Lucangundru 20:5-13

⁵Tana warawarabijiribamalina wonti ja jatana wonti: “Ngaiani jatanani: “Pariwilpandru,” Nauja jatala nganai: Minandru jura nunkangu wata morlalu ngundrana wonti?

⁶Ngaiani jatanani: “Kanandru,” kana wolarali ngaianina mardali diaiati, ngangau tanalia morlalu ngundrai, Johannes Prophata nganana wonti.

⁷Ja tanali kalabana wonti: Ngaiani ko wodajerindru.

⁸Ja Jesus tanangu jatana wonti: “Bakana ngani jurangu wata jatai, mina ngurulali ngato jenia ngankai.”

⁹Nulu wonina wonti kana wolarani ninapini jeribaka jaura jatala: “Kana kulnujeli wain maru kurana wonti ja nina marunajmajibanietja worangu worarana wonti ja palkana wonti ditji marapu.

¹⁰Ditji talkuni nulu marunajinajibanietja worangu mili kulno jinpana wonti, tanali nunkangu wain maruja tandra jinkinanto; ja marunajinajibanietja worali nina nandrana wonti, ja nina kala jinpana wonti.

¹¹Ja nakaldra nulu mili kulno jinpana wonti; bakana ninapini tanali nandrana wonti, ja nina ngirkibana wonti, ja nina kala jinpana wonti.

¹²Ja nulu mili kulno morla jinpana wonti; tanali bakana nunkangu tapa jinkina wonti, ja nina palarani worarana wonti.

¹³Wain maruja kapara jatana wonti: “Mina ngato ngankananto? Ngato ngatamura ngantjalu ngakani jinpala nganai; tanali nina najinani, tana nintali warawararila nganai kara.”