2 Ia i hetamaridi Eaubada ena basileia se lauguguiaei, eo tauasiasiebo se hemauridi.
3 Ie ribalau aridi eai, i ene, “Emi lauwasi enana tabu saha au bahei, tabu tue, tabu tobo, tabu aiai, tabu moni; tabu emi pereue au heona labui.
4 Ena au awasae hari numa hari numa, metai au mia e emi huia lau.
5 Ena headi nige se eogaisinimiu, eanua me emi huia laugabaena, aemiu geregeredi au oiluilui gabaedi adi giru heiheinoina.”
6 Isi se lauo, eanua se baeawaidi, evanelia se lauguguiaei, eo tatao asiasiebo hari tupo hari tupo se hemauridi.
7 Ena laulau gamagamagari Heroda tetaraki wasadi i ataiei: nuana i ponopono, paana headi si ene, Ioane mate eai i torouioma.
8 Headi hinage si ene, Elia i lagema; eo headi si ene, peroveta esau mumuga eai wa, i torouio.
9 Heroda i ene, “Ioane uruna ea tomhai wa: na ia eai nei laulau ne i ginauridi wasadi ea ataiedi wa?” I henua Iesu bena i ita.
10 Aposotolo tataodi se uioma edi abiabi gamagamagari wa ia abo se heriba. Ia abo i woealaedi, se lausuarayamuyamui edi dobila eanua esau esana Betesaida wa malatupama eai.
11 Tatao se ita, ia abo se hemuriwatai: i oiamidi, Eaubada ena basileia ribadi i heribadi, headi hinage se asiebo abo i hemauridi,
12 Mahana i taru’eo, saudoudoi‐labui se laoma, se ribalau ia arinai, si ene, “Moutuadi wa u hetamaridi bena se lau eanua eo oea se lauhetaiiri, se eno, eo aiai se eoo, paana ita malatupama eai ta mimia ta.”
13 Ia i ribalau aridi eai, i ene, “Aiai adi au mosedi.” Isi si ene, “Ama falawa gagiridi haligigi, eo eama labui mo: taba ai lau tatao gamagamagari ta adi aiai ai uneune.”
14 Paana tatao mo isi tausani haligigi. Ena heaheatayao i heribadi, i ene, “Au hebawabigabigaesegaidi, hari poru, hari poru, tatao‐labui‐se‐mate‐saudoudoi.”
15 Ena riba se abiwatai nei doha, gamagaridi se hebawabigabigadi.
16 Ia abo falawa haligigi, eo eama labui i abidi, i itasae galewa eai, i lautoi, abo i ihi, i mosei ena heaheatayao aridi eai, abo se toredi moutuadi wa matadi eai.
17 Isi se aiai, e bogadi se sese: aitoredi se tanogogoidi bosa saudoudoi‐labui.
18 Na, ia mo sora ma uurana, ena heaheata maenayao: i hesiolau aridi eai, i ene, “Tatao si ene eau ede eai, wa?”
19 Isi ia arinna se heuio, si ene, “Ioane Bapatiso; headi si ene, Elia; headi hinage si ene, mumuga perovetadi esau i torouioma.”
20 I ribalau aridi eai, i ene, “Na, omi au ene eau ede eai wa?” Petero ia arinana i heuio, i ene, “Eaubada ena Keriso.”
21 Awadi i tawaidi, i lauhesomdi, tabu tau esau wau riba wa se heriba.
22 I ene, “Tau Natuna amamna gamagamagari abo i hearodi, eo babadadi, eo kohena lailaidi, eo tauuriuri ia abo se laupalihibaei, abo se unuhemate, asubena hehaionana eai abo se hetorouioi.”
23 Ia abo i ribalau gamagaridi aridi eai, i ene, “Tau esau ena gadosisi bena i hemuriwataigu, taba iabom i nuagabaeuioi, asubena gamagamagari ena satauro i abiisini, eo i hemuriwataigu.
24 Na tau esau, eo esau, ia maurina i nuatuuioi ia mauri abo ie dabu: tau esau eo esau ia maurina i nuagabaei eau debagu eai, ia mauri abo i abi.
25 Saha lolona abo tau i abi, taba gogo gamagamagari tanoubu eai ta i abiheohidi, ia maurina abo i gabaei?
26 Tau esau, eo esau, i taumaeamaeaegu, eo egu riba i taumaeamaeaedi, tau Natuna ia abo hinage i taumaeamaeaei, ena huia laoma ma namanamarina, eo Tamana namanamarina, eo aneru hetahetabudi namanamaridi hinage.
27 Riba mamohoina ede ea heribamiu ta, headi inai se totoro mate sora nige se hearo, Eaubada ena basileia abo se itabagunaei.”
28 Teina riba ta i ribaedi wa i lau e asubena haligigi‐haiona se ohi, Petero, eo Ioane, eo Iamesi i woeaidi, i dalasae oea tupina eai, bena i lau‐uura.
29 Ma uurana, ana ao ie ori, eo ana lulu se posiposi, eo se balebalelem.
30 Na ia maenayao tatao labui se ribariba, isi ede Mose eo Elia:
31 isi se taumasaraha ma namanamarina, ia matena se ribaribaei, ia Ierusalema eai abo i hearo.
32 Na Petero, ma ana sasaguyao, matadi se enoeno: isi se siliata ena namanamari se ita, eo taudi labui wa maenayao se totoro, edi namanamari hinage se ita.
33 Taudi labui wa Iesu bena se laugabaei. Petero i ribalau Iesu arinai, i ene, “Tanuagagu e, i lolo inai mo ta mia: apa haiona ta abidi: esau enam, eo esau Mose enana, eo esau Elia enana:” na i ribariba gaibu.
