20 Gbɛ̃ mana kũ àdigↄ̃ yã mana kɛ kũ àdi durunna kɛro kú andunia gũnlo.
21 Ǹsun sã kpá yã kũ gbɛ̃nↄ tɛn oi pínkiro, de ǹsun ma n zĩkɛri tɛni n sↄ̃sↄ̃ro.
22 Zaakũ ń dↄ̃ n zĩdanɛ, kũ mↄkↄ̃n se n gbɛ̃nↄ sↄ̃̀sↄ̃ dasi.
23 Ma yã birenↄ gwà kũ ↄ̃ndↄ̃o pínki, ma zɛo kũ mà ↄ̃ndↄ̃ kũ, akũ à zã̀ kũmao.
24 Bee tó ↄ̃ndↄ̃ fↄ̃̀ àgↄ̃ dera, a kúki zã̀, a asiri zↄ̃kↄ̃ manamana, dí mɛ́ ani fↄ̃ à boaa?
25 Ma ↄ̃ndↄ̃ kũ yã sĩnda pínkioo mìi tàasii kà, ma gwàgwa de mà le mà dↄ̃, de mà yãvãnikɛna dↄ̃ yↄ̃nkↄkɛ ũ, de mà yↄ̃nkↄkɛ dↄ̃ mìsarikɛ ũ.
26 Nↄgbɛ̃ kũ à de tankutɛ ũ a swɛ̃̀ bi gbàgidiimɛ a ↄnↄ bi mↄ̀kakↄ̃anaamɛ, a yã dì ma pↄ yaka de gala. Gbɛ̃ kũ a yã kà Ludanɛɛ dì wotoa, ama nↄgbɛ̃ pìi dì durunnakɛri kũmɛ.
27 Makũ laasunde ma pì, ǹ yã kũ ma boa gwa. Kũ matɛn yã gwa zɛ́azɛa de mà le mà a mì dↄ̃,
28 gↄrↄ kũ matɛn wɛtɛ lenaa sari, ma gↄ̃gbɛ̃ mana lè mɛ̀n do gbɛ̃nↄn wàa sↄↄronↄ tɛ́, ama bee nↄgbɛ̃ mana mɛ̀n do mádi le ń tɛ́ro.
