LEVITIKO 9:2-13

²Ia ese Aaron e haduaia, eto, Boromakau natuna maruanena asi bebeka-bebekana ta bavabia, kara-rea boubouna, bona mamoe maruanena asi bebeka-bebekana ta bavabia, ḡole-oho boubouna, ruaosi na Iehova vairanai bavaladia mase, emu boubou.

³Israel taudia danu ba haduadia, baoto: Nani maruanena ta bavabia, kara-rea boubouna, bona boromakau natuna ta bona mamoe natuna ta, ruaosi laḡani tamona ḡaudia asi bebeka-bebekadia, bavabidia, ḡole-oho boubouna;

⁴bona boromakau maruanena ta bona mamoe maruanena ta bavabidia, herohemaino boubouna; iboudiai na Iehova vairanai baita aladia mase, emui boubou. Flaoa boubouna danu, dehoro ida e buloa ḡauna, bavabia. Badina be hari dina ai Iehova be hahedinarai henimuimu.

⁵Bena Mose ese e gwaurai ḡaudia idia ese hebou kalagana vairanai e mailaidia, bona taunimanima iboudiai e raka kahi mai, Iehova vairanai e gini.

⁶Bena Mose eto, Iehova ena hahedua karadia bini; ia diaridiarina danu vairamui ai baine hedinarai.

⁷Mose ese danu Aaron e hamaoroa, eto, Ihaboulaina patana ba raka henia kahi, emu kara-rea boubouna bona emu ḡole-oho boubouna ḡaudia bavaladia mase, daimu ai bona ina orea taudia daidiai herohemaino karana be karaia; idia edia boubou ḡaudia danu ba mailaidia, idia daidiai ba herohemaino; Iehova ena haheḡani heḡereḡerena.

⁸Taunabunai Aaron na ihaboulaina patana e raka henia kahi, boromakau natuna maruanena e alaia mase, ia sibona ena kara-rea boubouna.

⁹Bena Aaron natuna ese rarana e abia, tamadia e henia; bena ia ese imana kwakikwakina rara ai e urua diho, ihaboulaina patana ai doa e dahulai, bena rara orena na ihaboulaina patana badinai e bubua nege.

¹⁰A digara bona nadinadi bona ase digarana, hari kara-rea boubouna ḡaudia, na ia ese e abi, ihaboulaina patana ai e gabu, Iahi ese e ḡole-oho, Iehova ese Mose e haḡania heḡereḡerena.

¹¹Bena hidiona bona kopina taruha murimurinai e gabu, Iahi ese e ḡole-oho.

¹²Una murinai ia ese ḡole-oho boubouna e alaia mase. Bena Aaron natuna ese rara e abia, tamadia e henia; bena ia ese ihaboulaina patana latanai bona badinai e nevaria heḡeḡe.

¹³Bena idia ese ḡole-oho boubouna tau-aninae regea sisi ḡaudia na taidia taidia amo e henia, bona kwarana danu; bena ia ese ihaboulaina patana latanai e gabudia, Iahi ese e ḡoledia oho.