Luk 24:13-43

¹³Wal det seim dei dubala men hubin bulurrum Jisas bin go langa det lilwan taun gulum Imeiyas. Det lilwan taun nomo bin longwei. Imbin oni 11 kilomita brom Jerusalem,

¹⁴en wen dubala bin wokwok langa roud, dubala bin toktok blanga ol detlot ting weya bin hepin deya langa Jerusalem.

¹⁵Wal wen dubala bin toktok blanga detlot ting, Jisas bin kamat langa dubala, en imbin wok garram dubala,

¹⁶en dubala bin luk im. Bat dubala nomo bin sabi hu im.

¹⁷En imbin askim dubala, “Wanim yunbala toktok?” Wal wen Jisas bin askim dubala lagijat, dubala bin stap, en dubala bin luk langa im brabli sedwei,

¹⁸en det wan men neim Kliyapas bin dalim Jisas, “Yu nomo sabi? Nomeda yu streinja langa Jerusalem, bat stil oni yu na nomo sabi wanim bin hepin deya las wik!”

¹⁹Wal Jisas bin tok, “Wanim bin hepin deya?” En dubala bin tok, “Det men neim Jisas brom Nesareth bin speshalwan mesinja blanga God, en ola pipul bin reken imbin oldei tok brabli strongbalawei garram pawa, en imbin dumbat ebrijing garram pawa du, en God bin brabli gudbinji langa im.

²⁰Bat ol detlot haibala serramonimen en kaunsala blanga melabat bin hendimoba im langa detlot solja blanga neilimap im langa det kros, en deibin kilim im ded deya.

²¹Melabat bin ol reken im na garra meigim ola pipul iya langa dijan kantri Isreil jidan fri. “Wal im thrideistaim na brom det taim wen deibin kilim im ded,

²²en sambala gel blanga melabat bin meigim melabat hatjamp, dumaji ailibala deibin go langa det keib,

²³en dei nomo bin faindim im bodi deya. Deibin kambek, en deibin dalim melabat deibin luk sambala einjul deya, en detlot einjul bin dalim olabat Jisas im laibala.

²⁴En sambala men bin go langa det keib, en deibin faindim im lagijat gin weya detlot gel bin tok, en dei nomo bin luk im bodi.” Lagijat na det men bin tok.

²⁵Wal Jisas bin tok, “Yunbala granggibala! Wotfo yunbala kaan bilib ebrijing detlot speshalwan mesinja blanga God bin tok?

²⁶Deibin tok det Boswan gulum Masaiya garra go thru langa ol detlot trabul na weya bin hepin langa Jisas, en im garra go thru langa detlot trabul bifo im garra jidan brabliwan bos garram det shainiwan lait blanga im.”

²⁷Brom deya Jisas bin dalim dubala ebrijing wanim det oltestaman bin tok blanga im brom Jenasis raidap langa Melakai.

²⁸Afta na wen deibin kaman gulijap langa det lilwan taun, Jisas bin wandi kipgon.

²⁹Bat dubala bin askim im, “Yu jidan garram minbala, dumaji det san im godan na, en im gulijap dakbala.” Wal Jisas bin stap garram dubala,

³⁰en wen deibin jidan blanga abum daga, Jisas bin gajim det damba, en imbin gibit theingks langa God, en afta imbin breigim det damba, en imbin gibit langa dubala.

³¹En wen imbin dum lagijat, streidawei dubala bin sabi imbin Jisas. En seimtaim Jisas bin jis gowei bifo dubala bin luk im,

³²en afta dubala bin tok, “Deya langa det roud wen imbin dalim yunmi ebrijing det oltestaman bin tok blanga im, yunmi bin abum brabli gudwan filing insaid langa yunmi jis laik yunmi bin womim miselp langa faiya.”

³³Wal streidawei dubala bin gidap, en dubala bin gobek langa Jerusalem, en wen dubala bin kamat langa det lebenbala wekinmen blanga Jisas en detlot najalot pipul, detlot pipul bin dalim dubala.

³⁴Deibin tok, “Trubala det bos bin gidap! Imbin shoum miselp langa Saiman!”

³⁵En afta dubala bin dalim olabat wanim bin hepin langa dubala langa det roud en hau dubala bin sabi Jisas wen imbin breigim det damba.

³⁶Wal wen dubala bin dalimbat olabat, Jisas bin kamat langa olabat deya gin, en imbin tok, “Gudei main braja olabat.”

³⁷Wal deibin ol bradin detmatj, dumaji deibin reken imbin dibuldibul.

³⁸Bat imbin dalim olabat, “Wotfo yumob bradin? Wotfo yumob kaan bilib langa mi?

³⁹Yumob luk main bingga en main fut. Trubala mi dijan! Yumob tatjim mi en yu garra sabi mi dijan, dumaji dibuldibul nomo garram bif en boun wulijim mi.”

⁴⁰Lagijat na Jisas bin tok langa olabat. En imbin shoum olabat im bingga en im fut.

⁴¹Bat olabat stil nomo bin bilib, dumaji olabat bin hatjamp en gudbinji detmatj. Wal Jisas bin askim olabat, “Yumob garram enijing blanga dagat?”

⁴²Wal deibin gibit im kukwan fish,

⁴³en imbin dagat en deibin lukinat langa im.