1 Tɔʋ, tǝ́ nyǝnnɑ tɑ́ cɑɑnɑɑ cɑɑ sɔsɔ Apǝlɑhɑm kiŋ nɑ tǝ́ nɑ́. Pepeɣe ɩ hikɑɑ?
2 Ye tǝmɑ kʋlɑpɛɛ tɔɔ kɛ́ Ɩsɔ kɑ nyǝnɑ-ɩ yʋlʋpɑŋ ɩlɛ ɩ tɑɑ lɑŋ mpi ɩ kɑ́ sɑnɑ ɩ tɩ tɔ. Amɑ ɩ kɑɑ tɩɩ pǝsɩ nɑ ɩ́ sɑ ɩ tǝɣɩ Ɩsɔ ɩsɛntɑɑ mɛɛ.
3 Pǝ tɑɣɑ pʋlʋ, pɑ yɔɣɔtɑ Ɩsɔ Tɔm tɑɑ kɛ́ sɩ, Apǝlɑhɑm tɛmɑ Ɩsɔ nɑ ɩ tɑɑ, nɑ ɩ tɑɑ tɛm mpǝɣɩ Ɩsɔ nɑ́ nɑwɑ nɑ ɩ́ yɑɑ-ɩ yʋlʋpɑŋ nɑ ɩ́ mʋ-ɩ.
4 Yʋlʋ ɩ́ lɑkɩ tǝmlɛ, pɑ fɛlǝɣɩ-ɩ kɛ́ mɛɛ. Ɩlɛ pɑ kɑɑ yɑɑ ɩ kʋfɛlʋɣʋ ŋkʋ sɩ kʋhɑʋ, ɩ ɩwɩɩlɛ lonte kɛ pɑ fɛlɑ-ɩ.
5 Ɩlɛ pɑɑ yʋlʋ tɑ lɑ tǝmlɛ nɑ ɩ́ tɛ Ɩsɔ wei ɩ wiiki ɑsɑɣɑɑ kʋnyɔŋ tɔ nɑ ɩ tɑɑ kɛ́ kʋtɛm, Ɩsɔ nyǝnǝɣɩ pʋntʋ tɑɑ tɛm tɔtɔɣɔ, nɑ ɩ́ mʋ-ɩ sɩ ɩ kɛ́ kʋpɑŋ.
6 Pǝ tɔɔ mɑɣɑmɑɣɑ kɛ Tɑfiiti yɔɣɔtǝɣɩ wei Ɩsɔ mʋwɑ sɩ ɩ kɛ́ yʋlʋpɑŋ nɑ ɩ́ tɑ́ kɛɛsǝnɑ ɩ tǝmɑ tɔ ɩ lɑŋhʋlʋmlɛ tɔm sɩ:
7 Leleŋ nɩɩlɑɑ ntɛ́ mpɑ pɑ pǝntɑɑ nɑ Ɩsɔ hʋ́lɩ́-wɛɣɛ suulu tɔ. Pǝyele ɩ hɩɩsɑ pɑ ɩsɑɣɑtʋ.
8 Leleŋ nɩɩlʋ ntɛ́ wei ɩ ɩsɑɣɑtʋ Ɩsɔ lɔwɑ tɔ.
9 Pɛllɑɑ tike nɩɩkǝnɑ leleŋ ɩnɛ? Kʋtɑpɛlǝŋ nɑɑ nɩɩkɩ-ɩ? Tǝ tɛmɑ yɔɣɔtʋɣʋ kɛ nɔɔnɔɔ sɩ Apǝlɑhɑm tɛmɑ Ɩsɔ nɑ ɩ tɑɑ, nɑ ɩ tɑɑ tɛm mpǝɣɩ Ɩsɔ nɑ́ nɑwɑ nɑ ɩ́ yɑɑ-ɩ yʋlʋpɑŋ nɑ ɩ́ mʋ-ɩ.
10 Ɩlɛ wɑɑtʋ wei kɛ́ pǝ lɑpɑ mpʋ? Wɑɑtʋ wei ɩ pɛlɑɑ tɔ, yɑɑ nɑ pǝ́cɔ́ ɩ́ pɛlǝɣɩ? Aɑɩ nɑ pǝ́cɔ́ ɩ́ pɛlǝɣɩ kɛ́.
11 Wɑɑlɩ wɑɑlɩ kɛ́ pɑ pɛlɑ-ɩ, nɑ ɩ pɛlʋɣʋ mpɩ pǝ hʋlɑɑ kɛ́ sɩ ɩ lɑɑlɑɑ nɑ ɩ́ tɛ Ɩsɔ nɑ ɩ tɑɑ tɔɣɔ ɩ́lɛ́ ɩ mʋ-ɩ sɩ yʋlʋpɑŋ. Pǝ́cɔ́ wɑɑtʋ ɩnɩ ɩ tɑɑ pɛlǝtɑ. Ḿpʋ́ɣʋ́ pǝ lɑpɑ nɑ Apǝlɑhɑm pǝsɩ pɑ tǝnɑ mpɑ pɑ tɛŋnɑ Ɩsɔ kɛ́ pɑ tɑɑ kɛ́ mpʋ nɑ ɩ́ mʋɣɩ-wɛ sɩ kʋpɑmɑ tɔ pɑ cɑɑ, pɑɑ pɑ tɑ pɛlɩ.
12 Ɩ pǝsɑ pɛllɑɑ cɑɑ tɔtɔ. Ɩlɛ pǝ tɑɣɑ mpɑ pɑ mʋɣʋlǝɣǝnɑ pɛlʋɣʋ tɔm tike tɔɣɔ mɑ tɔŋ. Amɑ mpɑ pɑ tǝŋɑ tɑ́ cɑɑ Apǝlɑhɑm ɩkpɑtɛ nɑ pɑ́ tɛ Ɩsɔ nɑ pɑ tɑɑ ɩsɩɩ ɩ́lɛ́ ɩ kɑ tɛmnɑʋ Ɩsɔ nɑ ɩ tɑɑ nɑ pǝ́cɔ́ pɑ́ pɛlǝɣɩ-ɩ tɔɣɔ.
13 Ɩsɔ kɑ heelɑ Apǝlɑhɑm nɑ ɩ piyɑ sɩ kɑteŋɑ kɑnɛ kɑ tǝnɑ kɑɑ tɛ nɑ kɑ́ pǝsɩ pɑ nyǝm tǝkpɑtɑɑ. Ɩlɛ pǝ tɑɣɑ kʋsǝsɩɩtʋ tǝŋʋɣʋ tɔɔ kɛ́ pɑ heelɑ Apǝlɑhɑm kɛ mpʋ. Amɑ ɩ tɛmnɑ Ɩsɔ kɛ́ ɩ tɑɑ nɑ ɩ́lɛ́ ɩ́ mʋ-ɩ sɩ yʋlʋpɑŋ tɔɣɔ.
