LEVITIKO 10:2-15

²Bena lahi na Iehova ena amo e diho, raruosi e aladia mase, Iehova vairanai e mase.

³Bena Mose ese Aaron e hamaoroa, eto, Iehova na ini vada e gwau toma: Lau na baina helaḡa, bae raka henigu kahi taudia ediai; taunimanima iboudiai ese lau bae imodaigu. Bena Aaron na asi ena hereva.

⁴Bena Mose ese Misael bona Elsafan e boiridia; idia na Usiele, Aaron tamana lahaina, natuna. E hamaorodia, eto, Aoma, varavaramu bini gabu helaḡana, a amo bavabidia oho, taruha murimurinai ba huadia lao.

⁵Taunabunai, idia na e raka kahira, mai dabuadia ida e abidia isi, taruha murimurinai e huadia lao, Mose ena hereva heḡereḡerena.

⁶Mose ese Aaron mai natuna raruosi Eleasara bona Itamara ida e hamaorodia, eto, Huimui iḡuidia basio ruha, bona emui dabua basio dare, ba mase garina, bona Iehova ena badu orea taudia iboudiai latadiai baine kau na garina; a varavaramui bona Israel taudia iboudiai ese Iehova ena Iahi ḡaraḡarana dainai bae taitai.

⁷Bona hebou kalagana iduarana amo basio raka lasi, ba mase garina; badina be Iehova ena dehoro helaḡana na latamui ai. Bena Mose ena hereva heḡereḡerena ai e karaia.

⁸Bena Iehova ese Aaron e hereva henia, eto,

⁹Oi mai natumu ida hebou kalagana ai ba raka vareai negana ai na vine ranuna eiava kekero muramurana basio inua, ba mase garina. Taravatu binai na umui latamui ai baine mia hanaihanai, uru iboudiai lalodiai.

¹⁰Ḡau helaḡadia bona ḡau kavakavadia ba hididia; ḡau mirodia bona ḡau ḡoevaḡoevadia danu ba hididia.

¹¹Israel taudia ba hadibadia danu, Iehova ese Mose ena amo vada eme henidia taravatudia iboudiai ba hadibalaidia.

¹²Bena Mose ese Aaron bona natuna raruosi dounu mamauri, Eleasara bona Itamara, e haduadia, eto, Flaoa boubouna orena, Iehova ena ḡole-oho boubouna amo, bavabia, ihaboulaina patana badibadinai bavania, flaoa kavakava mo, asi ihatubuna, bavania; badina be ia na helaḡa herea.

¹³Gabu helaḡana ai bavania; badina be ia na oi ahumu bona natumu ahudia, Iehova ena ḡole-oho boubouna amo. Unu vada e haduagu toma.

¹⁴A boubou ḡauna kemena, e davea ḡauna, bona aena, e duduia isi ḡauna, na gabu ḡoevaḡoevana ta ai bavani, oi bona natumu mamaruanedia bona natumu hahinedia; badina be vada e henimui, oi ahumu bona natumu ahudia, Israel taudia edia herohemaino bouboudia amo.

¹⁵Boubou ḡauna aena, e duduia isi ḡauna, bona kemena, e davea ḡauna, na ḡole-oho boubouna digarana ida bae mailai, Iehova vairanai bae davedia, davedave boubouna ai baela: ina na oi amu bona natumui adia, umui ahumui ela hanaihanai, Iehova ena haheḡani heḡereḡerena.