LEVITIKO 7:1-38

¹Kara-dika boubouna taravatuna binai: ia na helaḡa herea.

²Kara-dika boubouna ḡauna na bae alaia mase, ḡole-oho bouboudia ḡaudia e aladia masemu gabuna ai. Hahelaḡa tauna ese rara na ihaboulaina patana latanai bona badinai baine nevaria heḡeḡe.

³Digarana idoinai na boubou ḡauna ai bainela: iuna digarana, bona boga bona bogarau urubina,

⁴bona nadinadi ruaosi mai digaradia ida, bona demodo, bona ase digarana. Idoinai baine abia,

⁵ihaboulaina patana latanai baine gabua, lahi ese baine ḡolea oho; ia na kara-dika boubouna Iehova ena.

⁶Maruane iboudiai hahelaḡa taudia edia orea ai ese bae ania diba: gabu helaḡana ai bae ania: ia na helaḡa herea.

⁷Kara-rea boubouna bona kara-dika boubouna taravatudia na tamona: hahelaḡa tauna, herohemaino ḡauna ai baine halaoa tauna, ia ese anina baine abia.

⁸Hahelaḡa tauna ese tau ta ena ḡole-oho boubouna baine hahelaḡaia negana ai, ia ese boubou ḡauna, e hahelaḡaia ḡauna, kopina baine abia iena.

⁹Bona flaoa bouboudia, amu ai e guramu eiava uro ai e nadumu eiava ataga ai e gabumu, hahelaḡa tauna, una boubou ḡauna e hahelaḡaiamu tauna, ese baine abia iana.

¹⁰Flaoa boubouna, mai dehoro ida e buloa ḡauna, eiava flaoa kaukauna, ia danu Aaron natuna adia, unu haida heḡereḡeredia.

¹¹Herohemaino bouboudia Iehova bae henia taravatuna binai.

¹²Tau ta ese hahenamo boubouna baine mailaia, ia na ena boubou ḡauna ida se hatubua flaoana dehoro ida e bulo dikeadia, bona se hatubua flaoana atagadia, latadiai dehoro e seia ḡaudia, bona flaoa namo-hereana dehoroida e buloa bena e gabua, baine mailai.

¹³Ena herohemaino boubouna ida e hatubua bona e gabua flaoana danu baine mailaia, ena hahenamo boubouna.

¹⁴Herahia ta ta amo dikea eiava ataga eiava igabu ta ta bae dudui isi Iehova vairanai; bena hahelaḡa tauna, herohemaino boubouna rarana ihaboulaina patana ai baine nevaria tauna, baine abia iana.

¹⁵Ena herohemaino bouboudia hidiodia, hahenamo ḡaudia, na bae hahelaḡadia dinana ai bae anidia, bahu taina basine mia rani.

¹⁶A baine mailaia ḡauna, na gwau hamata dainai baine mailaia, eiava herahia ḡauna, bae hahelaḡaia dinana ai bae ania, ma bahu dina iharuana ai bae ania.

¹⁷A boubou ḡauna hidiona taina baine mia ela bona dina ihatoina, una na lahi ai bae haḡolea oho.

¹⁸Bema herohemaino boubouna hidiona na dina ihatoina ai bae ania, Iehova ese basine abia dae, bona e mailaia tauna basine hanamoa; ia na baine miro, bona baine ania tauna baine kerere.

¹⁹Vamu hidiona na ḡau mirona enai baine dau kau, idia na basie ania: Iahi ai bae haḡolea oho. Hidio ḡoevadia na ḡoḡoeva taudia ese bae ani;

²⁰a mai mirona tauna ese Iehova ena herohemaino bouboudia hidiodia bema ani, ia na ena bese amo bae negea daure;

²¹bona tau ta ese taunimanima edia ḡau mirona ta, eiava mauri ḡaudia mirodia ta, eiava ḡau mirona eiava bodagana ta, bema daua toho, murinai Iehova ena herohemaino bouboudia hidiodia bema ani, ia na ena bese amo bae negea daure.

²²Iehova ese Mose ma e hereva henia, eto,

²³Israel taudia ba hamaorodia, baoto: Digara basio ania, boromakau digarana eiava mamoe digarana eiava nani digarana.

²⁴Baine mase kava ḡauna, eiava uda ḡaudia ese bae alaia ḡauna, digarana na emui ḡaukara ta ḡauna ai bainela, to basio ania.

²⁵Badina be tau ta ese digara baine ania, taunimanima ese edia boubou ai e halaodiamu bona Iehova vairanai e haḡoledia ohomu ḡaudia ta digarana, ia na ena bese amo bae negea daure.

²⁶Rara danu basio ania, manu ta eiava mauri ḡauna ta rarana, emui ruma iboudiai lalodiai.

²⁷Rara baine ania tauna na ena bese amo bae negea daure.

²⁸Iehova ese Mose ma e hereva henia, eto,

²⁹Israel taudia ba hamaorodia, baoto: Iehova ena herohemaino boubouna baine mailaia tauna ese ena herahia baine mailaia Iehova ena. Herohemaino boubouna amo

³⁰ia sibona ese ena ḡole-oho boubouna Iehova enai baine mailaia, kemena maidigarana ida ia imana ai baine mailaia, Iehova vairanai baine davea, davedave boubouna ḡauna ai bainela.

³¹Bena digarana na hahelaḡa tauna ese ihaboulaina patana latanai baine gabua, Iahi ese baine ḡolea oho, a kemena na Aaron mai natuna ida adia.

³²Emui herohemaino bouboudia ḡaudia amo danu aedia idibadia ba dudui isi, hahelaḡa tauna ana;

³³edena tau, Aaron natuna edia amo, herohemaino boubouna digarana bona rarana baine hahelaḡadia, ia ese aena idibana baine abia, ia ahuna.

³⁴Badina be kemena e daveamu ḡauna bona aena idibana e duduia isimu ḡauna na lau ese Israel taudia ediai vada na abi, edia herohemaino bouboudia amo, hahelaḡa tauna Aaron mai natuna Ioḡora ida vada na henidia, idia ahudia korikori, Israel taudia ediai bae abi, ela bona hanaihanai.

³⁵Aaron mai natuna ida ahudia bunu, Iehova ena ḡole-oho bouboudia amo, Iehova ese e henidia ia vairanai e hahelaḡadia bona hahelaḡa taudia ai e halaodia dinana ai.

³⁶Iehova ese e hahedua, e horodia dinana ai, eto Israel taudia ese unu ḡau bae henidia hanaihanai, idia ahudia korikori uru iboudiai lalodiai.

³⁷Ḡole-oho bouboudia bona flaoa bouboudia bona kara-rea bouboudia bona kara-dika bouboudia bona hahelaḡa taudia ihahelaḡadia bona herohemaino bouboudia taravatudia bunu,

³⁸Iehova ese Sinai ororona ai Mose e haḡanilaia heḡereḡerena. Dinana bunai, ia ese Israel taudia e haḡanidia edia boubou ḡaudia Iehova dekenai bae mailaidia, Sinai tano-ḡaḡaena ai.