48 Nomeda mi nomo haibala gel, bat stil God bin jinggabat mi. Nomeda mi oni wekingel blanga im, bat stil imbin pikimat mi, en brom tudei na ola pipul ebriweya garra gulum mi Blesidwan.
49 Dei garra tok lagijat dumaji God bin dum loda gudbala ting blanga mi. God im brabli haibala, en im garram loda pawa. Im na det brabli Holiwan,
50 en im brabli kainbala langa ol detlot pipul brom ebri jinareishan hu rispek im.
51 God bin shoum im pawa langa ol detlot pipul hubin reken miselp haibala en meigimbat olabat ronwan plen. Imbin shoum im pawa wen imbin deigidawei ola enijing brom olabat en meigim olabat lobala.
52 God bin meigim ola haibala king jidan lobala, en imbin lidimap ola lobala pipul langa haibala pleis.
53 Imbin lukaftumbat ola hanggribala pipul garram olkain gudbala ting, en imbin jandimwei ola ritj pipul nomo garram enijing langa olabat bingga.
54 God bin kipum det pramis weya imbin meigim langa wi grengrenfatha Eibrahem, en imbin albumbat ol detlot pipul langa dijan kantri Isreil hubin bulurrum im.
55 Imbin jinggabat det pramis weya imbin meigim langa Eibrahem en langa ola biginini blanga im en langa olabat biginini du. Imbin tok im garra kain langa olabat olagija, en imbin duwit na.” Lagijat na Meri bin tok.
56 Wal Meri bin jidan deya garram Elisabeth thrimants, en afta imbin gobek langa im ron kemp.
57 Bambai na det taim bin kaman blanga det olgamen Elisabeth blanga abum det beibi, en imbin abum lilboi,
58 en wen ola fren en ola femili blanga det olgamen bin irrim det gudnyus weya God bin gud langa im, deibin ol brabli gudbinji.
59 Wal wen det beibi bin wan wik ol, imbin taim blanga sekamsais im en gibit im neim, en detlot pipul bin wandi gibit det lilboi im dedi neim Sekaraiya.
60 Bat im mami bin tok, “Nomo. Wi garra gulum im neim Jon.”
61 Wal detlot pipul bin dalim det olgamen, “Yu kaan gulum im Jon, dumaji nobodi langa yu femili garram det neim.”
62 En deibin askim det lilboi dedi, “Olmen, wanim neim yu wandi gibit det lilboi?”
63 Wal det olmen bin dalim olabat garram im bingga blanga gibit im samting blanga raidimdan det lilboi neim, en wen deibin gibit im, imbin raidimdan, “Im neim Jon.” Wal ol detlot pipul bin hatjamp wen det olmen bin gibit det neim,
64 en seimtaim God bin opinimap det mawus blanga det olmen, en streidawei imbin stat toktok en jinginat gudbinjiwei langa God.
65 Wal ol detlot fren blanga det olmen bin gida shok wen deibin irrim wanim bin hepin, en det nyus bin spredat ebriweya langa det hil kantri weya deibin jidan,
66 en ol detlot pipul hubin irrim det nyus bin jinggabat wanim bin hepin, en deibin tok, “Wotkain men dijan lilboi garra jidan wen im growap?” Lagijat na deibin tok, dumaji deibin ol sabi God bin pikimat im blanga meigim im jidan speshalwan.
67 Wal det Holi Spirit bin gowin langa det lilboi dedi Sekaraiya, en imbin meigim im tok wanim God bin wandim im blanga tok. Imbin tok,
68 “Wi garra preisim God det brabliwan Bos blanga dijan kantri Isreil, dumaji imbin kaman blanga album ola pipul blanga im en meigim wi fri.
69 God garra jandim det grengrensan blanga King Deibid. Det grengrensan im brabli strongbala, en im na garra seibum wi.
70 God bin meigim det pramis langa wi longtaim wen imbin dalim detlot speshalwan mesinja blanga im.
71 Imbin tok im garra seibum wi brom ola bedfren blanga wi en brom detlot pipul hu nomo laigim wi,
72 en imbin tok im garra jinggabat ola grengrenfatha blanga wi. En im garra kipum det pramis weya imbin meigim garram olabat.
73 Strongbalawei imbin meigim det pramis langa wi grengrenfatha Eibrahem,
74 en imbin pramis blanga gajim wi brom ola bedfren blanga wi wulijim wi garra wek blanga im en nomo bradin blanga enijing.
75 Im garra gajim wi wulijim wi garra jidan gudbalawei. Wi garra jidan raitwei langa im olagija.” Lagijat na Sekaraiya bin tok.
76 Wal det Holi Spirit bin meigim det olmen Sekaraiya tok langa det lilboi na, “Main lilboi, dei garra gulum yu det speshalwan mesinja blanga det brabli haibala God. God garra jandim det Boswan gulum Masaiya, en yu garra go lida langa im, en yu garra meigim det roud redi blanga im.
77 Yu garra dalim ola pipul God garra larramgo olabat brom olabat nogudbalawei, en im garra meigim olabat jidan fri, dumaji det God blanga wi im brabli kainbala en soribala.
