23Ma꞉nda꞉ epita꞉ yaka yankeke na haeka꞉na꞉ta꞉ kota꞉ I̱ yaapo a꞉nda꞉ lita꞉la꞉me. Kutupa make hali ma꞉nda꞉ epima꞉ yaka sipisipi momba꞉laaso hano I̱ na tamba꞉ mia꞉ka꞉na꞉ta꞉ kota꞉ ipikana꞉ma꞉ta꞉ panane tolu lita꞉la꞉me leekeme.
24Yesuma꞉ alota꞉ Hali ma꞉nda꞉na꞉ weleke pa꞉ta꞉ pila꞉ hoke temoko ma꞉nda꞉ hama opolu bao yapea꞉ka꞉na꞉ta꞉ mo hapula꞉ alena꞉ pomu lopolo hata꞉ hoto pita꞉peke da panda꞉ ma꞉nda꞉ weita꞉la꞉me. Hoto pita꞉peke ale ma꞉nda꞉ na handa꞉ wia꞉ka꞉na꞉ta꞉ kota꞉ mo hoke temokoma꞉ ipika꞉ kone alota꞉ Yaka hande mina꞉pa꞉lao epoa꞉ da nane paa la꞉ka꞉la polueke laa
25ipikana꞉ma꞉ la꞉ka꞉la pua mo da a꞉pa handilia꞉pate ma꞉nda꞉ na hake wamo pea bao epeke tupa꞉ halia꞉eki handilieke.
26Koto pa꞉leketa꞉ mo hoke temoko pua pa mandane watake hata꞉ hoke temokomanu paeyao hatuku milieke. Koto hoke temoko manuna꞉ hoke hau pita꞉la꞉ ekita꞉ mo ipiki make lu ankulalimikie. Iki paeyao mandake pa꞉ta꞉ a꞉pa halimikie. Kutu pimika꞉na꞉ta꞉ mo halita꞉ amba꞉ta꞉ hoke tupa꞉ hao pelia꞉pate ameta꞉ ota꞉ hoke tupa꞉ hao pelieke laa leekeme.
27Yesuma꞉ koto pi lo paeyeketa꞉ mo wanda꞉hali anka꞉lopuna꞉ pitieke wanda꞉ ma꞉nda꞉ma꞉ anekema꞉ alota꞉ Neke ma꞉nda꞉la꞉ make andu ka꞉la꞉ wanda꞉ta꞉ ta꞉na꞉ma꞉ homolo pa꞉la꞉me leekeme.
28Koto leeke Yesuma꞉ alota꞉ Dia꞉me. Koda꞉na꞉ pi opua pu haleme wanda꞉hali ikana꞉ma꞉ta꞉ ta꞉na꞉ma꞉ wotu homa꞉peke ya꞉la꞉me leekeme.
29Wanda꞉hali wopuma꞉ Yesu a꞉pa momba꞉la hopa꞉liao haena꞉ Yesuma꞉ alota꞉ Ame do natena꞉ haleme wanda꞉halita꞉ hoke wanda꞉hali halememe. Ikana꞉ma꞉ta꞉ mo na handeke patehau ma꞉nda꞉ handuluekema꞉ I̱ pa꞉ta꞉ honke aleme pateta꞉ I̱ma꞉ta꞉ iki pa꞉ta꞉ ota꞉ ma꞉nda꞉siki make na walo polopate mo hande Dionama꞉ patehau piekeeki homeke handilimikie.
30Mo hande potopede hali Dionama꞉ Ninipa wanda꞉hali pa꞉ta꞉ patehau pieke tupa꞉ kone mo Wanda꞉halina꞉ Eiyekema꞉ make ame wanda꞉hali pa꞉ta꞉ patehau pilieke.
31Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ mo hande Siba da yu handeteke hala꞉ kuini wanda꞉ma꞉ tiao hata꞉ ame do natena꞉ haleme wanda꞉halina꞉ hoke hau manuna꞉ ma̱leke lilieke. Ekipeke mo wanda꞉ma꞉ta꞉ mo kini hali Solomonona꞉ epeke hone wotu u tekelepea wala꞉la꞉ pimanu opuluekema꞉ yeke mo kenke honiki ma꞉nda꞉ nane hao epeekeme. Kutu piekepate I̱ma꞉ iki pa꞉ta꞉ alome. Ameta꞉ Solomono ankulala꞉ ale ma꞉nda꞉ a꞉pa꞉la꞉me.
32Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ Ninipa wanda꞉halima꞉ tiao hata꞉ ika꞉ hoke hauna꞉ ma̱leke lilimikie. Ekipeke. Dionama꞉ pi waleeke dina꞉ta꞉ koto wanda꞉halima꞉ ika꞉ hoke hoke haumanu hoki walemekeme. Koto pa꞉la꞉ ekina꞉ I̱ma꞉ iki pa꞉ta꞉ alome. Ameta꞉ Diona ankulala꞉ ale ma꞉nda꞉ a꞉pa꞉la꞉me leekeme.
Luku 11
Luku 11:23-32