1Sapturamba Yesus mongo sembayangna kuwulindam gana, nomba Varisinindrini lohvna, himba Yesusm wainelm vevna. Wo monglava Varisinindva kusovna di, Yesusm nonglalm, osm mani himba ata vevav?
2Doa mongova tendoriniva murapeta avna Yesusinda, uvavulmungil avna, englamongla nesambungu vrevna. Doa Yesus unna no Varisinindm eva katekism, es yimba ningv, detiva sapturava, wo kava sishona vrevavma honi indhanarinimba owaimi? Doaraminimomba es novol velohv, es yimba ningv?
4Doa heva os Varisinindva wohhilivhoana poaita, doa Yesusva engla holowolahamnanamba, os sishona vrena indhanarinimba, wo wolaihangana hemba.
5Wo hev unna no Varisinindm, yenamba sapimka ombpovmka mellava holapetava sapturamba, es hevpa yimba owai vevavma, a ye wolaihavongotami lelnam? Yimba wohvengas vevav eva sapturava.
6No Varisinindva himba owai, eva es Yesusmba moamba opla vrimnita, owainonoa.
7Doa nomba Varisinindva himba mongawulm waihlavna Yesusm, Yesusva hemba nongalvna, himba mimangas aevulthalm vevna vuhe besalla innena aralna novra. Doa hev olhinna hemba.
8Yimba kusovrava kuwulna mendeklina innerava, manam yimba vuhe besallava innena aralna novra avhoavav. Ata homeis yem wolaihaphovm no vuheriniva. Wo kuwulva mendekliva owalmba mongomba das ovratava no hevna inneramba, wo yem nonglavav kuwulva, vuhe besalva he doa kelvhoai. Wo yemba kleiha vrarava, omnavav, hona vuheoa wuleihamno hona indhanarinim. Yemba louva venarava, yimba mulla avhoavav meisra.
10Heva os yimba inneramba garava, yeoa meisra mulla avhoao. Heva hev innena aral ata yemba kleiha vrarava, wo yemba omnavav, seh dom gao vuhe besallam mim. Wo os yena nihilva innena aralva wulvongavav no innenindna novra.
11Himba nomba hevmba iovolvrava, Sesoava si hemba nomba dembrapiha vevav. Wo himba nomba hevmba dembrapuv vevrava, Sesoava henonamba nihilva ivongavav.
12Wo Yesus omnana no indhanarinim, ten hem wainevnam, yimba innemba mendekli dahwol velmba vetava, manam yimba owapevm sehpevm dinindmangas nomba unvav, osmba kamba esesm si waihlavav, owai. Yeoa nom unu, dihuinindm, innehuinindm, monglamungilm, novtitmungilm henom. Osm himba yemba si esesm waihlavavmoa, wo doa Sesoa hev si yemba kanothowol vevav, wo yimba indk vithivav. Si os vevav, nonam hev besal indhanam wolapho vevram pokamarinim.
15Mongo noi indhanarini Yesus ten wonnevnam, himba Yesusna moam hellenamba, wo hev omnana, kava ningv mindnam, Sesoana nemeltindilm saivolm, wo si kava indk vithivav sewonamba no Sesoana innerava.
16Yesus omnana, lehra, heva os si homeis ye kuvhueivm monam. Memba os, kuwulva innemba meilna vevna, wo moamba lohmana vevna hindm hindm hindm, daha ambo hona kana inneram. Doa innemba tangapianamba, wo hevna andranindrinim wolaihangana, omnana, onka vinu hona kana inneram, nomba temba kava doarava das owol vevnamba.
18Heva os indkumbiva no indhanamba himba kongswil ovovna. Mongo ophona, kava petham kovovranamba, wo kava ata nom nonglalm gavav. Manam yimba kamba sahonamba nengmanavav. Wo eva mongo ophona, kava sapim 10pelara sovawol venamba, wo ata kava nom lehwol vevav. Manam yimba kamba sahonamba nengmanavav. Wo eva mongo ophona, kava daipota ango vraiva, wo ata kava provavmoa.
21Doa no andranindriniva hev gana, henga no moamba ingana hevna kuwulindam. Wo no kuwulmba wusprovna, doa henga hev omnana, lelnam gao kotaram, indhanam nembaomana velm. Monara ten lohkaka vevm, eva deuvrinim unu ombandhanam, kana innem hlalm ambra, no indhanamba innehuinind, monglamungil, novtitmungil.
22Doa no andranindriniva ganamba, os wohvena. Hev ganamba kuwulindam, hev omnana, yimba temba kamba ishomniva, kava doa vei, heva os mendah vuhemba lohv, pilivhoavmoa hona yena innerava.
23Wo henga kuwul omnana hevna andranindrinim, yeoa henga gao, indhanam keknam ishunu, ambalm. Dihi ten aevluwul vev osoruvra, kuvundtholla, narava, monapethalla, kava osm nengv, hona kana deuvoa pilivhoara. No indhanamba kava seilva temba das owol vevnamba, wo himba kongswil ovovnam, himba kanamba innemba hlavavmoa eunumbulpetava.
25Doa indkumbi Yesusm pelkleihamnavna sis, doa hev imharavhoanamba, nongalna, unna, himba nomba katindilmba petheinilmba vevrava, himba nomba hevna owalmba pewolehawol vevra, os katindilmba petheinvra. Heoa wuleihara hevna nengavnangva, os katindilmba petheinvav.
27Himba nomba katindilmba petheinilmba vevrava, ombamba vivavmoa, owai, heoa boasna hevna kruse indund iangara, kana dandsra ambvra, os katindilmba petheinvra.
28Indhanariniva nengtava osva, kava deuvm mendeklim velm vev, heoa boasna hevna dim nonglara, es si kava sovawol vevra mani mani mani?
29Eskand himba boalgal milukul wosavrava, wo hena diva huti vevav. Doa indhanamba diaka vevrava, los umnivra hemba, hona indhanariniva deuvpa hivisimbaihana, diva dihi huti venana?
31Mongova olhmomba os men. Mongo kuwul nengvra daosm mongnindmongo, seilva himba boasna os nengvav, katatanamba mindnam, 10,000pelara av, si kava wohhelvakomo vivra. Heva os himba kamba kuvhoawol vivav, himba mindnam, 20,000pelara av. Es hevpa si lohvav honamba?
32Wo no kuwulva henga nengvav, owai, wo noinda wonganamoa daosmba, ambo himba moa pinginna no ungundmba, pioa pivm sehmoa ohovrowolei.
33Yesus unna no olhmonamba, doa hev henga unna, himba nomba yeriniva katindilmba petheinilmba vevrava, heoa hevna dim, wohm wuleihivra, katindilm os petheinvm.
34Wanmba besal, heva os tepepe vetava, osva bes vevavmoa, an hengava suwepavna vrevav beswonamba, owai. No wanmba ombam lohvav, indhanamba dembranga vivav. Hillu pevna aongna.
