Lukas 18:7-14

⁷Ifa usun, Kot esap fokun pwärala än nöün kewe mi fil pwüng, ir chokewe mi kökköri le rän me le pwin? Ifa usun, epwe mang le alisiir?

⁸Ngang üpwe ürenikemi, epwe müttir le pwärala ar pwüng. Nge lupwen Nöün Aramas epwe war, ifa usun, epwe küna aramas mi lükülük won fanüfan?”

⁹Iwe, Jesus a pwal apworausa ei pworausen awewe ngeni ekewe aramas mi lükü püsin ar pwüng o aücheangaua aramas.

¹⁰“A wor ruoman mwän mi feitä lon ewe imwenfel pwe repwe iotek, eman, eman Farisi, nge ewe eman, eman chon ioni takises.

¹¹Iwe, ewe Farisi a ütä, a iotek lon lelukan o üra, ‘Ai Kot, üa kilisou ngonuk, pwe üsap usun ekewe ekoch aramas, ir chon solä, chon pwüngingau, chon lisowu, ika fen pwal usun ei chon ioni takises.

¹²Ngang üa echikefel fän ruu lon eu wiik, üa pwal fangala leengolun meinisin mine üa eäni.’

¹³Nge ewe chon ioni takises a ütä me toau, esap fen mwo nge netä läng, nge a pisiri fän mwärin o apasa, ‘Ai Kot, kopwe ümöümöch ngeniei, ngang eman chon tipis.’”

¹⁴Jesus a apasa, “Üpwe ürenikemi, ei chon ioni takises a küna pwüng fän mesen Kot lupwen a liwinla lon imwan, nge sap ewe Farisi. Pun iö a püsin atekiatä epwe küna tekison, nge iö a püsin atekisonatiu epwe küna tekia.”