LEVITIKO 13:2-53

²Tau ta kopina baine gudu, eiava baine taoha, eiava mai toutouna kurokurona, lepra na heto, una tau bae hakaua vareai hahelaḡa tauna Aaron vairanai, eiava hahelaḡa tauna Aaron natuna ta vairanai.

³Bena hahelaḡa tauna ese kopina baine itaia, bema una kopi dikana derana danu kurokuro, bona toutouna na dia kopina ai mo to sisina dobu, una na lepra: hahelaḡa tauna ese baine itaia bena ia ese una tau baine gwauraia, vada e miro.

⁴A bema toutou na kurokuro, to kopina ai mo, bona derana na se kurokuro, hahelaḡa tauna ese una tau baine koua ahu ela bona dina hitu bae ore.

⁵Bena dina ihahituna ai hahelaḡa tauna ese baine itaia lou: toutou bema gabuna ai mo, se dika bona se bada, hahelaḡa tauna ese ma baine koua lou, ela bona dina hitu ma bae ore.

⁶Ma dina ihahituna ai hahelaḡa tauna ese baine itaia lou: toutou bema maraḡi bona dia dobu, hahelaḡa tauna ese baine gwauraia, vada e ḡoeva. Una na idau toto taohana. Ena dabua baine huri, bena baine ḡoeva.

⁷Ḡau tamona, hahelaḡa tauna ese baine kahua nege, murinai una toutou ma baine bada lou, ia na hahelaḡa tauna dekena ma baine lou lao.

⁸Bena hahelaḡa tauna ese baine itaia, toutou na momokani vada e bada, ia na una tau baine gwauraia, vada e miro; ia na lepra tauna.

⁹Lepra toadia bae hedinarai tau ta kopina ai, ia na hahelaḡa tauna vairanai bae hakaua vareai.

¹⁰Bena hahelaḡa tauna ese ḡou kurokurona baine itaia una tau kopina ai, bona baine itaia danu una ḡou na mai berona bona derana e kurokuromu:

¹¹una na lepra ḡouna ia kopina ai. Hahelaḡa tauna ese baine gwauraia, vada e miro. Basine koua ahu lou, badina be ia na miro momokani.

¹²A hahelaḡa tauna ese baine itaia, lepra be kopina idoinai vada e daea, kwarana amo ela bona aena,

¹³ia ese baine itaia namonamo; bema momokani kopina idoinai vada e daea vaitani, ia ese una tau baine gwauraia, vada e ḡoeva. Kopina idoinai vada e kurokuro dainai, ia na vada e ḡoeva.

¹⁴A hidio berona ienai bema hedinarai, ia na baine miro;

¹⁵hahelaḡa tauna ese bero baine itaia, bena baine gwauraia, vada e miro. Una bero be miro toana; una tau be lepra tauna.

¹⁶A hari hidio berodia ma bae namo, bona kopina baine kurokuro, ia na hahelaḡa tauna vairanai ma bainela.

¹⁷Hahelaḡa tauna ese baine itaia: bema hidio berodia vada e kurokuro, hahelaḡa tauna ese baine gwauraia, vada e ḡoeva.

¹⁸Tau ta kopina ai iohururu ta vada e namo

¹⁹gabuna amo gudu kurokurona eiava toutou mia-kakana baine hedinarai, hahelaḡa tauna bae haheitalaia.

²⁰Hahelaḡa tauna ese baine itaia, toutou na sisina dobu bona derana danu kurokuro, ia ese una tau baine gwauraia, vada e miro; una na lepra, iohururu gabuna amo e vara.

²¹A baine itaia, dera na se kurokuro, bona toutou na kopina ai mo bona dia kurokuro herea eiava dia kakakaka herea, hahelaḡa tauna ese una tau baine koua ahu ela bona dina hitu bae ore;

²²una negana ai toutou bema bada, ia ese baine gwauraia vada e miro; una na lepra.

²³A toutou na gabuna ai mo bema mia, basinema bada, una na iohururu kiparana mo; hahelaḡa tauna ese baine gwauraia, vada e ḡoeva.

²⁴Tau ta kopina na lahi ese e araia berona gabuna ai baine toutou, mia-kaka eiava kurokuro,

²⁵hahelaḡa tauna ese baine itaia. Bema dera vada e kurokuro, bona toutou na sisina dobu, una na lepra, Iahi ese e araia gabuna amo vada e vara. Hahelaḡa tauna ese baine gwauraia, vada e miro; badina be ia na lepra tauna.

²⁶A baine itaia, dera na se kurokuro, bona toutouna kopina ai mo, bona dia kurokuro herea eiava dia kakakaka herea, hahelaḡa tauna ese una tau baine koua ahu ela bona dina hitu bae ore.

²⁷Dina ihahituna ai hahelaḡa tauna ese baine itaia Iou: toutou bema bada, ia ese una tau baine gwauraia, vada e miro; una na lepra.

²⁸A toutou na gabuna ai mo bema mia, basinema bada, ena kurokuro eiava ena kakakaka danu bema maraḡi, una na lahi kiparana mo. Hahelaḡa tauna ese baine gwauraia, vada e ḡoeva; badina be una na e ara gabuna kiparana mo.

²⁹Tau ta kwarana eiava auki-huina baine pouka, eiava hahine ta kwarana baine pouka,

³⁰hahelaḡa tauna ese una pouka baine itaia: totototona bema sisina dobu, bona huina bema labora, ia ese una tau eiava una hahine baine gwauraia, vada e miro; una na pouka dikana, lepra heḡereḡerena.

³¹A una pouka baine itaia, totototo bema kopina ai mo bona huina na do korema, hahelaḡa tauna ese una tau eiava una hahine baine koua ahu ela bona dina hitu bae ore.

³²Bena dina ihahituna ai hahelaḡa tauna ese una pouka baine itaia lou: bema se bada bona huina se labora bona kopina ai mo,

³³una tau eiava una hahine huina bae naua, a pouka gabuna mo basie naua; una murinai ma bae koua ahu lou dina hitu.

³⁴Bena dina ihahituna ai hahelaḡa tauna ese ma baine itaia lou: bema se bada bona kopina ai mo, ia ese una tau eiava una hahine baine gwauraia, vada e ḡoeva. Ena dabua baine huridia, bena baine ḡoeva.

³⁵A baine ḡoeva murinai una pouka ma baine hekara lou,

³⁶hahelaḡa tauna ese ma baine itaia. Totototo bema bada herea, ia huina vada e labora eiava lasi basine laloa; ia ese una tau eiava una hahine baine gwauraia, vada e miro.

³⁷A baine itaia, totototo na dia bada herea bona huina na korema, ia na baine diba gorere vada be namomu, bona una tau eiava una hahine vada e ḡoeva; bena baine gwauraia, vada e ḡoeva.

³⁸Tau ta eiava hahine ta kopina ai toutou kurokurodia bae hedinarai,

³⁹hahelaḡa tauna ese unu toutou baine itadia. Bema toutou na dia kurokakuroka, una na kopi gorerena mo: ia na ḡoeva.

⁴⁰Tau ta huina bema hehuhu, kwarana tubuana bema boha, to ia na ḡoeva.

⁴¹Eiava ramana bona medena bema hehuhu, una na rama-boha mo: ia na ḡoeva.

⁴²A bema kwarana tubuana ai eiava ramana ai, huina vada e hehuhu gabuna ai, toutou mia-kakana ta baine hedinarai, una na lepra, boha tauna kwarana ai eiava ramana ai vada e vara.

⁴³Taunabunai, hahelaḡa tauna ese boha tauna baine itaia, toutou mia-kakadia kwarana ai eiava ramana ai vada e gudu, lepra toutoudia heḡereḡeredia,

⁴⁴ia na lepra tauna: ia na miro. Hahelaḡa tauna ese baine gwauraia, vada e miro; badina be kwarana na mai leprana.

⁴⁵Lepra tauna na dabua hedarena baine hahedokilaia, huina baine ḡiḡia rohoroho, atai bibinana na dabua amo baine koua, baine lolo, baineto “Miro, miro”.

⁴⁶Ena gorere dinadia iboudiai ia na baine helaḡa. Ia na miro; sibona baine noho edea, taruha murimurinai.

⁴⁷Dabua manokana ai eiava dabua aukana ai lepra mirona bema mia,

⁴⁸eiava dabua ihatulaina varodia ai, eiava boromakau kopina ai, eiava boromakau kopina amo e karaia ḡauna ta ai,

⁴⁹bema gorere toana gadoka-gadokana eiava kakakakana na dabua ai eiava dabua varodia ai eiava boromakau kopina ai eiava boromakau kopina amo e karaia ḡauna ai baine hedinarai, una na lepra gorerena: hahelaḡa tauna bae haheitalaia.

⁵⁰Hahelaḡa tauna ese baine itaia, bena ia ese hari mai gorerena ḡauna baine koua ahu ela bona dina hitu bae ore.

⁵¹Bena dina ihahituna ai ma baine itaia lou: gorere toana bema bada, dabua ai eiava dabua varodia ai eiava boromakau kopina ai eiava boromakau kopina amo e karaia ḡauna ai, una na lepra korikori. Ia na miro vaitani;

⁵²taunabunai una dabua manokana eiava dabua aukana eiava dabua varona eiava boromakau kopina ḡauna na bae gabua, badina be una na lepra korikori una dainai lahi ai bae gabua.

⁵³A hahelaḡa tauna ese una ḡau baine itaia, gorere toana na se bada una dabua ai eiava una dabua varona ai eiava una boromakau kopina ḡauna ai,