Luk 6:15-27

¹⁵Matiu ka Tomas; Tiemes natin Alveas; ka Saemon (koa mul en vangi meatin keil koa e vati mok keke Siu keil avamaluv ran hen kavmen ten out Rom);

¹⁶Sudas natin Tiemes, ka Sudas Eskariot koa hemaen Iesu heha en hen koakeil uasi hemat.

¹⁷En avong koa Iesu ral min meatin keil onen avita netan ran hou, kei va mulomal en out tai koa vi aet. En out enek, mari vangi meatin keil emun koa amusil Iesu arosini. Ka Iesu les mari vangi meatin savsav keil emun koa umai: koakeil houlu aka en taon ten out Serusalem ka meteimal savsav keil emun koa amul en provins ten out Sudea, ka koakeil emun koa arvitei Siu aka en taon ten out Taer keilu taon ten out Saedon koa lumul vesesal ven Atas Medeterenia.

¹⁸Keil umai keke avalong Iesu ka avahisi vasak revi keil ran mesaien keil one. Koakeil emun koa ninin tisa keil amul apurun keil umai, ka Iesu vile lat ninin tisa keil enek ran keil ka umai ris atahos.

¹⁹Meatin vasi keil amul asak visi avatokol Iesu, veni keihoen koa mul ien mul sak revi meatin vasi keil ran mesaien keil one.

²⁰Navong mul veah ral min meatin keil enek, Iesu lele va en meatin keil onen ka viteni vit, “Tokolkatien hel en kami koa tounah keil onami rovinvintei, veni tounah vasi koa mul en hen Ahi vi onami.

²¹Tokolkatien hel en kami koa, kosa, amai kat kami ven tounah, veni Ahi hesakin kami mihehilelau. Tokolkatien hel en kami koa, kosa, mimurang, veni Ahi hesakin kami mihehiteai.

²²Tokolkatien hel en kami navong meatin keil tine heat kami ka asesein kami venau. Anatin, tokolkatien hel en kami navong aselus tisa kat kami ka apurun isomi veni mimusil kat Natin Meatin.

²³Mihesi kami navong amumoni mukonek ka mihehutahut en sien, veni Ahi lesi mivinvin mivakur uite koa hemariso en out nesa. Veni avu keil one apurun provet keil telamu en vati sakien koanek, ka Ahi les provet keil enek amal en meten.

²⁴“Ka hetisa mok min kami koa, kosa, tounah onami houlu, veni kami miles more moulien onami tuai.

²⁵Hetisa mok min kami koa, kosa, vangomi vil, veni amai heat kami. Hetisa mok min kami koa, kosa, miviteai, veni mihouai ka mihetang.

²⁶Ka hetisa mok emun min kami navong meatin vasi keil amul avati lati isomi, veni avu keil one amumoni vatte tas en provet taluvosien keil.”

²⁷Evus, Iesu san selusien enek min meatin vasi keil vit, “Naviteni mukok min kami vasi koa mimul milong selusien keil onak: em hehat vativieh keil onom, ka kumoni hetahos min koakeil tine katuk.