36 Khalani na ntsisi ninga Babanu ngwa ntsisimbo.
37 Lekani kumbatonga andzanu kuti Mulungu adzasaye kukutonganimbo. Lekani kumanga mulandu andzanu kuti Mulungu adzasaye kukumanganimbo. Khululukirani mitima andzanu kuti Mulungu adzakukhululukirenimbo.
38 Pasani bzinthu andzanu kuti Mulungu adzakupasenimbo na mphimo yabwino, ya kutsindira, yakudzala na mpololo, ndipo andzakupasani na mtima wentse. Nakuti mphimo yomwe mumpimira nayo andzanu ndiyo an'dzakupimiranimbo nayo.
39 Ndipo iye adawatsikira pomwe matere aciti: Kodi zimola angakhale langa kuna zimola mwandzace? Nenene! Nakuti wentse an'gwera m'dindi.
40 M'pfundzi ambadziwa lini kuposa m'pfundzisi wace.Tsono munthu ali wentse angapfundzisidwa bwino ambadzadziwambo ninga m'pfundzisi waceyo.
41 Kodi thangwe ranyi uli kukwanisa kuwona manthongo yomwe yali m'maso mwa mwanzako, ucisaya kubva citsetswa comwe ciri m'maso mwako?
42 Ungauze tani mwandzako kuti: “Bwera ndikupukuse manthongo. Kodi iwepo uli kubva lini citsetswa comwe ciri m'maso mwakomo? Mpfaka-faka! Toma kucosa citsetswa comwe ciri m'maso mwakomu kuti undzawone bwino yali m'maso mwa mwandzakomu.
43 Palibe muti wabwino omwe umbabala bzisapo bzakuipa. Ndipo palibe pomwe muti wakuipa omwe umbabala bzisapo bzabwino.
44 Na tenepo muti uli wentse umbadziwika na bzisapo bzawene. Ndipo palibe munthu omwe ambacha nkhuyu m'muti wa kalinkhato. Palibe pomwe munthu omwe ambacha masau mu mpangala.
45 Munthu wabwino ambalewambo bzinthu bzabwino bzomwe bziri mumtima mwace. Tsono munthu wakuipa mtima ambalewambo bzinthu bzakuipa.
46 Thangwe ranyi mumbandicemera “Mbuya, Mbuya,” mucisaya kucita bzomwe nimbalewa?
