15 Ɗa ɓɔɛ Izelayɛle nuiti pɔ ga, nu-o-nu a ná-GALAGI ɠotona, naama nui ɠa ná-kotoi ma ɠasɔi zeɠe.
16 Zɔi nɔpɛ a woo ɲɔu wona Ɠɔoɠɔ GALAGI laaseigi laalɔɠɔma, ta naama nui ʋaa, bɛbɛi kpein ka sɔ ga kɔtui, é za, é ɠɛni ga seikɔɠɔma nu ɓaa zou loun, tɔɔzei é woo ɲɔi woga GALA daaseigi laalɔɠɔma.
17 «Zɔi a nu ʋaana, ta naama nui ʋaa.
18 Zɔi a sua ʋaana, toɠa potogi ve ga suai ta. Zɛnvui ʋoto ka ɠɛ ga zɛnvui.
19 Ni nui ta a seiɲɔɠɔi maawanana, toɠa ɠɛ la, eɠɛʋelei tɔ ɓɔɠɔi é kɛa la ga zɔi.
20 Nii a nu ɠaei ɠale, naama nui ɠaei ɠa ɠale, nu ɠaazuɠɛzɛgi ʋoto ka ɠɛ ga nu ɠaazuɠɛzɛgi, nu ɲiiga ʋoto ka ɠɛ ga nu ɲiiga. Ta naama maawanai ɠɛɠalai ɠɛ ga naa, nii é kɛa ga zɔi.
21 Zɔi a sua ʋaana, toɠa potogi ve. Kɛlɛ zɔi a nu ʋaana, ta naama nui ʋaa.
