2 Tsono afalizeu winango adawabvundza kuti: “Kodi thangwe ranyi muli kucita bzinthu bzomwe bzimbaletsedwa kucita m'masabudu?
3 Ndipo Jezu adawatawira aciti: “Kodi mulibe kuwerenga bzomwe adacita Davide na andzace pomwe adabva njala?
4 Iye adapita m'nyumba ya Mulungu na andzace, acidya mikate ya kucitira ntsembe yomwe ikhafunika lini kuti iwo adye maka azibaba wa ntsembe okha”.
5 Iye adawauza pomwe kuti: “Mwana wa Munthu ni Mbuya wa Sabudu kubodzi.”
6 Pasabudu linango, Jezu adayenda mnyumba ya kupembera. M'mwemo mukhana munthu wakulemala boko la didi.
7 Ndipo afalizeu na apfundzisi wa mtemo akhamunyang'anisisa kuti amuwone penu iye angadamulimbisa pasabudupo, kuti awone thangwe ra kum'manga nalo mulandu.
8 Tsono iye akhadziwa kale ndzeru zawo. Ndipo iye adamuwuza wa kulemala boko ule kuti: “Lamuka uime pakatipa!” Na tenepo iye adalamuka aciima.
9 Ndipo Jezu adawabvundza kuti: “Kodi ndiciponi cinibvumizidwa kucita pasabudu: kucita cabwino ayai cakuipa? Kupulumusa munthu ayai kupha?
10 Ndipo iye adawanyang'anisa wanthu wentse omwe akhali pamwepo, aciuza munthu wa kulemala boko ule kuti: “Futhula boko lakoli!.” Ndipo iye adafuthula bokolo, licilinganira na lindzace.
11 Pamwepo iwo adakalipa kwene-kwene. Na tenepo iwo akhapangana kuti angadamucite ciani Jezuyo.
12 Pantsiku zimwezire Jezu adakwira m'phiri kukapemba. Iye adaphuphudza usiku bwentse acimbapemba Mulungu.
13 Pomwe kudacena, iye adasankhula ateweri wace khumi na awiri, aciwasapasa dzina kuti atumiki:
14 Simau omwe adadzamupasa dzina kuti ni Pedru, na m'bale wace Andereya, Tiyago, Juwau Firipi, Bartomeu,
15 Mateu, Tumee, Tiyago mwana wa Alufeu, Simau omwe akhacemeredwa Mulindiri,
16 Juda mwana wa Tiyago na Juda Kaliyoti omwe adadzamuphindukira.
17 Ndipo iye adapolika nawo kucigwa komwe kukhana ateweri wace azinji kwene-kwene. Ndipo nthithi wa wanthumbo azinji akhadacokera kuJudeya na kuJeruzalema na kumphete kwa madzi ya nyandza ya Tiru na Sidonya.
18 Iwo akhadabwera kuti adzamubve na kudzalapidwa matenda. Iye akhalimbisa pomwe wale omwe akhambagwa mizimu ya kusaya kudziwika.
19 Ndipo wanthu wentse akhafuna kumukhuya, thangwe iye akhana mphambvu. Na tenepo adawalimbisa wentse.
20 Ndipo iye adanyang'anisa ateweri wace, aciti: Wakusimbidwa ndimwe wakusauka, thangwe Umambo bwa Mulungu mbwanu.
21 Wakusimbidwa ndimwe omwe muna njala tsapano-lino, thangwe mundzakhuta. Wakusimbidwa ndimwe omwe lero muli kulira nakuti mundzaseka.
22 Wakusimbidwa ndimwe omwe muli kuwengedwa na wanthu, muli kupambulidwa, muli kutukwanidwa, acikucemerani madzina yakuipa na thangwe ra Mwana wa Munthu!
23 na tenepo dzakondweni ntsiku imweyo, mucidzasekera, thangwe mabaibai yanu kudzulu yan'dzakhala makulu kwene-kwene. Nakuti azibabawo adacitambo bzimwebzi kuna apolofeta.
24 Tsono tsoka kuna anyakudala, thangwe muli kutsangalaza kale.
25 Tsoka kuna imwe anyakudya bwino, nakuti mundzabva njala. Tsoka kuna imwe omwe muli kusekera tsapano-lino. Nakuti mundzadandaula mucilira.
26 Tsoka kuna wale omwe ambatumbizidwa na wanthu wentse. Nakuti azibabawo adacitambo bzimwebzo kuna apolofeta wakunama.
27 Ndiri kukuuzani winango omwe muli kundibvamwe kuti mucitire lufoi awengi wanu. Citani bzinthu bzabwino kuna wale omwe an'kuwengani.
28 Simbani wentse omwe ambakulewani kuipa. Pemberani wale omwe ambakupfudzani.
29 Akakumenya mbama kuphutu libodzi, muperekere pomwe linango. Akakutengera bhachi lako, muleke atenge pomwe hembe.
30 Pasa munthu ali wentse comwe iye ankukumbira. Penu munthu an'kutengera cinthu leka kumupsokonyola.
31 Citirani bzabwino andzano ninga momwe mun'funira kuti wanthu akucitirenimbo.
32 Penu municitira lufoi wale omwe ambakucitiranimbo okha, kodi mun'dzatambira mabaibai yanyi? Nakuti anyakuphonya ambacitira lufoi wale omwe ambawacitirambo.
