ሉቃሳ 3:3-23 in Gamo

³ ዮሃኒሲ ዮርዳኖሴ ሻፋ ኣቻን ዲዛ ዴሬታ “ኢንቴ ናጋራ ኣቶ ጋናስ ናጋራፔ ሲሚዲ ፃማቄቲቴ” ጊዲ ዮቲዴስ

⁴ ሄሲካ ቃሴ ናቤ ኢሳያሲ “ባዞን ሂዝጊዲ ዋሲዛ ኣሳ ኮሺንቺ ‘ጎዳስ ኦጌ ጊጊሲቴ ባሲዲካ ሎዔꬂቴ።

⁵ ሾባ ቢታይ ዉሪ ኩማና፤ ዙማቲኔ ዙምቡላቲ ዉሪ ዚቂ ጋና፤ ጌላ ኦጌይ ሲቲ ጋና፤ ሞሬቲዳ ኦጌይ ሎዖ ጊዳና።

⁶ ኣሳ ዜሬꬅ ኡባ ኣሺዛ ፆሳ ዎልቃ ቤያና’ ጊዲ ባዞን ዋሲዛ ኣሳ ቃላ ጊሪስ” ጊዲ ባ ማፃፋን ፃፊዳ ማላ።

⁷ ዮሃኒሲካ ኢዛ ኩሼን ፃማቄታና ዪዛ ኣሳስ “ኢንቴኖ ሃ ሾሻ ናይቶ! ያና ዲዛ ፆሳ ሃንቆፌ ሃካና ማላ ኦኒ ኢንቴና ዞሪዴ?

⁸ ኢንቴ ናጋራ ኦሶፔ ሲሚዳይሳ ኤሪሲዛ ኦሶ ኦꬂቴ ‘ኑ ኣዋይ ኣብራሃሜይ ኑስ ዴስ’ ጉስ ኣጊቴ ጊዴስ። ‘ፆሲ ባስ ጊኮ ሃ ሹቻታፔ ኣብራሃሜስ ና ኦꬂ ዴንꬃናስ ዳንዳዒዛይሳ ኤሪቴ’

⁹ ካልታይ ሚꬅ ቃንፃናስ ሚꬃ ፃጶን ዴስ። ሎዖ ኣይፌ ኣይፎንታ ኢታ ሚꬂ ዉሪ ቃንፄቲዲ ታማን ዬጌታና” ጊዴስ።

¹⁰ ኣሳይካ “ሂስቲን ኣይ ኦꬆኒ?” ጊዲ ኦይቺዴስ።

¹¹ ዮሃኒሲካ ኣሳስ “ናምዑ ማይዖይ ዲዛይ ኢሲ ማይዖይ ባይንዳ ኣሳስ ኢሞ፤ ቃሴካ ቁማይ ዲዛይካ ባይንዳዴስ ሻኪዲ ኢሞ” ጊዴስ።

¹² ቃራፃ ሺሺዛይቲካ ፃማቄታናስ ዪዲ “ኣስታማሬ! ኑ ኣይ ኦꬂኖ?” ጊዳ።

¹³ ኢዚካ “ኢንቴ ኣዛዜቲዳይሳፌ ቦላራ ቃራፃ ሺሾፒቴ” ጊዴስ።

¹⁴ ዎታዳራቲካ “ኑኒ ቃሴ ኣይ ኦꬂኖ?” ጊዲ ኦይቺዳ። ኢዚካ “ኦና ሚሼካ ጊዲን ዎልቃን ኤኮፍቴ፤ ቃሴካ ኦናኔ ዎርዶን ሞቶፒቴ፤ ኢንቴ ዳሞዛይ ኢንቴስ ጊዳና” ጊዴስ።

¹⁵ ኣሳይ ዮሃኒሳ ቤዪዲ “ሃይሲ ኪርስቶሴ?” ጊዲ ባ ዎዝናን ሲꬊዴስ።

¹⁶ ዮሃኒሲካ ኡባስ “ታኒ ኢንቴና ሃꬃን ፃማቃይስ፤ ጊዶ ኣቲን ታ ኢዛ ጫማ ቢርሻናስ ቤሶንታ ታፔ ኣꬊዛዴይ ያና። ኢዚ ኢንቴና ፂሎ ኣያናኒኔ ታማን ፃማቃና።

¹⁷ ባሌዛን ዲዛ ካꬃ ጋፌዛፔ ጌሻስ ካꬅ ሱራጊዛ ፒꬃይ ኢዛ ኩሼን ዴስ። ባሌዛ ኩሜꬃ ጌሻና፤ ጊስቴዛ ቃሴ ዲዔን ቆላና፤ ጋፌዛካ ቶዖንታ ታማን ፁጋና” ጊዴስ።

¹⁸ ዮሃኒሲ ኣሳ ሃራ ዱማ ዱማ ዞሬ ቃላራ ሚኒꬄꬂ ዞሪሼ ሚሺራቾ ቃላ ዮቲዴስ።

¹⁹ ጊዶ ኣቲን ጋሊላ ቢታ ሃሪዛ ሄርዶሲ ባ ኢሻ ማቾ ሄሮዲያዶ ኤኪዳ ጊሺኔ ሃራ ዳሮ ኢታ ኦꬂዳ ጊሽ ዮሃኒሲ ኢዛ ሃንቂዳ ጊሽ፥

²⁰ ካሴ ሞሮ ቦላ ሃራ ጉጂዲ ሄርዶሲ ዮሃኒሳ ቃሾ ኬꬃን ዬጊዴስ።

²¹ ኣሳይ ፃማቄቲዳፔ ጉዬ ዬሱሲካ ፃማቄቲዴስ፤ ኢዚ ዎሲሺን ሳሎይ ዶዬቲዴስ።

²² ፂሎ ኣያናይካ ሃራጴ ሚሳቲዲ ኢዛ ቦላ ዎꬊዴስ። “ሳሎፔ ታ ዶሲዛ ናይ ኔና፤ ኔናን ታኒ ኡፋዬታይስ” ጊዛ ቃላይ ዪዴስ።

²³ ዬሱሲ ፆሳ ኦሶ ኦይኪሺን ላይꬃይ ኢዛስ ሄꬑ ታሙ ላይꬃ ማላ ጊዳና። ኣሳይካ ኢዚ ዮሴፌ ና፥ ኤሌ ና፥

³ Yohannisi Yordanoose shaafa achchan diza dereta “Inte nagara atto gaanas nagarappe simmidi xammaqetite” giidi yootides

⁴ Hessika qasse nabe Isayaassi “Bazzon hizgidi waassiza asa kooshinchi ‘Godas oge giigissite baasidikka lo7ethite.

⁵ Shoobba biittay wuri kumana; zumatinne zumbullati wuri ziqqi gaana; geella ogey sitti gaana; moorettida ogey lo7o gidana.

⁶ Asa zereth ubba ashshiza Xoossa wolqa beyana’ giidi bazzon waassiza asa qaala giiris” giidi ba maxaafan xaafida mala.

⁷ Yohannisikka iza kushen xammaqettana yiza asas “Inteno ha shoosha nayto! Yaana diza Xoossa hanqofe haakkana mala ooni intena zoridee?

⁸ Inte nagara oosoppe simmidayssa erisiza ooso ooththite ‘Nu aaway Abrahaamey nuus dees’ guus aggite gides. ‘Xoossi baas giikko ha shuchchatappe Abrahaames naa ooththi denthanas danda7izayssa erite’

⁹ Kaltay mith qanxanas mitha xaphon dees. Lo7o ayfe ayfonta iita mithi wuri qanxettidi taman yeggettana” gides.

¹⁰ Asaykka “Histin ay ooththonii?” giidi oychides.

¹¹ Yohannisikka asas “Nam7u may7oy dizay issi may7oy baynda asas immo; qasseka qumay dizayka bayndades shaakkidi immo” gides.

¹² Qaraxa shiishshizaytikka xammaqetanas yiidi “Astamaare! Nu ay ooththinoo?” gida.

¹³ Izikka “Inte azazettidayssafe bollara qaraxa shiishoppite” gides.

¹⁴ Wotadaratikka “Nuni qasse ay ooththinoo?” giidi oychida. Izikka “Oona miishekka gidin wolqan ekkofte; qasseka oonanne wordon mootoppite; inte damozay intes gidana” gides.

¹⁵ Asay Yohannisa beyidi “Hayssi Kirstoosee?” giidi ba woznan sidhides.

¹⁶ Yohannisikka ubbas “Tani intena haaththan xammaqays; gido attin ta iza caamma birshanas bessonta taappe aadhdhizaddey yaana. Izi intena Xillo Ayananinne taman xammaqana.

¹⁷ Balezan diza kathaa gafezappe geeshshaas kath suragiza pithay iza kushen dees. Baleza kumeththa geeshshana; gisteza qasse di7en qolana; gafezakka to7onta taman xuugana” gides.

¹⁸ Yohannisi asa hara dumma dumma zore qaalara minithethi zorishe Mishiraachcho qaala yootides.

¹⁹ Gido attin Galila biitta haariza Herdoossi ba isha macho Herodiyado ekkida gishshinne hara daro iita ooththida gish Yohannisi iza hanqida gish,

²⁰ kase mooro bolla hara gujjidi Herdoossi Yohannisa qasho keeththan yeggides.

²¹ Asay xammaqettidappe guye Yesusikka xammaqettides; izi woossishin saloy doyettides.

²² Xillo Ayanaykka haraphe misatidi iza bolla wodhdhides. “Saloppe ta dosiza nay nena; Nenan tani ufayettays” giza qaalay yides.

²³ Yesusi Xoossa ooso oykkishin laythay izas heedzdzu tammu laytha mala gidana. Asaykka izi Yoosefe naa, Eelle naa,