2 Muri ge bole a maki nga ge lakea ne huriki e tune Aron, re huriki a prister. A prister tara ge ragamu tala na limana ranga plaoa kamumu, turana a namona oliv, a havu mangisipa. Muri ge habi na prister ge gutu langa na dede, ge a nihabi ni gutu na kanono. A nihabi iea ge ratea e BAKOVI DAGI ge luhoia. Na tahuna e BAKOVI DAGI i burongia a mangina kinani, bara i vivi.
3 A maka nihabi na vit i tababana ni gi habi ne Aron turane huriki e tuna bakovi, ra nihabi iea, a nihabi ni gutu na kanono ni taba ne vona e BAKOVI DAGI.
4 “Mua bara mu ngaru ni gutu a bret na oven ge a nihabi, naha ni vuli turana a is. Mu bole a plaoa kamumu mu vuli turana a namona oliv, mu rata a bret, ge a nihabi. Mua mu marikoi ni rata a bret, mu rata a bisket ge i uka is, mu ravu na namona oliv.
5 Mua bara mu ngaru ni nono a plaoa na ulo kabelabela ge a nihabi, mu bole a plaoa kamumu ge uka is, mu vuli turana a namona oliv, mu gutu.
6 Mu pua a bret ge momo, mu guru langa vona a namona oliv, ge a nihabi na vit.
7 Mua bara mu rata a bret ge a nihabi, mu gutu na ulo, mu bole a plaoa kamumu, mu vuli turana a namona oliv.
8 Mu bolea a nihabi na vit, mu rata a maki nga, mu taparaki lakea na prister ge bole lakea na dede, ge habi ne BAKOVI DAGI.
9 Muri a prister ge bole tala na nihabi na vit a tabekena popote, a maki iea ge ratea e BAKOVI DAGI ge luhoia. Ge gutu na dede, ge a nihabi ni gutu na kanono. Na tahuna e BAKOVI DAGI i burongia a mangina kinani, bara i vivi.
10 A maka nihabi na vit i tababana ni gi habi ne Aron turane huriki e tuna bakovi, ra nihabi iea, a nihabi ni gutu na kanono ni taba ne vona e BAKOVI DAGI.
11 “Naha ni vuli a is turana plaoa ge a nihabi na vit ne BAKOVI DAGI, a vuhuna i uka ma go gutu a is, a ame na nihabi go habi ne BAKOVI DAGI na kanono.
12 Ioe bara o ngaru, o vuli a is, a ame turana a maki i moro muga na hania, ge a nihabi ne BAKOVI DAGI, pali naha ni gutu na dede ge huli manginoro a mangina.
13 A maka nihabi lobo na vit, ni gi ru a mami vona. Naha ni longokaburungi ni ru a mami na maka nihabi ne mua, a vuhuna a mami a kilakila na ngava dagi mu rata turana Vure. Mu ru a mami na maka nihabi lobo.
14 “Mua bara mu habi ne BAKOVI DAGI a vit i moro muga na hania, mu tutu, mu gutu na kanono, muri mu habi vona.
15 Mu bole a namona oliv, a havu mangisipa mu guru langa na maka vit, ge a nihabi na vit.
16 A prister ge bole tala a vit popote, a namona oliv, turana a maka havu mangisipa, a maki nga ge ratea e BAKOVI DAGI ge luhoia, ge a nihabi ni gutu na kanono lakea vona.”
