1Viyakomelezeke yayo niwawona wasenga wa kuulanga wane wema muna zimbanzi nne za isi yose, wozikimilila mheho nne za mwiisi, muladi mbeho sekezidahe kubuma muna iisi na bahali hebu muna dibiki jojose.
2Maabaho nimuwona msenga wa kuulanga imwenga viyokwela kuchanyha kulawa ulawilo wa zuwa kana muhuli wa Mulungu yeli mgima, kalandula dizi na kuwalongela wawo wasenga wa kuulanga wane weng'higwe udahi wa kuidanganyiza isi na bahali.
3Msenga wa kuulanga ija kalonga, “Sekemwiidanganyize isi hebu bahali hebu mibiki, mbaka vondachikomeleze kuwasinga muhuli muna ivihanga wasang'hani wa Mulungu wetu.”
4Maabaho, nihulika peta yawo wowasingigwe muhuli muna chila kabila da Waisilaeli, wanhu laki imwe na malongo mane na nne alufu.
5Kulawa kabila da Yuda, wanhu longo na mbili alufu kulawa kabila da Lubeni, wanhu longo na mbili alufu, kulawa kabila da Gadi, wanhu longo na mbili alufu,
6Kulawa kabila da Asheli, wanhu longo na mbili alufu, kulawa kabila da Nafutali, wanhu longo na mbili alufu, Kulawa kabila da Manase, wanhu longo na mbili alufu,
7Kulawa kabila da Semiyoni, wanhu longo na mbili alufu, kulawa kabila da Lawi, wanhu longo na mbili alufu, kulawa kabila da Isakali, wanhu longo na mbili alufu,
8kulawa kabila da Zabuloni, wanhu longo na mbili alufu, kulawa kabila da Yosefu, wanhu longo na mbili alufu, kulawa kabila da Benjamini, wanhu longo na mbili alufu.
9Maabaho nilola na niwona lung'husesa lukulu ng'hani lwa wanhu habule munhu yadahile kuwapeta. Wanhu wawo wakala wolawa chila isi na chila kabila na chila welesi na chila ulonzi. Wakala wemile haulongozi ha ichigoda cha chifalume na haulongozi ha Mwanang'hondolo, wayawala viwalo vizelu na wamha matambi ya mitende muna yamakono yawo.
10Walandula madizi, “Ulopozi wolawa kwa Mulungu wetu, yoyokala muna ichigoda cha chifalume na kulawa kwa Mwanang'hondolo.”
11Wasenga wose wa kuulanga wema kuchizunguluka chigoda cha chifalume na walala na viumbe weli na ugima waja wane, watumbala mavindi haulongozi ha chigoda cha chifalume wamtambikila Mulungu.
12Walonga, “Ivo! Nhogolwa na ukulu na ubala na hewela na hishima na udahi na ludabwa, kanavo Mulungu wetu siku zose. Ivo!”
13Imwe wa walala wawo kaniuza, “Wano wayawale ng'hanzu nzelu wawo welihi na walawahi?”
14Niye nidika, “Mwenevale weye kuvimanya.” Nayo kalonga, “Wano ni wawo wowolawa muna yamagayo makulu, wasunha ng'hanzu zawo kwa damu ya Mwanang'hondolo na kuzitenda ziwe zele.
15Lekamana wema haulongozi wa chigoda cha chifalume na womsang'hanila Mulungu imisi na ichilo muna Ikaye yake ya kuulanga. Na ija yokala muna ichigoda cha chifalume kezakuwa nawo na kuwakaliza.
16Hawezawona nzala kaidi na hawezawona ng'hilu kaidi. Hawezagazigwa na zuwa hebu vuke kali.
17Kwaviya Mwanang'hondolo iyo yeli habehi na chigoda cha chifalume chiya chili hagati kezakuwa mdimi wawo, nayo kezawalongoza kuna zinzasa za mazi ya ugima. Na Mulungu kezawahangusa masozi yawo yose.”
