LEVITIKO 24:7-16

⁷Ere ruaosi latadiai muramura mai bonana ḡoeva-daena bavatoa kau, iana flaoa ida helalo-tao toana ai baela, bona lahi boubouna ai baela, Iehova ena.

⁸Dina Helaḡa ta ta ai, hahelaḡa tauna ese flaoa helaḡana unu baine dabaraia toma Iehova vairanai; Israel taudia daidiai baine dabaraia, herohemaino toana, baine hesiriu hanaihanai.

⁹Una flaoa na Aaron mai natuna ida adia; gabu helaḡana ai bae ania, Iehova ena Iahi bouboudia iboudiai ia mo sibona helaḡa herea. Mia-hanaihanai taravatuna bunai.

¹⁰Tau ta, sinana na hane Israel, tamana na Aigupto tauna, e raka lasi. Israel taudia bogaragidiai: bena ia na Israel tauna korikorina ta ida e heai. taruha lalonai.

¹¹Bena hari hane Israel natuna ese Lada Helaḡana e uduguiraia, hereva metaudia e gwaurai. Bena haida ese e hakaua lao, Mose vairanai. Sinana ladana na Selomiti Dibri, Dan iduhuna hahinena.

¹²Bena e ḡuia, ela bona Iehova ena hahemaoro herevana bae diba.

¹³Bena Iehova ese Mose e hamaoroa, eto,

¹⁴Heuduguirai tauna na taruha murimurinai ba hakaua lasi; bena ena heuduguirai herevadia e kamonai taudia iboudiai ese imadia na ia tubuana ai bae ato kau, murinai hebou taudia iboudiai ese nadi amo bae hodoa mase.

¹⁵Israel taudia ba hadibadia danu, ena Dirava baine uduguiraia tauna ese sibona ena dika madunana baine huaia.

¹⁶Iehova ladana baine uduguiraia tauna na baine mase; hebou taudia iboudiai ese bae hodoa mase. Ena be noho-hedoa tauna eiava Israel tauna korikori, to Lada Helaḡana bema uduguiraia, vada bae hodoa mase.