1 Hanki maka takisi zgo e'neriza vahe'mo'zane, kumi vahe'mo'za Jisasinte erava'o hu'za naneke'a antahinaku hu'naze.
2 Hianagi Farisi vahe'ene kasegere ugota hu'naza (sraib) vahe'mo'za zamagra'a ke hugantu hugama hu'za, ama nemo'a kumi vahe zmareno nezana zamagrane magopi nene hu'za nehazageno,
3 Jisasi' ana kenona amanage huno fronka kea zmasami'ne,
4 Mago'moma tamagripintima, 100ti'a sipisipi ante'nenifinti mago'mo fanane hanigeno'a inankna hugahie? 99ni'a atrenigeno agupofi mani'nenageno, fananema hu'nemofonku hakeva hakeva huno keno erifore hugahie.
5 Ome keno eri fore huteno, afunte avrenteno muse nehuno,
6 avreno nontema ehnatino'a, roneamokizmine tva'onte'ma nemniza nagara ke hanige'za esageno, anage huno zmasamigahie. Muse nagri ene eme hinketo. Na'ankure fnanema hu'nea sipisipia hago hakena eri fore hu'noe huno hugahie!
7 Hanki nagra amanage hu'na neramasmue. Anahukna kante, 99ni'a vahe'mo'za fatgo hu'nazankiza zmagu'a rukrehe osugahazanagi, mago kumi vahe'mo, agu'a rukrehe hanigeno'a monafina tusi muse nehaze.
8 Jisasi'a mago'ane huno, mago a'mo'ma 10ni'a zgo ante'nenifinti, magoke zgoma fanane hu'nenkeno'a, rampe tavi taginteno noma'a harafi huno hakeva hakeva huno keno eri fore hugahie.
9 Ana a'mo'ma ome ke fore huteno'a, rone'agu'ene, tva'oma'are nemniza vaheku'enena zmasamino, Muse nagrane eme hinketo, na'ankure zgonima fnanema hu'neana hago hakena erifore hu'noe huno hugahie!
10 Hanki amanage hu'na neramasmue, anahu kante mago kumi vahe'mo'ma agu'ama rukrahe'ma nehige'za, Anumzamofo ankeromo'za tusi muse nehaze.
11 Jisasi amanage huno zmasmi'ne, Mago ne'mo tare ne' mofavre znante'ne.
12 Agonesa ne'amo nfa'amofonku anage huno asami'ne, afufeno ka'a nagrama eri snuama'a refko hunka namisnane higeno, nefa'a fenoma'a refko huno znami'ne.
13 Zaza kna omnineno agonesa ne'amo, fenoma'a erino afete moparega vu'no anantega umani'neno, aza osu havi avu'avazante fenozama ome atre eme atre hu'ne.
14 Maka'zama'a atre vgaretegeno, ana mopafina tusi agate'za fore higeno, ana ne'mofona mago'zama'a omnegeno tusi'a agazanku hu'ne.
15 Ana higeno mago mopa agafa nete vuno, erizampi avresigu ome antahigegeno, ana nemo'a afu'a kegva hinogu huntegeno afu kevuma mni'narega vu'ne.
16 Magore huno vahe'mo'za nezana omizageno, afumo'za kohe akru'a nenazafinti nemu hu'naku agesa antahintahi hu'ne.
17 Hianagi agrama knare antahintahima e'nerino'a, agra'a anage hu'ne. Mika'a nenfa eri'za vahe'mo'za rama'a breti nenaze. Hianagi nagra amafi mni'nena nagakura fri'za hue!
18 Nagra otina nenfante vuna, anage hu'na ome asamigahue. Nafanimoka Anumzamofonte'ene kagritera kumi hu'nogu,
19 ne'nimo'e hunka kagra nagrikura osunka, eri'za vaheka'agna hunka navro hu'na hugahue huno agesa antahine.
20 Anage huteno otino nefantega e'ne, ogamanu ne-egeno, nfa'amo negeno asuntaginteno, agareno vuno ome agazafeno, agi antako hu'ne.
21 Ana nehigeno ana ne'amo anage huno nfa'amofo ome asmi'ne, Nafa'nimoke, Anumzamofonte ene kagrite enena kumi hu'noe. E'ina hu'negu ne'nimo'e hunka nagrikura hugara osu'noe. Hanki eri'za vahe'ni'e hunka huo.
22 Hianagi nfa'amo'a kazokzo eri'za vahe'agu anage huno zmasamine, ame hutma hentofa kena erita eme antaninentetma, azampina asane agia anone eme antaninteho.
23 Agaho bulimakamo afovage hu'nesia avreta eme ahetma, krenketa neneta maka'mota musena hamneno.
