1Hụn mẹ ẹ ahụa mmisẹn imẹ ọkịkị eze-kanị w'a kpọ Siza Taịberiasị, ogẹn hụ Pọntus' Paịleti gi wụ Gọvanọ rị a kị Judia—wẹ kebe Izrẹlụ lẹ alị ndị nọkunmẹ n'ẹ ụzọ ẹnọ ogẹn hụ: Hẹrọdụ hụ a kị Galili; Filipu nwẹnẹ ẹ hụ a kị Ituria lẹ Trakọnitisi; Lisanịasị hụ a kị Abilẹni.
2Anasị lẹ Kayafasị wụ ndị-isi nchụ-ẹjan. Ogẹn hụ kẹ oku Osolobuẹ gi bịanị Jọnụ nwa Zẹkaraya imẹ atụ.
3'Ya ọ nọ ghagbamachanrịn ẹgbẹrẹ Iyi Jọdanị, a ma ọkwa—a sị wẹ bịa d'e mẹ mirin-Chuku, gi ẹ ghọsị n'e rogharịgụọ wẹ—kẹni Osolobuẹ hụn ụzọ gbagharị wẹ njọ.
4Ẹrịra kẹ wẹ dọn de ẹ imẹ ẹhụhụọ Azaya onyẹ-amụma, nị, “Olu onyẹ ohu rị a han imẹ atụ, a sị, ‘Kwa nị nị Di-nwọnni-ẹnyi ụzọ; mẹmẹ ni ụzọ a n'o zinrin.
5Wẹ jẹnkọ d'e hukin ọdanmgbugbu ile, mẹ ugu lẹ oke ile hẹnrinsọnmẹ alị-aradan; wẹ jẹnkọ d'e mẹ ụzọ-ngịrịgọ ile zinpụ, mẹ ụzọ-mkpọke ile riẹnpụ —
6ịhịan ile a hụn nzụọpụha Osolobuẹ!’ ”
7Ya Jọnụ nọ rị a gwa igunrun ndị hụ rị a bịa d'e kunrunn'ẹ n'o mẹ wẹ mirin-Chuku oku, a sị, “Igunrun ẹjụ-alị! Onyẹ sị ụnụ gba nị iwe lẹ ọnụma Osolobuẹ lalanị ọsọ?!
8Mịkwọ nị nwan mkpụrụ hụn jẹnkọ d'a ghọsị nị ụnụ e rogharịgụọ! Aghakwọlẹ ni a sị enwẹn ụnụ, ‘Ebraham wụ nẹdi ẹnyi nụ!’ Makẹni, ezioku kẹ m rị a gwakwọ ụnụ, Osolobuẹ sikọ d'a saẹka gi ọmụma ndịnị mẹmẹsọnmẹ ni Ebraham ụmụ.
9Anyụn a rịgụọlẹ nwan ukun-osisi, e che: osisi ọwụlẹ mịlẹni mkpụrụ rị mma, e gbutu w'ẹ, tụ a ye imẹ ọkụn.”
10Igunrun ndị ahụn hụ a sị a, “Kịnị kẹ ẹnyi sịkọ d'e mẹ nwan?”
11Ọ nọ sị wẹ, “Onyẹ ọwụlẹ nwọn ẹwuru ẹbụọ jẹnkọ d'e werịrị ohu ye onyẹ nwọnlẹni; onyẹ ọwụlẹ nwọn ihiẹn-oriri sikọ d'e mẹzikwọ ẹrịra.”
12Ndị a na ụgwọ-isi hụn bịazịkwọ d'e mẹ mirin-Chuku nọ jụ a, sị, “Onyẹ-nkuzi, kịnị kẹ ẹnyi jẹnkọ d'e mẹ?”
13Ọ nọ sị wẹ, “Anakarịlẹ ni ihiẹn wẹ sị ụnụ na.”
14Ndị-agha nọ bịazịkwọ d'a jụ a, sị, “Ẹnyi nwẹn? Kịnị kẹ ẹnyi jẹnkọ d'e mẹ?” Ọ nọ sị wẹ, “Aghazịlẹ ni e gi ẹka-ikẹn a narịn ịhịan ego; ebuokinzilẹ ni ịhịan ọnụ; nị nị ụgwọ-ọrụn ụnụ e jun ụnụ ẹfọ.”
15Makẹni wẹ rị a tụkẹnmẹ ẹnya Kraịstị, Onyẹ-nzụọpụha Hụ Osolobuẹ Tumẹ, hụn o kwe nkwa n'o jẹnkọ d'e zihẹ, lẹzị makẹni wẹ rị a jụ enwẹn wẹ kẹ Jọnụ rọ,
16Jọnụ nọ sị wẹ, “M gi mirin mmaka e mẹ ụnụ mirin-Chuku, kanị onyẹ kanị m lala: efurudẹni m onyẹ jẹnkọ d'a tọpụ eriri akpụkpọ-ụkụ a! O sikọ d'e gi Mmọn-nsọ lẹ ọkụn mẹ ụnụ mirin-Chuku.
17O gi ihiẹn o gi a fụchan ọka: o jẹnkọ d'a fụchanchanrịn ọka ile rị ebe ọ nọ a kụkpọ ọka, kpọn akpụrụ a ye ebe o kpọntọ ọka, kpọnkikomẹ ẹfịfịa kpọnye imẹ ọkụn hụn wẹ ghalẹni e tinyụn.”
18Jọnụ gizi oku ndụnmọdụn bu ọda rịsọnmẹ ichẹn-ichẹn zi wẹ oziọma.
19Jọnụ nọ jụgbọ eze wụ Hẹrọdụ makẹni o jẹn d'a lụma Hẹrọdịasị wụ nwunyẹ nwẹnẹ ẹ lẹzi makẹ eje-ihiẹn ndị ọzọ bu ọda Hẹrọdụ mẹ.
20'Ya Hẹrọdụ nọ mẹdẹ hụn ka njọ ghahanị ikpọkin Jọnụ ye ụlọ-ngan.
21Ogẹn wẹ gi rị e mẹ ịhịan ile mirin-Chuku, wẹ nọzị mẹ Jizọsị. E mẹgụụ w'a 'ya, ebe ọ rị e mẹ ekpere, elu-igwee nọ kpupụ,
22Mmọn-nsọ nọ gi ụdị nduru hidan, bekwasị a. Olu nọ gha elu-igwee sị, “Ịyụ wụ ezi Nwa m; ihiẹn i a sụọka m.”
23Jizọsị rị ihiẹn rịkẹ nwa ahụa iri-kwasị-ọgụn k'o bidọn ọrụn a. Wẹ weri Jizọsị nọkẹ nwa Josẹfụ. Josẹfụ wụ nwa Heli,
24Heli wụ nwa Matitatị, Matitatị wụ nwa Livaị, Livaị wụ nwa Mẹki, Mẹki wụ nwa Janaị, Janaị wụ nwa Josẹfụ,
25Josẹfụ wụ nwa Matatịasị, Matatịasị wụ nwa Emọsị, Emọsị wụ nwa Nahum, Nahum wụ nwa Es'li, Es'li wụ nwa Nagaị,
26Nagaị wụ nwa Maatị, Maatị wụ nwa Matatịasị, Matatịasị wụ nwa Sẹmẹi, Sẹmẹi wụ nwa Josẹkị, Josẹkị wụ nwa Jọda,
27Jọda wụ nwa Johananị, Johananị wụ nwa Resa, Resa wụ nwa Zẹrubabẹlụ, Zẹrubabẹlụ wụ nwa Shịatẹlụ, Shịatẹlụ wụ nwa Neri,
28Neri wụ nwa Mẹki, Mẹki wụ nwa Adi, Adi wụ nwa Kosam, Kosam wụ nwa Ẹmadam, Ẹmadam wụ nwa Ẹh,
29Ẹh wụ nwa Joshụa, Joshụa wụ nwa Ẹliẹza, Ẹliẹza wụ nwa Jorim, Jorim wụ nwa Matitatị, Matitatị wụ nwa Livaị,
30Livaị wụ nwa Simiọnụ, Simiọnụ wụ nwa Juda, Juda wụ nwa Josẹfụ, Josẹfụ wụ nwa Jonam, Jonam wụ nwa Ẹlịakin,
31Ẹlịakin wụ nwa Mẹlịa, Mẹlịa wụ nwa Mẹna, Mẹna wụ nwa Matata, Matata wụ nwa Natanị, Natanị wụ nwa Defidi,
32Defidi wụ nwa Jese, Jese wụ nwa Obẹdi, Obẹdi wụ nwa Bụazị, Bụazị wụ nwa Salụmọnụ, Salụmọnụ wụ nwa Nashọnụ,
33Nashọnụ wụ nwa Aminadabụ, Aminadabụ wụ nwa Adimini, Adimini wụ nwa Anị, Anị wụ nwa Hẹz'rọnụ, Hẹz'rọnụ wụ nwa Pẹrẹzị, Pẹrẹzị wụ nwa Juda,
34Juda wụ nwa Jekọpụ, Jekọpụ wụ nwa Aziki, Aziki wụ nwa Ebraham, Ebraham wụ nwa Tẹra, Tẹra wụ nwa Nahọ.
35Nahọ wụ nwa Serugu, Serugu wụ nwa Reu, Reu wụ nwa Pẹlẹgị, Pẹlẹgị wụ nwa Ẹba, Ẹba wụ nwa Shẹla,
36Shẹla wụ nwa Kaịnanị, Kaịnanị wụ nwa Afasadị, Afasadị wụ nwa Shẹm, Shẹm wụ nwa Nua, Nua wụ nwa Lamẹkị,
37Lamẹkị wụ nwa Mẹtusẹla, Mẹtusẹla wụ nwa Ẹnọkụ, Ẹnọkụ wụ nwa Jarẹdị, Jarẹdị wụ nwa Mahalalẹlụ, Mahalalẹlụ wụ nwa Kenan,
38Kenan wụ nwa Ẹnọsị, Ẹnọsị wụ nwa Sẹtị, Sẹtị wụ nwa Adam, Adam wụ nwa Osolobuẹ.
