Lucas 23:2-23

²Tsechonam Jesuspa contran parlar queno niyarqan: —Que nunatam tariyarqö marca mayintsiccunata queno llutanta willapäquicaqta: ‘Noqam Dios Acrashqan rey cä’ nishpam, michäcun mandacoq cesarta impuestucunata paganantsicta.

³Tsenam, Jesusta Pilatu queno taporqan: —¿Qamcu canqui israel nunacunapa reynin? —nir. Jesusnam nerqan: —¡Qammi nicanqui! —nishpa.

⁴Tsenam mandacoq caq saserdoticunata y llapan nunacunata Pilatu nerqan: —Manam ni ima jutsantapis tarïtsu que nunacho —nir.

⁵Tseno niptinnam, jina masraq bullacurcuyarqan queno nishpa: —Yachatsicuptinmi, nunacuna piñarnin autoridacunapa contran shäricurcuyan. Jinantin Judea probinsiachomi tseno yachatsicorqon. Galileapitam qallamushqa, y canannam quecho siguerqon yachatsicur.

⁶Tseno niyaptinnam, Pilatu tapucorqan: —¿Queqa Galilea nunacu? —nishpa.

⁷“Aumi” niyaptinnam, Galileacho mandacoq Herodisman Jesusta apatserqan jusgananpaq. Tsepinmi Jerusalencho Herodis quecarqan.

⁸Jesusta chäratsiyaptinnam, Herodis allapa cushïcorqan. Unepitam Jesusta reqita munarqan, pepaq allapa parlaqta wiyashqa car. Porqui shuyecarqan nopancho ima milagrullatapis ruranqanta riquetam.

⁹Pemi imecacunatapis Jesusta tapupecorqan. Peru manam Jesus yasquerqantsu.

¹⁰Tsecho quecaq mandacoq caq saserdoticuna y ley yachatsicoqcunanam tuquilayapa Jesuspa contran parlar acusecuyarqan.

¹¹Tsenam Herodis soldaduncunawan allqutsarnin burlacuyarqan. Tsepitanam chipapaq mantuta aqshurcatsir, gobernador Pilatuman cutiratserqan.

¹²Tse junaqmi Herodiswan Pilatu amishtayarqan. Puntataqa chiquinacuyarqanmi.

¹³Tsepitanam mandacoq caq saserdoticunata, autoridacunata y nunacunata qayaratsirnin,

¹⁴Pilatu queno nerqan: —Que nunatam qamcuna noqaman apayämorqonqui ‘Nunacunatam bullaman churecan’ nir. Peru nopequicunacho tapuparnin, manam ni ima jutsanta acusayanqequinoqa tarïtsu.

¹⁵Herodispis jutsanta mana tarirmi, noqaman cutiratsimorqon. ¡Que nunaqa wanunanpaqno manam ni ima mana allita rurashqatsu!

¹⁶Tsemi canan astecatsirlla, cacharishaq.

¹⁷˻Pascua fiestachomi costumbrincunamanno cachariyänan caq juc presuta.˼

¹⁸Tsechonam nunacuna juc shimilla qayaripa niyarqan: —¡Que nunaqa wanutsun! ¡Barrabasta cachariqueqa! —nishpa.

¹⁹Barrabastaqa gobiernupa contran nunacunata pelyatsiptinmi, y wanutsicushqa captinmi, llawirëcatsiyarqan.

²⁰Tsenam Jesusta cacharita munarnin, nunacunata Pilatu yape parlaparqan.

²¹Peru nunacunanam masraq qayaricurcuyarqan queno nishpa: —¡Cruscho wanutsun! ¡Cruscho wanutsun! —nishpa.

²²Tsenam quima cutichona Pilatu queno nerqan: —¿Ima mana allitataq rurashqa? Wanunanpaqnoqa manam ni ima jutsantapis tarïtsu. Tsemi astacacharcatsirninlla cacharishaq.

²³Peru nunacunanam qayariparaq niyarqan cruscho wanutsinanpaq. Mandacoq caq saserdoticuna y nunacuna tseno bullacurcuyaptinnam, mañacuyanqanno Pilatu rurarqan.