Lucangundru 7:22-44

²²Ja Jesujeli kalabana wonti ja pudlangu jatana wonti: “Tilalumai ja Johanningu kaukaubalumai, mina judla najila wapaia ja ngarala wapaia: Butjulah najiai, tjundurula wapai, gambala kulikiri pantjiai, talpakurulali ngarai, narila tepi terkakai, wangiwangieli ngantjani jaura ngari.

²³Ja murlali pirna naupini nganai, nau ngakangu wata buljubuljuriai.”

²⁴Johannini mili matja tikana, Nulu wonina wonti kana wolarani jatala Johanningundru: “Mina najila jura pitaraia palkana paraia? Kalanka kulno watarali wijawijabanani?

²⁵Mina najila jura palkana paraia? Kana kulno kati tjankanto? Mai, tana kati tjankani ja pankipankinani, mitaia Kaparaia pungani ngamai.

²⁶Mina najila jura palkana paraia? Propheta kulno? Morlalu ngani jurangu jatai: Nau morla pirna nganai Prophetani.

²⁷Naupini nau nganai, nunkangundru dakanala parai: Mai, ngato angela ngakani jinkangu mudlani ngopera jinpai, nulu palto jinkani jinkangu ngopera ngankingala nganai.

²⁸Ngangau ngani jurangu jatai: Propheta morla pirna tanangundru, widlandru dankanala, Johanningu multibanietjani wata, kulno nganai; worananau waka nganai Godaia mililani, nau morla pirna nganai nunkangu.”

²⁹Ja kana wolarali, tanali matja ngarana, ja mardatandrakampanietjali Goda talku ngundrana wonti, ja multibanila manina wonti Johannini multibanilali.

³⁰Pharisaiah ja jirijiribani jaura ngujangujara jinkinietjali Godaia jertapaterina tanangundru worarana wonti; ngangau tanali watamultibanila manina wonti nunkangundru.

³¹Kapara jatana wonti: “Worangu ngato ninapini kana nguja jeribaka kurananto? Ja worangu tanaia jeribaka nganai?

³²Tanaia kupa wakani jeribaka nganai, tana jinkimalini pirini ngamai ja karkamaliai ja jatai: Ngaiani jurangu wilpina warai, ja jura wata kilina warai; ngaiani jurangu juajuangana warai, ja jura wata jindrana warai.

³³Johannes multibanietja wokarana warai, nulu wata buka tajina ja wata waina tapana, ja jura jatai: Nulu kutji ngamalkai.

³⁴Kanaia Ngatamura wokarana warai, Nulia tajai ja tapai; ja jura jatai: Najiau! Nauja mirantjatieli tajinietja ja waina tapanietja, mardatandrakampanietjaia ja madlentji j ngankanietjaia kamaneli!”

³⁵Ja kirilali kalala maniai nunkani kupa pratjanandru.

³⁶Pharisaia kulno nunkangu ngatjina wonti, Nulu nunkangunto tajinanto; ja Nau Pharisaia pungani matja wirina Nau kurlini ngamana ngarina wonti.

³⁷Ja mai, widla kulno ngurani, nani madlentji ngankanietja nganana wonti, nandru morlalu ngujamana wonti, Nau Pharisaia pungani kurlini ngamanani, nandru Alabaster koko kulno gildinto padakana wonti.

³⁸Ja nani nunkangu tokuni terkana wonti ja jindranali wonina wonti milkigildieli nankanali tidna nunkani turibala, ja parali nankanali pudlana muja ngankala; ja nandru tidna nunkani manatapana wonti ja gildieli wiribana wonti.

³⁹Nulupini Pharisaiali, nulu nina matja karkana, jenia najina, nulu muntali ngundrana wonti ja jatana wonti: “Naupini Propheta ngananani, Nulia ngujamananto worana ja mina widla nania nganai, nandruja ninaia matja karakarana; ngangau nania madlentji ngankanietja nganai.”

⁴⁰Ja Jesujeli nunkangu kalabana wonti ja jatana wonti; “Simoniai! Ngani jinkangu minakumo jatananto.” Nau jatana wonti: “Ngujangujara jinkinietjajai, jatau!”

⁴¹Mardatandra jinkinietja kulnuni kana mandru poto wilpanto nganana wonti. Kulno nunkangu 500 mardatandra waka wilpa nganana wonti, ja kulno 50.

⁴²Ngangau pudlali wata ngamalkana wonti woljaia jinkila, nulu jenia pudlangu bakujeli jinkina wonti. Jatau, warle pudlangundru nina morla ngantjala nganai?

⁴³Simonali kalabana wonti ja jatana wonti: “Ngato ngundrai nulu, nunkangupini nulu morla bakujeli jinkina warai.” Nau nunkangu jatana wonti: “Jidni talku jatana warai.”

⁴⁴Ja Nulu widla karitjina najina wonti ja Simoningu jatana wonti: “Jundru najiai nanapini widla? Ngani jinkangu pungani wirina warai; jundru ngakangu wata ngapa tidnaia jinkina warai; nandru milkigildieli nankanali tidna ngakani wiribana warai ja parali nankanali muja ngankana Warai.