LEVITIKO 3:2-15

²Ia ese imana na ena boubou ḡauna kwarana ai baine atoa kau, bena baine alaia mase, hebou kalagana iduarana ai. Bena Aaron natuna, hahelaḡa taudia, ese rarana bae abia, ihaboulaina patana latanai bona badinai bae nevaria heḡeḡe.

³Herohemaino boubouna, lahi ese baine ḡolea oho ḡauna, baine heni negana ai, Iehova baine henia ḡaudia bini: boga bona bogarau urubina,

⁴bona nadinadi ruaosi mai digaradia, bona demodo bona ase digarana. Ia ese baine abidia;

⁵bena Aaron natuna ese ihaboulaina patana lahina latanai ḡole-oho boubouna ḡauna ida bae gabudia. Ia na ḡole-oho boubouna, bonana namo ḡauna Iehova ena.

⁶Herohemaino boubouna baine mailaia, Iehova ena, bema mamoe eiava nani, ia na maruane eiava hahine asi bebeka-bebekana baine mailaia.

⁷Bema mamoe natuna baine heni, ena boubou, ia ese Iehova vairanai baine atoa,

⁸imana na ena boubou ḡauna kwarana ai baine atoa kau, bena hebou kalagana vairanai baine alaia mase. Bena Aaron natuna ese rarana bae abia, ihaboulaina patana latanai bona badinai bae nevaria heḡeḡe.

⁹Ina herohemaino boubouna amo, lahi ese baine ḡolea oho ḡaudia, Iehova ena, baine abi ḡaudia bini: iuna mai digarana idoinai ida ela bona doru turiana, bona boga bona bogarau urubina,

¹⁰bona nadinadi ruaosi mai digaradia, bona demodo bona ase digarana.

¹¹Hahelaḡa tauna ese baine gabua, ihaboulaina patana latanai: ia na boubou anianina, ḡole-oho boubouna, Iehova ena.

¹²Bema nani baine heni, ena boubou, ia ese Iehova vairanai baine atoa,

¹³imana na ena boubou ḡauna kwarana ai baine atoa kau, hebou kalagana vairanai baine alaia mase. Bena Aaron natuna ese rarana bae abia, ihaboulaina patana latanai bona badinai bae nevaria heḡeḡe.

¹⁴Ena boubou ḡauna amo, lahi ese baine ḡole oho ḡaudia, Iehova ena, baine abi, ḡaudia bini: boga bona bogarau urubina,

¹⁵bona nadinadi ruaosi mai digaradia ida, bona demodo bona ase digarana.