Luke 4:14-20

¹⁴Jesu rang mer Galilee-warn alpek. Kwerrern Alngaltar rang kwerel-ayeng anek, renh twer-ilek. Tjerrtj mapel mer mapel angketj Jesu-akertemeh awek.

¹⁵Jesu rang tjerrtj map church inehenhel kaltj-anthetjam, mer arrpenh mapel-ayeng. Inang renh angerr kangkemel nakek.

¹⁶Kwer-penh Jesu rang town Nazareth-warnemeh alpek, town nheng rang mangkekarl-warn. Arltang Saturday-el anemarleng, rang church inehenh-warn alhek. Lakenh rang arltang angerrel church-warn kweteth alhetjart town arrpenh-warn-arlk. Church kwenelemeh rang kemerremel irnek, Altjerr-henh angketj read-emeh-iletjeh pipel-ayel.

¹⁷Artwang nyentel kwer pip anthek Altjerr-henh angketj-akert, nheng angketj angenh-angenh Isaiah-henh angketj-akert. Jesu-el pip renh alkakek, angketj rang read-em-ilemel ilek,

¹⁸“Ngkart rang Kwerrern kwerenh tjeng-warn lanthek, rang yengenh ngkernek, angketj mwerr iletjeh tjerrtj rnwanentj-kweny maney-kweny mapeh. Rang yengenh urrpey lanthek, tjerrtj arrentjel rrkwekarl map iletjeh, ‘Ngkartel kwenh arrantherrenh arrentjeng rakem!’ Thang tjerrtj pweng map iletjeh, ‘Ngkartel kwenh anngang arrehantherr-henh aretjeh mpwarem!’ Thang tjerrtj nakepakel-irrekarl map iletjeh, ‘Ngkartel kwenh arrantherrenh ilem, “Thang iterleng-iterl anetj arrehantherr-henh wem, arrantherr arrkenemeh alartewarretjenh!” ’

¹⁹Thang tjerrtj ingkerrek iletjenh, ‘Arltang rang kel anem, arltang nheng kwerel Ngkart tjerrtj mapeh mantj-mantj ngwerleny mernelhetjenharl.’ ” Lakenh Jesu rang werlamparenyeng anngetherr read-em-ilemel ilek.

²⁰Jesu-el pip renh angkep artaper-ilek, artwang kwer angkep anthek. Kwer-penh rang arrernelhek. Tjerrtj ingkerrekel renh twant-arek.