3 Yã kɛ̀ è kɛ anduna guu píngi nↄ̀sɛyakayãmɛ, kɛ̀ yã dↄ̃nkↄ̃ bé è gbɛ̃ píngi le. Yã zaaa kↄ̃̀ gbɛ̃nteenↄ swɛ̃̀n, yↄ̃nkↄyã bé è dↄńnɛ aɛ, à gbɛra aↄ̃è tá gɛ̀wãan.
4 Gurↄↄ kɛ̀ gbɛ̃ kú wɛ̃̀ndio ègↄ̃ tãmaa vĩ. Gbɛ̃ɛ kɛ̀ bɛ̃ɛ see sã̀ↄ dɛ músu gɛ̀la.
5 Gbɛ̃ bɛ̃ɛnↄↄ dↄ̃ kɛ̀ aↄ̃é ga, gɛ̀nↄ sↄ̃ↄ pↄ́ke dↄ̃ro. Aↄ̃ láada ke vĩ dↄro, aↄ̃ yã é dↄ gbɛ̃ken dↄro.
6 Aↄ̃ yena gbɛ̃zi kↄ̃n ń zana gbɛ̃n-o kↄ̃n ń nↄ̀sɛgↄ̃aanↄo gɛ̃̀ zɛ́lan gwe. Aↄ̃ bà égↄ̃ kú kↄ̃n yã kɛ̀ è kɛ anduna guuo ziki dↄro.
7 Ǹ gá ǹ n pↄ́ ble kↄ̃n pↄnnaao, ǹ n geepiwɛ̃ɛ mi kↄ̃n yáadↄnao, zaakɛ Luda n yãkɛna pìnↄ sáabu kpà kↄ̀.
8 Ǹgↄ̃ uta puraa dana gurↄ píngi. Ǹtongↄ̃ kuu nↄ́si dↄkↄna n mìa sairo.
9 Ǹ pↄnnaa kɛ kↄ̃n n naↄ̃ yenzideeo n wɛ̃̀ndi kori kɛ̀ Ludaa kpàmma anduna guu lɛ́n, zaakɛ n bakan gwe gurↄↄ kɛ̀ n ísimma gà nɛ́ɛ kpaa anduna guu.
10 Zĩi kɛ̀ n ↄ nà a kɛnaa, ǹ kɛ n gbãa lɛ́n, zaakɛ zĩi ke yãgↄ̃gↄ̃na ke dↄ̃na ke ↄ̃ndↄ̃ↄ kú gɛ̀wãan kɛ̀ nɛ́ɛ taanlo.
11 Má è anduna guu dↄ kɛ̀ bàkpakↄ̃sↄ̃blena è kɛ bà nna yãnlo, zĩ̀blena è kɛ gbãa yãnlo, pↄ́ble'ena è kɛ ↄ̃ndↄ̃ yãnlo, auziki'ena è kɛ wɛ́ɛzɛ̃ yãnlo, nna kↄ̃n gbɛ̃nↄ è kɛ kyódↄ̃na yãnlo, zaakɛ gurↄ zaa kↄ̃n kisiao è ń lé ń píngi,
12 gbɛ̃kee gurↄↄ kɛ̀ yã zaaa é a lee dↄ̃ro. Lán kpↄ̀ kɛ̀ sì táaru guu bà, lán bãa kɛ̀ bà kũ̀ bà, lɛn guu è dↄ gbɛ̃nɛ zaazaa à à kũ kùsu lɛ.
13 Ma ↄ̃ndↄ̃ ke taka è anduna guu, à yã ma kũ gbãa.
