13 Ǹ laasun lɛ́ Luda yãkɛnanↄa. Dí mɛ́ ani fↄ̃ à pↄ́ kũ à kɛ̀ kotinaa dↄdↄↄ?
14 Tó gↄrↄ nna sùmma, ǹ pↄnna kɛo. Tó gↄrↄ vãnimɛ sↄ̃, ǹ laasun lɛ́. Luda mɛ́ à a pínki kɛ̀, de gbɛ̃ke súngↄ̃ a zia dↄ̃ro yãi.
15 Ma wɛ̃̀ndi kori dí gũn ma yã díkĩnanↄ è pínki. Ma gbɛ̃ mana è, à gà a manakɛnaa gũn, ma gbɛ̃ vãni è, àtɛn gì kɛ a yãvãnikɛnaa gũn.
16 Ǹsun tó n manakɛna gɛ̃ ↄlaro, ǹsun tó n ↄ̃ndↄ̃ gɛ̃ ↄlaro. À kɛ̀ dera ĩni n zĩda kakatɛɛ?
17 N vãni sún gɛ̃ ↄlaro, ǹsungↄ̃ yↄ̃nkↄ ũro. À kɛ̀ dera ĩni ga n gↄrↄ ãa?
18 À mana ǹgↄ̃ yã mɛ̀n pla pìnↄ kũnamɛ, ǹsun ↄ gbarɛiro, zaakũ gbɛ̃ kũ à Luda vĩna vĩ dì a pla pìnↄ zɛ́ le pínkimɛ.
19 Ɔ̃ndↄ̃ dì tó ↄ̃ndↄ̃ri gbãna gↄ̃ de wɛ́tɛ gbãnade gbɛ̃nↄn kurinↄla.
20 Gbɛ̃ mana kũ àdigↄ̃ yã mana kɛ kũ àdi durunna kɛro kú andunia gũnlo.
21 Ǹsun sã kpá yã kũ gbɛ̃nↄ tɛn oi pínkiro, de ǹsun ma n zĩkɛri tɛni n sↄ̃sↄ̃ro.
22 Zaakũ ń dↄ̃ n zĩdanɛ, kũ mↄkↄ̃n se n gbɛ̃nↄ sↄ̃̀sↄ̃ dasi.
23 Ma yã birenↄ gwà kũ ↄ̃ndↄ̃o pínki, ma zɛo kũ mà ↄ̃ndↄ̃ kũ, akũ à zã̀ kũmao.
24 Bee tó ↄ̃ndↄ̃ fↄ̃̀ àgↄ̃ dera, a kúki zã̀, a asiri zↄ̃kↄ̃ manamana, dí mɛ́ ani fↄ̃ à boaa?
25 Ma ↄ̃ndↄ̃ kũ yã sĩnda pínkioo mìi tàasii kà, ma gwàgwa de mà le mà dↄ̃, de mà yãvãnikɛna dↄ̃ yↄ̃nkↄkɛ ũ, de mà yↄ̃nkↄkɛ dↄ̃ mìsarikɛ ũ.
26 Nↄgbɛ̃ kũ à de tankutɛ ũ a swɛ̃̀ bi gbàgidiimɛ a ↄnↄ bi mↄ̀kakↄ̃anaamɛ, a yã dì ma pↄ yaka de gala. Gbɛ̃ kũ a yã kà Ludanɛɛ dì wotoa, ama nↄgbɛ̃ pìi dì durunnakɛri kũmɛ.
