Luka 6:8-38

⁸Lekeni Yesu kamanya chawang'ali wakwalangula, kamlongela imunu ayo yaholole ghumoko, “Utse wime hano.” Imunu ayo kenuka, kema hala.

⁹Kuya Yesu kawalongela, “Nowaghutseni mwemwe, apfi mna Litsuwa lya Sabato pfinogha kutenda ghanoghile au kutenda ghehile? Kuukombola ughima we imunu au kuukoma?”

¹⁰Kawalolesa iwanu wose iwali hala, kuya kamlongela imunu ayo, “Ugholose ghumoko ghwako.” Katenda ka Yesu pfamlongele, na ghumoko ghwake ghuhonetsighwa.

¹¹Lekeni iwanu wona maya wandusa kwilongela iwenyegho ichinu chachi wamtendele Yesu.

¹²Mna matsuwa agho Yesu kagheluka kuchidunda, kakala meso chilo chose komlomba Imulungu.

¹³Nemitondo haipfikile, Yesu kawakema iwanang'ina wake. Kawasaghula iwanang'ina kumi na weli kulawa mumula mne kingili lyawo, kaweng'a taghwa iwatumighwa.

¹⁴Simoni, Yesu kamwing'a taghwa lya keli Petiri, na ndughu yake Andereya, Jakobu, Yohane, Filipi, Batalomeyo.

¹⁵Matei na Tomasi na Jakobu imwana we Alifayo na Simoni iyakemighwe Zelote,

¹⁶Yuda imwana wa Jakobu na Yuda Isikarioti, yamhunduke Yesu.

¹⁷Yesu hayahulumke kuchidunda na iwatumighwa wake, kema mlwanda na kingili kulu lye iwanang'ina wake. Iwanu wengi tsawabahala iwalawile tsiisi tsose tsa Yudeya, Yerusalemu na walawile mne tsiisi tsa kumwani tsa Tiro na Sidoni.

¹⁸Iwanu awo watsa kumtegheletsa Yesu na kuhonetsighwa matamu ghawo. Pfipfila iwanu wala iwadununzighwe ne ipfinyamkela watsa wahonetsighwa.

¹⁹Iwanu wose tsawabama kumkinda Yesu, kwaapfila ingupfu ing'ali imlawa na iwahonetsa wose.

²⁰Yesu kawalola iwanang'ina wake kalonga, “Mbweda mwemwe wahingwa, kwaapfila Undewa we Imulungu iwo wenu!

²¹Mbweda mwemwe yamne nzala sambi, kwaapfila mwitseghuta! Mbweda mwemwe yamlila sambi, kwaapfila mtsosekelela!

²²“Mbweda ka iwanu watsowahila, watsowabaghula na watsowaligha na watsolonga mwemwe mwiha, kwaajili ye Imwana we Imunu!

²³Deng'eleleni na kubigha agho haghotsolawila kwaapfila ghweko lyenu kulu likighwa kulanga. Apfo pfipfo iwabala wawo pfawawatendele manabii.

²⁴Lekeni mtsoghaya mwemwe matajili, kwaapfila mwemwe ma tsambokela ughima unoghile!

²⁵Mtsoghaya mwemwe yamwighutile sambi, kwaapfila hambele mtsakona inzala! Mtsoghaya mwemwe yamsekelela sambi, kwaapfila hambele mtsoghanzika no kulila!

²⁶Mtsoghaya ka iwanu wose watsowatogholani mwemwe! Kwaapfila apfo pfipfo iwabala wawo pfawawatendele manabii wa ughutsu.

²⁷“Lekeni nowalongela mwemwe yamnihulika, muwanoghele iwehile wenu, muwatendele ghanoghile iwanu wala iwowehila.

²⁸Muwabaliki iwanu wala iwowalighita, na muwalombele kwe Imulungu iwanu wala iwowatendela ghehile.

²⁹Ka imunu wowose kakutowa mna likanza limwe, pfipfila mleke akutowe likanza liyaghe, ka imunu kolisola likoti lyako, pfipfila mleke asole lighwanda lyako.

³⁰Mwing'eni chila imunu cholomba, ka imunu wowose kakuboka ichinu chako, uleke kumlongela akuyitsile.

³¹Muwatendele iwanu wangi achila chambama mwemwe wawatendele.

³²“Mng'awanoghela iwanu wala iwomnoghelani mwemwe, apfi uluso wachi wamlangusa? Hata ‘iwanu wane nzambi’ pfipfila wowanoghela iwanu wala iwowanoghela!

³³Mng'awatendela ghanoghile iwanu wala iwowatendela ghanoghile, apfi uluso wachi wamlangusa? Pfipfila ‘iwanu wane nzambi’ wotenda pfipfo!

³⁴Mng'awakopesha iwanu wala yamuwalolela watsomuyitsilani, apfi uluso wachi wamlangusa? Pfipfila ‘iwanu wane nzambi’ wowakopesha wayawo, na kuwalolela wawoyitsile.

³⁵Lekeni wanogheleni iwowahila mwemwe na muwatendele ghanoghile, muwakopeshe iwanu na mleke kulolela ka watsowoyitsila. Kuya ghweko lyenu litsakuwa kulu, na mtsakuwa iwana we Imulungu iyali Kuchanya Ng'ani. Kwaapfila yeye kanogha kwe iwanu yang'awolonga mighede ne iwanu wehile.

³⁶Muwe na libatsi, ka Aba wenu pfali na libatsi.

³⁷“Mleke kuwahigha wayenu, ne Imulungu ng'atsowahighani bae. Mleke kuwadununza wayenu, ne Imulungu ng'atsowadununzani bae. Muwalekele wayenu, ne Imulungu katsowalekeleni.

³⁸Muweng'e iwanu wangi, ne Imulungu katsomwing'ani. Namwe mtsobokela ichipimo chimemile mbaka chakwitika. Kwaapfila ichipimo chamtumila kwe iwanu wangi, Imulungu katsochitumila chicho kuna mwemwe.”