LEVITIKO 21:8-23

⁸Oi ese ia ba hahelaḡaia, badina be emu Dirava ena flaoa ia ese baine hahelaḡaia; bena emu ai baine helaḡa, badina be lau Iehova, umui ihahelaḡamui Diravana, na helaḡa.

⁹Hahelaḡa tauna natuna hahinena baine lebulebu, bena ena lebulebu amo ia ese tamana baine hahemaraia, vada bae hamasea lahi ai.

¹⁰Hahelaḡa tauna badana, tadikakana e biagudiamu tauna, dehoro helaḡana e horolaia tauna, e hahelaḡaia dabua helaḡadia baine dokilai tauna, ia ese huina basine ḡiḡi rohoroho, bona ena dabua basine dare.

¹¹Mase ta basine raka henia kahi; ena be tamana eiava sinana, to ia latanai e helaḡalaimu karadia ai basine dau kau.

¹²Gabu helaḡana basine rakatania, ena Dirava ena gabu helaḡana basine hahemaraia; badina be ena Dirava ena dehoro helaḡana ese vada e hahelaḡaia. Lau binai Iehova.

¹³Hane-ulato rami-hebou ta baine adavaia;

¹⁴vabu eiava diho hahinena eiava vada e hamiroa hahinena eiava ariara hahinena basine adavaia. Hane-ulato rami-hebou ta, ena beseamo mo, baine adavaia;

¹⁵unu amo natuna na basie hemarai ena bese taudia bogaragidiai; badina be lau Iehova ese vada na hahelaḡaia.

¹⁶Iehova ese Mose ma e hereva henia, eto,

¹⁷Aaron ini ba hamaoroa toma, baoto: Uru ta ai emu iduhu tauna ta bema mai bebeka-bebekana, iana basine raka kahi mai, ena Dirava ena flaoa ihahelaḡana.

¹⁸Badina be tau-anina mai bebeka-bebekana tauna na basine raka kahi mai: mata-kepulutauna, eiava ae-hedairike tauna, eiava vairana eiava regena ta mai berona tauna,

¹⁹eiava imana eiava aena e bero tauna,

²⁰eiava doru-laoho tauna, eiava tau kwadogi-herea eiava mata-gegeva tauna, eiava kopi-hemaihemai gorerena tauna, eiava kopina mai taohana tauna, eiava abona nadinadina e heala tauna.

²¹Asi tauna ta Aaron ena iduhu amo mai bebeka-bebekana baine raka kahi mai, boubou ḡaudia lahi ai baine hahelaḡadia Iehova ena, eiava ena Dirava ena flaoa baine hahelaḡaia, totona.

²²Ena Dirava ena flaoa, helaḡa ḡauna bona helaḡa-herea ḡauna, baine ani diba;

²³a seseahu basine raka henia kahi, bona ihaboulaina patana basine raka henia kahi, badina be ia na mai bebeka-bebekana. Una dainai, ia na lauegu gabu helaḡadia basine hamirodia; badina be lau Iehova ese vada na hahelaḡadia.