1One time Jesus go inside da temple yard, an teach da peopo da Good Stuff From God. Da main priest guys, da teachas dat teach Godʼs Rules, an da older leadas fo da peopo go by him.
2Dey aks him, “Wat right you get fo do dis kine stuff? Who say you can do um?”
3Jesus tell um, “I like aks you guys someting too.
4John Da Baptiza, wen he wen baptize da peopo, wea he get da right fo do dat? God in da sky, he give um da right? O da peopo, dey give um da right?”
5Da main priest dem start fo squawk wit each odda bout dat, an tell, “If we say, ‘Was God in da sky wen give John da right,’ den Jesus goin say, ‘How come you guys neva believe wat John wen say, den?’
6But if we say, ‘Da peopo give um da right,’ den all da peopo goin throw stones fo kill us, cuz dey tink fo shua dat John wen talk fo God.”
7So da main priest dem tell, “We donno wea John wen get da right fo baptize.”
8Jesus tell um, “Kay den, I no goin tell you guys from wea I get da right fo do dis kine stuff.”
9Jesus tell da peopo anodda story fo teach um. He say, “One guy wen plant grapes inside one grape farm, an he rent um to some farma guys. Den he go way long time.
10Wen da time come fo cut da grapes, he send one worka guy by da guys dat rent his farm, so dey can give him some grapes. But da guys dat rent da farm bus up da worka guy an send um away wit notting.
11He send anodda worka guy, an dey bus him up too, an dey no shame fo make any kine to him, an send um away wit notting.
12Den he send one nodda guy. Dey bus him up an make um bleed, an throw um outside.
13Den da boss fo da grape farm say, ‘Wat I goin do? Eh, I know wat! I goin send my ony boy, da one I love. Fo shua, dey goin show respeck fo him!’
14But wen da guys dat rent da farm spock him, dey tell each odda, ‘Eh, dis da ownaʼs boy. He da guy goin own da farm bumbye. Come, we go kill him. Den everyting he get goin come ours!’
15So dey throw him outside da grape farm an kill him.” Den Jesus say, “Wat you guys tink da guy dat own da grape farm goin do to da guys dat rent da farm?
16He goin come wipe um out, an rent da grape farm to odda guys.” Wen da peopo hear dat, dey say, “Nah! Da owna no goin wipe um out!”
17Jesus look dem in da eye an say, “Den wat dat mean inside da Bible dat say, ‘Had one big stone, Da builda guys neva like use um, An dey no take um. But dat stone, Dass da corner block Dat make da building strong.’
18Anybody dat trip an fall down on top dat stone, dat stone goin broke dem. If dat stone fall down on top somebody, dat stone goin make um jalike dust. An dat stone, dass me, you know.”
19Da teachas dat teach Godʼs Rules an da main priest guys wen like bus Jesus right den an dea, cuz dey know dat he tell dat story fo teach bout dem. But dey scared da peopo.
20So dey look fo da right time fo do um. Dey send some guys fo watch him. Dem guys wen ack like dey good guys. Dey like trick Jesus wit wat he say, so dey can turn him ova to da leada guys an to da governa who get power.
21So da guys dat stay watching him tell him, “Eh, Teacha, we know dat you talk strait an wat you say an teach stay true. You do da same to everybody, an you teach Godʼs way fo real kine.
22So, wat? We still gotta pay tax to Cesar, da king fo da Rome peopo, o wat?”
23But Jesus know dey smart an trying fo trick him, so he tell um,
24“Show me one coin. Who dis guy on top da coin? An wass his name?”
25Dey say, “Dass King Cesar.” Jesus say, “Kay den, give um to Cesar wat his, an give to God wat his!”
26Dey no can trick him wit wat he say in front da peopo. Wat he say blow dea minds, an dey no say notting.
27Now, da Sadducee guys, dey say nobody can come back alive afta he mahke. Some a dem Sadducee guys wen come by Jesus an aks him,
28“Eh, Teacha, Moses wen write fo us inside da Bible, dat if one guyʼs brudda mahke an his wife stay, but no mo kids, da mahke guyʼs brudda gotta marry da widow an get kids fo his brudda.
29Now, had seven bruddas. Da first brudda wen marry one wahine an den mahke, an no mo kids.
30Da numba two brudda marry her, an mahke, an no mo kids.
31An da numba three brudda same ting, an da oddas too, an no mo kids.
32Den afta dat, da wahine mahke too.
33So, dey all wen marry her. Bumbye, wen da time come wen all da peopo dat wen mahke goin come back alive, dat time, who goin be her husban?”
34Jesus tell um, “Da peopo in dis time marry an give dea girls fo marry.
35But God say some peopo get um right wit him. Dey da ones, he goin make um come back alive inside da nex world, an give um da kine life dat stay to da max foeva. Dat time dem guys no goin marry o give dea girls fo marry.
36Dat time dey no can mahke, but dey goin stay jalike da angel guys. Cuz dey Godʼs kids, an dey goin come back alive.
37Now, long time ago, wen Moses wen spock one bush dat stay burning, he wen talk to God ova dea. Moses wen use dis name fo da Boss Up Dea Inside Da Sky -- he call um ‘Da God fo Abraham, Isaac, an Jacob.’ So Moses wen show dat da mahke peopo goin come back alive.
38Cuz God not da God fo da mahke peopo, but fo da peopo dat stay alive. Cuz everybody dat stay tight wit God, dey alive!”
39Some teachas dat teach Godʼs Rules wen say, “Dass good wat you say, Teacha!”
40An nobody aks him mo stuff.
41Jesus aks da teachas dat teach Godʼs Rules, “How come dey say dat da Spesho Guy God Send, he King Davidʼs boy?
42David, he tell inside da Songs fo God, ‘Da Boss Up Dea Inside Da Sky, He tell my Boss, “Come ova hea, sit down! Dis da importan place by my right side.
43Bumbye I goin make da peopo dat go agains you Go down in front you, Fo show dat you da winna ova dem.” ’
44Kay den, King David call him ‘My Boss,’ yeah? Den how come he can be Davidʼs boy, same time?”
45Da peopo stay listen to Jesus, an he tell his guys,
46“Watch out fo da teacha guys dat teach Godʼs Rules. Dey like go aroun an wear fancy kine religious kine clotheses. Dey like da peopo fo talk to dem wit respeck inside da market. Dey like sit in da main place inside da Jewish churches, an da main place at da lu‛aus.
47But dey no shame fo rip off da widows an take away dea houses. Same time dey make big show an pray long time, ony fo make peopo tink dey do good kine stuff fo dem. Dese kine peopo, dey goin get it mo worse from God da Judge wen da time come!”
