4 Bema tau ta ese ia gwauhamata kava, do ia gwau, kara dikana ta, o kara namona ta do ia karaia, ia laloa namonamo lasi dainai, gabeai ia diba ia karaia diba lasi neganai, ia be ia kerere.
5 Unai bamona karadia dainai idia kerere taudia ese edia kara dika do idia gwauraia hedinarai.
6 Bona edia kara dika edia davana karaia totona, Lohiabada dekenai mamoe hahine o nani boubouna do idia mailaia. Hahelagaia tauna ese inai taudia edia kara dika dainai, edia boubou be Lohiabada dekenai do ia henia.
7 Bema tau ta be moni lasi dainai mamoe o nanigosi ia hoia diba lasi neganai, ia ese Lohiabada dekenai manu edia ladana kerea rua, o pune rua do ia mailaia. Ta be kara dika totona boubouna, ma ta be gabua ore boubouna.
8 Unai tau ese inai manu be hahelagaia tauna dekenai do ia mailaia. Vadaeni hahelagaia tauna ese kara dika boubouna do ia henia guna. Manu ena aiona do ia mogea, to do ia utua parara lasi.
9 Manu ena rarana haida be boubou patana ena badinai do ia bubua. Inai be kara dika gwauatao totona ena boubouna.
10 Unai murinai manu iharuana be gabua ore ena boubou totona do ia henia, Dubu ena taravatu hegeregerena. Inai bamona dekenai hahelagaia tauna ese unai tau ena kara dika dainai boubou do ia henia, bona Lohiabada ese unai tau ena kara dika do ia gwauatao.
11 Bema tau ta be moni lasi dainai kerea rua o pune rua ia hoia diba lasi, ia ese paraoa ena metau kilogaram ta do ia mailaia, ena kara dika totona. Ia ese olive dehoro o bonana namona muramura do ia atoa lasi, badina inai be kara dika totona ena boubou.
