Luke 1:2-24

²Warraarrawindi anaani wurraarranggaa marri wurraambu-narrini anubani-yung na-God-jinyung ni-waṉbini, ana-wulhu-wulhurr-wala ni-mijgalmini na-Jesus. Anubani-yung ngarrambi-magaa ngagurri-wuy ana-lhaawu. Marri anubani-yung wii-rangarrangi wugurru.

³Ngaya anaani nga-wawanggini anaani ana-lhaawu, maaḻamburrg-bindiyung. Anaani-yung ana-lhaawu niga na-God-jinyung ni-waṉbini-yinyung. Anaani-yung nga-wawanggini wu…bani-yunggaj. Anaani-yung nga-wijangani, ari anaani-yung ngaayunggaj, nganggarrarrangi yungguyung wu…banila-yung-galawaj. Danu nga aḏaba wiij-maṉdhina. Danu nga nugawaj Theophilus, nagang nuṉḏunggal,

⁴anaani nagang ngunaa-garrarrangi nugawi yungguyung. Nguynju yadhu ba-marrbuy yungguyung aniijgubulu anubani-yung-jinyung nunggaawanggini-yinyung anaani.

⁵Anubani anu…bani-yunggaj, na-Herod na-king ni-buunggawa-maa wubani-yung-duj a-lhal a-Judea-rruj. Naaynbajung nigaayung naagi-yung na-priest, na-nimuwaj-jung naagi ni-mayini Zechariah. Ngarraagi-yung nga-rangarrina-yung ngarra-ngarrimuwaj-jung Elizabeth. Anu…bani-yunggaj warra-mi…yn-ngambara-waj, nubagi-yung na-Aaron, ni-burri ni-priest. Naagi-yung na-Aaron-gala, naaynbajung ni-mijgalmini-yinyung, nga naagi-yung na-nimuwaj-jung Abijah niga. Naagi-yung na-Abijah-wala, nubagi na-Zechariah ni-mijgalmini-yinyung niga.

⁶Naawiṉi-yung na-Zechariah marri ngarra-Elizabeth, naawiṉi-yung wini-burri maaḻamburrg-galawaj na-God-guy. Naawiṉi-yung yungguyung wuguṉi wurru-marrbuy, winiwu-yandhurrbangaa ana-lhaawu-runggal na-God-jinyung maaḻamburrg-bindiyung.

⁷Yagu waari wuguṉi warra-mijburrayung ambani-waṉagaa. Ngarraagi-yung ngaa-Elizabeth waari ambangi-waṉagaa warra-wirrig. Naawiṉi-yung wini-burri aḏaba ngi-ngajiwanggu-maa, marri nigaayung ni-yiwanggu-maa.

⁸Naagi-yung ni-burri bagu ni-mijgalmini, niga naa-ja-jambini-yinyung na-God, wubani-rruj a-Temple-Maṉngulg-duj. Nigawi-nyinyung warru-mandag na-Abijah-yinyung bagu wurru-burri, wurru-mijgalmini wugurraayunggaj.

⁹Anaani-yung anubani-yunggaj, wirrima-ṉuga-ngu-dhawawarumaa ṉuga, nguynju yadhu niga na-God ni-wajbariyn yangi-nyung aynjaabu-nyung. Naagi-yung ni-yanggi-magaa niwu-nangaa wunguban, wubani-rruj a-Temple-Maṉngulg-duj, lhirribala ni-lhaay. Anaani-yung wurru-yamaa wuguuguni-wugij wiijamaa wugurru. Anaani-yung, na-God niga ni-wajbariyn naagi-yung na-Zechariah nguynju yungguyung buguni ni-yanggi wubani-wuy a-Temple-Maṉngulg-guy. Nga ni-yabiyn lhirribala buguni a-wumurrng-guy wubani a-gara.

¹⁰Marri bagu aarabarabalu-rruj, warraawurru-yung warraarrawindi wurru-yambini nigawi-wuy na-God-guy, anubani-yumbaa wugurru wu-nagini-rruj anubagu-rruj ana-lhirribala anubani anu-nguban.

¹¹Naagi-yung na-Zechariah ni-lhaay niga bagu lhirribala a-Temple-Maṉngulg-duj. Niga ni-warranggayn bagu ni-nani aynjaabugij angel wu-lhaay na-Buunggawa-yinyung ni-lharrgang. Wubani-rruj wu-lhaay bagu walawalama-wala ma-ṉuga-muṉḏugini-rruj ama-ṉuga a-wunguban-duj, lhirribala bagu a-Temple-Maṉngulg-duj.

¹²Naagi-yung na-Zechariah ni-warranggayn nga ni-nayn, anubani-yung niga ni-wurri-ḻaḻmayn marri ni-wurrij-barrwarrangi, ni-ḏirrngawiiyn-bindiyung, niga ni-yamayn.

¹³Wugurraayung wu-yamayn ana-angel nigawi-wuy, “Yagi ngaya nimba-yami anaani, Zechariah. Nagang aadanu nuynjambini, niga na-God aadanu ninii-gawanggini nagang. Marri nagang ngaadagu nga-rangarrinaaj ngarra-Elizabeth, ambangi-waṉagana wirrig, ambangi-yabang gujuju, nuguṉi-nyinyung-jinyung. Banu-mayang niga na-nimuwaj-jung ani-mayina John.

¹⁴Anubani-yung-maynji aniimbuḻwiyn niga, nagang ba-wurrij-gaḻaaḻarrii, marri ba-ḏinggina nagang. Warraarrawindi-lhangu wugurru anubani amburru-waḻaaḻarrii,

¹⁵niga yamba ani-runggal na-Buunggawa-yinyung. “Yagi niga ni-waḻ-ngi ana-wine marri ana-grog. Anubani-yung ana-Maṉngulg Mawurr wugurru anggu-burraa nigawi-rruj, aninggaambamadhii niga, anubanila-wala aniimbuḻwiyn-maynji.

¹⁶Naagi-yung ani-yambina ana-lhaawu, nguynju yungguyung warruburru-yung warraarrawindi warra-Israel amburraagina, marri amburru-waliynjina na-Buunggawa-wuy, wugurri-nyinyung-guy na-God.”

¹⁷Anaani ana-angel ninggu-yambini-wugij. “Nagang na-niwiyaay, ani-ragaana raga-ragij, na-Buunggawa-yung-guy. Ani-waṉbina naagi-yung-maynji, niga nguynju yaga na-Elijah-yii. Aniwu-waṉagana lhuḏ nigawi-yii. Anubani-yung-maynji ani-yambina-maynji niga, nguynju yadhu warruburru-yung amburraaynjaabu wugurru, warruburru-yung-guy warra-mi-ninyarra-yung marri warra-mijburrayung, amburraa-ḏamarr-ngu-burrangijgaynjina wugurru. Warruburru-yung wugurru waari-yinyung ambunu-yandhurrbang na-God, marri anubani-yung amburraaynbijgiiyn aḏaba wugurru, nguynju yadhu amburraawanggina marri amburru-maaḻamburrg wugurru, nguynju yaga warruburru-yung-jii warraambaambaḻaman-jii warra-wurru-wurruj. Nguynju yadhu warraawurru-yung warra-wurru-wurruj na-Buunggawa-yinyung, amburru-burraa marri amburraandhurrg-gina wugurru maaḻamburrg na-Buunggawa yungguyung, niga yamba na-Buunggawa ani-walang aḏaba lhaalhag.” Dani-yung nga wu-yamaa anaani-yung ana-angel, ninggu-magaa niga.

¹⁸Nigaayung naagi-yung na-Zechariah ni-yambalmayn ana-angel, “Marri ngaya ajigala nga-marrbuy-mang? Ngaya anaani aḏaba nga-yiwanggu, marri ngayawi-nyinyung ngarra-guḻgu ngigaayunggaj ngi-ngajiwanggu aḏaba,” ni-yamijgayn wugurri-wuy.

¹⁹Wugurraayung ana-angel wu-yamayn, “Ngaya-waj anaani Gabriel, ngawu-lhaawu-yarrijgina-yinyung, marri ngaya-waj anaani nga-lhara-yinyung nigawi-rruj na-God-duj wubani-rruj ni-burraa-rruj. Ngaya anaani nganu-yandhurrbangana niga. Niga-waj ngani-lharrgang anaani, marri ngunu-magana, ngunu-yayn nugawi-wuy anaani ana-mamanunggu ana-lhaawu.

²⁰Nagang yamba waari ba-jambarrgini aadanu, anaanila-wala yagi aḏaba nuynjambi aadanu, ba-ramadhan-ngu-dhidiiyn aḏaba. Nga aadanila-wala ba-yamana ba-burraa… nga anggu-waṉbang-gala, bani-yung marri, ba-ramadhan-bawalhang marri ba-yaṉḏabalang marri bani-yung ba-yambang. Aadanu yamba nagang anaani ana-lhaawu waari yamba nagang nimbaa-ngu-jambarrgini ngaya. Anaani ana-lhaawu yijgubulu. Anaani anggu-waṉbina wurrugu marri.” Dani-yung wu-yamaa anaani-yung ana-angel.

²¹Warruburru warra-wurru-wurruj wunaa-garranggaa wugurru na-Zechariah baḏag, anaarabarabalu-rruj-jinyung wurru-burri. “A-yangi yadhu nubagi ni-burraa ana-baḏag ana-lhirribala, aḏaba ani-rabalangi niga wubani-yunggaj, yagu ni-yaminggarriyn?” Dani-yung wuu-yamijgaynjini.

²²Marri anubani-yung-maynji ni-rabaliyn niga, yagu waari ani-yambini aḏaba. “Yagu naagi-yung niga ni-bu-burri, yangi yamba ni-nayn, ari niga ni-wuryarrangi!” wurru-yamayn. Yagu waari niga ani-yambini, marang-bugij niga ni-marang-birbirini, ni-yambini marang-mirri ni-waṉbini, bani-yung-bugij, aḏaba niga ni-yang-gaṉibiyn.

²³Anubani-yumbaa niga ni-mijgalmini anubani-rruj ana-Temple-Maṉngulg-duj, anubanila-wala aḏaba wu-jadugiiyn. Nga aḏaba ni-yanggi aanga-wuy.

²⁴Wurrugu marri ngijang malgadhaadharri, aḏaba ngarrubagi-yung nga-rangarrina-yung ngiga aḏaba ngi-gulmung-muṉḏurr-mayn. Nga anubanila-wala ngi-yanggi aḏaba warruburrala-wala.