1 O colňika the o binošna avenas pašeder ko Ježiš, hoj les te šunen.
2 O Farizeja the o zakoňika dudrinenas a phenenas: “Kada manuš prilel le binošnen a chal lenca.”
3 Akor lenge phenďa kada podobenstvo:
4 “Te varekas tumendar ela šel (100) bakre a jekhes lendar našaďahas, či na mukela olen eňavardeš the eňa (99) pre maľa a na džala pal oda, savo našľiľa, medik les na arakhela?
5 Sar les arakhel, lel peske les pro vali a radisaľol.
6 A sar avel khere, vičinel le prijaťeľen the le suseden a phenel lenge: ‘Radisaľon manca, bo arakhľom le bakres, savo mange našľiľa!’
7 Phenav tumenge, hoj bareder radišagos ela andro ňebos upral jekh binošno manuš, savo pes visarela ko Del, sar upral ola eňavardeš the eňa (99) čačipnaskere, savenge pes na kampel te visarel le binendar.”
8 “Abo, te varesava džuvľa ela deš rupune minci a te jekh lendar našaďahas, či na labarela e momeľi a na šulavela o kher, hoj mištes te rodel, medik ola love na arakhela?
9 Sar la arakhela, vičinela le prijaťeľken the le susedken a phenela: ‘Radisaľon manca, bo arakhľom o love, so našaďom!’
10 Phenav tumenge, hoj ajso radišagos hin maškar o aňjela le Devleskere upral jekh binošno manuš, savo pes visarel le binendar ko Del.”
11 A phenďa: “Varesave manušes sas duj čhave.
12 O terneder čhavo phenďa le dadeske: ‘Dado, de mange miro kotor tire barvaľipnastar!’ Avke o dad lenge rozulaďa o barvaľipen.
13 Pal varesave dživesa o terneder čhavo iľa savoro a geľa het dur andre varesavi phuv. Ode dživelas barikanes a rozkerďa savoro peskero barvaľipen.
14 Sar imar savoro prechaľa, avľa bari bokh andre odi phuv a na sas les so te chal.
15 Geľa a chudľa te kerel buči prekal varesavo manuš, savo andre odi phuv bešelas. Ov les bičhaďa pre peskere maľi te pasinel le balen.
16 Kamelas pes te čaľarel ča ole cipenca, so chan o bale, ale ňiko leske len na delas.
17 Akor pes zagondoľinďa a phenďa peske: ‘Keci robotňiken ke miro dad hin but chaben a me kade merav bokhatar!
18 Uščava, džava ke miro dad a phenava: Dado, kerďom binos anglo ňebos the angle tu,
19 imar na som buter hodno, hoj man te vičinav tiro čhavo; prile man sar jekhe tire robotňiken.’
20 Akor ušťiľa a džalas ke peskero dad. Ov mek sas dur, sar les dikhľa leskero dad. Ačhiľa leske pharo pro čhavo, denašľa ke leste, obchudľa les a čumidľa les.
21 O čhavo leske phenďa: ‘Dado, kerďom binos anglo ňebos the angle tu a imar buter na som hodno, hoj man te vičinav tiro čhavo.’
22 Akor phenďa o dad peskere sluhenge: ‘Anen sigo nekšukareder ruchos a uren pre leste! Thoven e angrusi pro angušt a o sandalki pro pindre!
23 Len ola thuľa gurumňora a murdaren la! Chas a radisaľuvas,
