Luka 10:13-26

¹³“Korasina kapore oa! Betesaida, kapore oa! Ena Turo eo Sidona aridi eai laulau gigiboridi se ginauridi doha se ginauri arimiu eai beabeaaririna eai wa nuadi se buidio; se babawa baeki se luidi, eo ahu eai se heahudi.

¹⁴Hedudurai asubenana eai Turo eo Sidona abo nige se baaea doha omi.

¹⁵Oa Kaperenauma hinage, se lauisinim galewa ewana eai, hade eai abo se gabadobem.

¹⁶“Ia ena arinamiu i ataiei: arinagu hinage i ataiei: ia ena i isugaraemiu, eau hinage i isugaraegu; ia ena i isugaraegu, ia tau hetamariguma hinage i isugaraei.”

¹⁷Tatao tatao‐haiona‐se‐mate‐saudoudoi wa se uioma, ma kodedi si ene, “Guiau e, demoni hinage oa esam debana eai arinamai se ataiei.”

¹⁸Ie ribalau aridi eai, i ene, “Satani ea ita doha namanamari, galewa eai i beuma.

¹⁹Gigibori ea lediwa arimiu eai gaganadenadewa aemiu eai au ututawaidi, eo waiununa ena gigibori gamagaridi emi gigibori abo i saetawatawai: eo taba nige ginauri esau abo i hebaaeamiu.

²⁰Taiede tabu au kode paana earua baabaaeadi wa arinamiu se ataieyao; au kode mo paana galewa eai esamiu se uridio.”

²¹Meta huiana eai wa Iesu Earua Tabuna debana eai, ie kode ariri eo i ene, “Tamagu e, galewa eo tanoubu Guiauna, ea lautoiem ta, teina ginauridi sonoga tataodi, eo sibasiba tataodi matadi eai u toreyamuidi, bebe mo aridi eai u hemasarahadi: taiede Tamagu e, oa matam eai u ene meta i lolo.

²²Ginauri gamagaridi Tamagu i ledimao arigu eai; nige tau esau Natuna i nuatui, Tamana mo iabom; eo nige tau esau Tamana i nuatui hinage, Natuna mo iabom, eo ia hinage arinai Natuna abo i hemasaraha.”

²³Ia abo i sinibui ena heaheatayao aridi eai, isibom enadi i ribariba, i ene, “Matadi se lolo, taba ginauri au itadi wa, abo hinage se itadi.

²⁴Paana ina ea heribamiu ta, ginauri au itadi peroveta eo wasawasa gamagaridi se henua bena se itadi, nige se itadi; eo riba wa au ataiedi bena se ataiedi hinage, nige se ataiedi.”

²⁵Laugagaeo tauna esau i toro bena Iesu i nohoi, i ene, Tauheata e, saha ea ginauri mauri nige nosina abo ea abi?”

²⁶Iesu ie ribalau ia arinai, i ene, “Laugagaeo bukana eai saha se uri? edoha em hasihasirina?”