoodanii Joomiraaɗo, Laamɗo Israa'iila, sabi faabike yimɓe mum, soottitike ɗum'en.
69 O waddanii en kisinoowo tedduɗo iwɗo e suudu Daawuuda, kaadime makko oo
70 hono no o haalirnoo e kunduɗe annabaaɓe makko seniiɓe gila arannde nii.
71 O fodii o danndan en e konnee'en men, o ittan en e juuɗe wayɓe men.
72 O ɓannginanan en yurmeende nde o ɓannginani maamiraaɓe men ndee, sabi o miccitike aadi makko ceniindi ndii,
73 ɗum yo hunoore nde o hunanii maama men Ibarahiima. Hunoore ndee woni o hokkan en
