Luka 20:14-36

¹⁴Lekeni awala iwakulima hawamwonile, welongetsa iwenyegho, ‘Hayuno iyo muhala mghunda, leka tumkome na uhala wake uwe wetu!’

¹⁵Apfo wamlapfa kunze mwa mghunda wa mitsabibu, wamkoma.” Kuya Yesu kawaghutsa, “Apfi imunu yane mghunda katsowatenda choni iwakulima wala?

¹⁶Katsakutsa kuwakoma iwakulima awo, na kuweng'a iwanu wangi mghunda awo.” Iwanu hawahulike imbuliyo walonga, “Mbe! Agho ghaleke kulawila!”

¹⁷Lekeni Yesu kawatsodolela tsinenge, kalonga, “Kuya Ghamaandiko Mahenzeluka ghano choni? ‘Libwe iwalilemile iwotsenga, Alyo liwa libwe kulu lya haghatighati?’

¹⁸Imunu wowose iyokughwa mna libwe awo katsobeneka-beneka, ne imunu wowose litsomghwila litsomhonda ghendo.”

¹⁹Iwolangulitsa Ghamalaghitso ne Watambika wakulu tsawabama wamghoghe Yesu bahala, kwaapfila wamanya ka imbuli ila walongighwa wawo. Lekeni tsawawapfuka iwanu.

²⁰Apfo wakala wobama ichipindi chinoghile. Wawatuma iwanu iwetendile wanogha, wamghoghe Yesu kwa kumghutsa mbuli, ili wadahe kumghala kwe imkulu we undewa wa Roma.

²¹Iwanu awo wamghutsa, “Imlangulitsi, twomanya ghweghwe kwolonga na kwolangulitsa ipfinu pfinoghile, ng'aulola bae ukulu we imunu, lekeni kwolangulitsa inzila ye Imulungu kwe ukweli.

²²Apfi pfinogha kumwing'a kodi Kaisari au ng'apfinoghile bae?”

²³Lekeni Yesu kamanya ukwiha kwawo, kawalongela,

²⁴“Nilanguseni isendi. Ina uhanga wa nani na taghwa lya nani?” Wamwidika, “Wa imndewa Kaisari.”

²⁵Apfo Yesu kawalongela, “Ipfinu pfa Kaisari mmwing'e Kaisari, ne ipfinu pfe Imulungu mwing'eni Imulungu.”

²⁶Ng'awadahile bae kumghogha kwe achila chialongile hambele he iwanu. Na wakangawala pfaawedike, wanyamala.

²⁷Masadukayo iwalongagha kuduhu kutsilihuka. Wamwenga wamtsila Yesu na kumghutsa,

²⁸“Imlangulitsi, Musa tsakatwandikila. ‘Imunu ang'afiwa na ndughu yake yane mwehe, lekeni kahela imwana, imunu ayo yamkwele ipinga ayo, ili yamwelekele ndughu yake iwana.’

²⁹Tsakukala ne iwandughu saba. Wa mwanduso kakwela mwehe, naye kafa ng'alekile iwana bae.

³⁰Na wa keli kamsola ipingayo, naye kafa ng'alekile iwana.

³¹Kuya wa kadatu kamkwela, na pfipfila wose saba, wafa ng'awalekile iwana bae.

³²Mwiso ipinga yula naye kafa.

³³Lelo mne litsuwa lya kutsilihuka kakuwa mwehe wa yuhi? Kwaapfila tsakakwelighwa na wose saba.”

³⁴Yesu kawalongela, “Iwanu wa ghamatsuwa ghano wokwela na kukwelighwa.

³⁵lekeni awala iwasaghulighwe watsilihuke kulawa mne lifwa na wawe ne ugima, ng'awatsokwela bae wala kukwelighwa.

³⁶Ng'awatsakufa keli bae, kwaapfila watsokuwa ka wamalaika. Nawo wa iwana we Imulungu kwaapfila watsilihuka kulawa mne lifwa.