LEVITIKO 2:2-15

²Baine mailaia Aaron natuna, hahelaḡa taudia, dekediai; bena flaoa mai dehorona taina bona muramura mai bonana idoinai baine abi; bena hahelaḡa tauna ta ese ihaboulaina patana latanai baine gabu, lahi ese baine ḡole-oho. Una na helalo toana, ḡole-oho boubouna, bonana namo ḡauna Iehova ena.

³A flaoa boubouna orena na Aaron mai natuna ida adia; Iehova ena ḡole-oho bouboudia iboudiai ia mo helaḡa herea.

⁴Flaoa amu ai o gabua ḡauna boma mailaia emu boubou ḡauna, ia na flaoa namo-hereana amo ba karaia; ihatubuna muramurana basio abia, a flaoa na dehoro ida ba bulo, eiava ba gabua kava, murinai dehoro ia latanai ba seia.

⁵Eiava ataga boma mailaia emu boubou ḡauna, ia danu flaoa namo-hereana amo ba karaia; ihatubuna muramurana basio abia, a flaoana dehoro ida ba bulo.

⁶Ba bakia sisi sisi, latanai dehoro ba seia: ia na flaoa boubouna.

⁷Eiava emu boubou flaoana na uro ai boma nadua, ia danu flaoa namo-hereana amo ba karaia, mai dehorona.

⁸Flaoa boubouna na unu ba karaia toma, bena Iehova enai ba mailaia, hahelaḡa tauna ese baine abia, ihaboulaina patana vairanai baine laohaia.

⁹Bena hahelaḡa tauna ese flaoa boubouna amo helalo toana baine abia, ihaboulaina patana ai baine gabua, ḡole-oho boubouna ai bainela, bonana namo ḡauna Iehova ena.

¹⁰Flaoa boubouna orena na Aaron mai natuna ida adia; Iehova ena ḡole-oho bouboudia iboudiai ia mo helaḡa herea.

¹¹Flaoa boubouna mai ihatubuna muramurana basio mailaia Iehova enai; hatubu muramurana eiava bada-ranuna na boubou ḡauna ai basio halaoa, Iehova ena ihaboulaina patana lahina ai basio gabua.

¹²Unu na kohu ikaroadia herahiana na ba laohai Iehova enai, to ihaboulaina patana ai basio gabudia, bonadia na unu amo basie dae.

¹³Emu flaoa bouboudia iboudiai na ba damenadia: emu flaoa boubouna na Iehova ena herohemaino damenana ai basie dabu; emu boubou iboudiai ida damena danu ba heni.

¹⁴Emu uit ba karoa, herahia karoana Iehova ba henia, negana ai, uit anidia do asie auka ḡaudia bavabi, lahi latanai ba hakaukaudia, bena ba gwadadia, kopidia ba nege.

¹⁵Bena latadiai dehoro ba seia, bona latadiai danu muramura mai bonana bavato kau: ia danu flaoa boubouna ḡauna.