Luke 8:11-26

¹¹Jesus angkew ikwer-rnem, “Alakenhaymarlap angka nhenhey aynteyel. Angka Akngey-wenh ranap ntang-apeny. Angka rap ingweram-angkwarr arlperrtyerrem.

¹²Ntang ingwer-rneman artwa wethel ra iwew iwerr arlertek-warlarl. Akngerr iwerr nhenh-apenyarl. Rernem angka Akngey-wenhew awelhem-tangkwel, rernemap Akngey arrkernem. Arrenty ilkwan apetyem, rap angka mwerr-angker ilpertelem, thipelarl ntang arlkwem-apeny. Rerneman ipmelhem-anem, Akngey apentey-angenh, Akngeyelarl nthakenh renh-rnem intem-antey antwerrkey-angenh, arrangkw.

¹³Ntang ingwer-rneman ra iwew ahern apwert-angketyarr-warl. Artekerr-rneman nthakenh aylpey-angenh ahern apwert-angketyarr-warl, arrangkw. Alakenh-anyem akngerrelan angka Akngey-wenh awem, inkwerelhem-anem Akngey-angkwarr, arwa angath-antey. Apmwa ayntentyelan, rernem ipmelhem, angka Akngey-wenh apentey-angenh, arrangkw. Rernem iylpelerrem, angka Akngey-wenh iwerlelpem.

¹⁴Ingwer-rneman ahern arlkerl-angketyarr-apeny. Rernem angka Akngey-wenh awem-tangkwel, apwertel-then ampwal-rnemel-then renh-rnem ilpertelem-anem. Rerneman ament-antey arralty-anem, ilek-ilek mwerr-angkerew iterrem, arrkentel-arlengant anaynteyew. Alakenh-anyem ilek-ilek ingwer-rnemel akwerrng ilpertelem-anem, arlkerl-rnemelarl atherrk-rnem lyapey-angenhelem-apeny. Angka ranap nthakenh renh-rnem rlterrkeley-angenh, arrangkw. Rernemap arraty aney-angenh Akngeyewan.

¹⁵Ingwer-rneman ahern itwelh-itwelh-apenyarl. Rernem angka Akngey-wenh intem-antey antwerrkem. Arraty-angkwarr-anem rernem anem. Apmwarl ayntemeng-arey, rernem angka Akngey-wenh apentem intem-antey. Alakenh-anyemap rernem mwerr-angker warrkerrem Akngeyewan, ntang akngerrarl ahern itwelh-itwelhelan lyapeynem-apeny.”

¹⁶Jesus-el angka ingwer-anem ilenh. “Kwenyel anantherr lyenenty arrtyem. Anantherr nthakenh arlengarrel artey-angenh, nthakenh pantyel artey-angenh, arrangkw. Anantherr irrwerl tywenem, ingwerentyel anaynt arenhey-alhem warl-itwew, rernemap aylpenhey-alhemarl.

¹⁷Kel angka Akngey-wenh alakenh-anyem. Atha akngerr akalty-anthem angka nhelkwerel, rerneman arraty iterl-arey-angenharl. Ingwer-ingwer Akngeyelan angka ikwerenh anaynt ileyenh. Angkan ikwerenh irrtyertel ayntey-angenh, akngerrelan iterl-areyenh-anem.”

¹⁸“Kel arrantherran atyeng mwanty awelh-ayntenh-arey! Akngey arrantherr awem iylparethel, rap arrenhantherrenh akalty-anthem, ilek-ilek iterl-areyew. Arrantherr ikwer awelhey-angenh, rap arrenhantherrenh akwerrngarl ilpertelem. Arrantherrap angkan ikwerenh iylpelerlewem-anem.” Alakenh Jesus angkew ikwer-rnem.

¹⁹Ingwer-ingwer Jesus anenh warl anyent-itwew, akngerr ingwer-rnem akalty-anthenh. Amikw ikwerenh ayteyikw ikwerenh-rnem-then apetyew, renh areyew. Rernemap arleng-antey rtney-alhew, akngerrel arrngelew-wety.

²⁰Ingwerentyel renh ilew, “Amengkw ngkwenh ayteyengkw ngkwenh-rnem-then mpwelheyel ngkweng akethel, ngenh areyew.”

²¹Ran alakenh tyernew, “Angka Akngey-wenharl awelheyel-rnem rernemarl amey atyenh ayteyaty-rnem-thenan. Rernemarl atyenh-rnem inngan.”

²²Ingwer-ingweran Jesus angkew kwertengerl ikwerenh-rnemew, “Mpa! Alhey anantherr kwaty alay anthenayn-ampeny-warl.” Rernemap nganerlarr-alhew rtnwewarl, anperlarr-alhew-anem.

²³Rerneman kwaty alay-angkwarr artarnpeynenh, ran ankwanem irrenhew. Kwaty rwarr-akert-anem rntwey-alhew rlterrk innga, renh-rnem akngenherl-akngenhelhelew. Kwatyan lherrparnpew-anem rtnwewarl, aylperl-alheyew-anew-anem, aterelerrey inngap ayntewarl.

²⁴Jesus-anem rernem atyekelew, “Ingkart akwentay! Kwatyel anenhantherrenh ilwerl-athenewerr!” Rap akwentenhey-alpew, atayel innga angkew rwarrew-then kwatyew-then. Ingkerrap arternperreyelpew.

²⁵Ran angkew ikwer-rnem, “Ater-anemarl arrantherr irreyel? Ilekew atyeng awelhey-angenh? Arrantherr ayenh iterl-aremer! Nthakenharl athan arrenhantherrenh iwerl-alhey-angenh!” Rernem apatemel atererrew, rernemap angkerrew, “Pwertay! Artwa ilek-apenyarlap nhenhan? Rwarrel-then kwatyel-then renh awem!”

²⁶Ikwer-penh Jesus kwertengerl ikwerenh-rnem-akert alhew rtnwa ikwerel kwaty alay anthenayn-ampeny-warl. Rernemap kwaty alay-angkwarr artarnpenhew apmer Galilee-they, aremerrey-alhew tawen Gerasa ikwer-itwew-anem.